រាជធានីភ្នំពេញ ៖ មិនមានអ្វីប្លែកនោះទេ ប្រៀបទៅនឹងបណ្តាឆ្នាំមុនៗ ខណៈមុនថ្ងៃប្រឡងបាក់ឌុបជិតចូលមកដល់តែងមានសិស្សានុសិស្សប្រុស-ស្រីរាប់រយនាក់ នាំគ្នាទិញគ្រឿងសក្ការបូជាមានធូបទៀននិងផ្កាឈូកចូលទៅអុជធូប មុខព្រះអង្គដងកើ ដែលមានទីតាំងនៅមុខព្រះបរមរាជវាំង ព្រឹកថ្ងៃទី១៥ សីហា…
រាជធានីភ្នំពេញ ៖ មិនមានអ្វីប្លែកនោះទេ ប្រៀបទៅនឹងបណ្តាឆ្នាំមុនៗ ខណៈមុនថ្ងៃប្រឡងបាក់ឌុបជិតចូលមកដល់តែងមានសិស្សានុសិស្សប្រុស-ស្រីរាប់រយនាក់ នាំគ្នាទិញគ្រឿងសក្ការបូជាមានធូបទៀននិងផ្កាឈូកចូលទៅអុជធូប មុខព្រះអង្គដងកើ ដែលមានទីតាំងនៅមុខព្រះបរមរាជវាំង ព្រឹកថ្ងៃទី១៥ សីហា មុនប្រឡង៤ថ្ងៃ ដើម្បីបួងសួងសុំទទួលបានជោគជ័យ ។
កញ្ញា មាន សំណាង សិស្សថ្នាក់ទី១២ នៅវិទ្យាល័យបាក់ទូក ដែលនៅក្នុងដៃមានកាន់ផ្កាឈូកពណ៌ស និងធូបទៀនហើយឈរតម្រង់ជួរដើម្បីចូលទៅអុជធូបក្នុងទីសក្ការព្រះអង្គដងកើ បានឲ្យដឹងថា នៅថ្ងៃទី១៩ សីហា ឆ្នាំ២០១៩ គឺជាប្រឡងបាក់ឌុប ដូច្នេះនៅសល់តែ៤ថ្ងៃប៉ុណ្ណោះ ក្រោយពីនាងបានខិតខំយកមេរៀនល្អៗមកមើល ហើយត្រូវបានមិត្តភក្តិបបួលឲ្យមកអុជធូប និងថ្វាយផ្កាសុំសេចក្តីសុខសប្បាយ និងកុំមានជំងឺស្កាត់នៅពេលប្រឡងនិងកុំមានភ័យភិតខ្លាចប្រឡងធ្លាក់ ជាពិសេសសុំឲ្យព្រះអង្គជួយតាមផ្លូវងងឹតពង្រឹងស្មារតីដល់កញ្ញានៅពេលប្រឡងផងដែរ ។
យុវជន គឹម វាសនា រៀននៅវិទ្យាល័យព្រះសុីសុវត្ថិដែលត្រូវប្រឡងបាក់ឌុប ដែរនោះបាននិយាយថា នៅសល់តែ៤ថ្ងៃទៀតប៉ុណ្ណោះថ្ងៃប្រឡងបាក់ឌុបចូលមកដល់ គឺនៅថ្ងៃទី១៩ ខែសីហា ដោយសារមានការភ័យខ្លាចប្រឡងធ្លាក់ ណាមួយត្រូវបានបងប្អូនឪពុកម្តាយនាំមកអុជធូប និងថ្វាយផ្កាចំថ្ងៃសីលផងនោះ វាសនាក៏មកជាមួយហើយបួសសួងសុំឲ្យព្រះអង្គដងកើជួយតាមផ្លូវងងឹតពង្រឹងស្មារតីដល់ខ្លួន និងជួយឲ្យប្រឡងជាប់ នេះមិនមែនមានន័យថា រូបគេមិនខិតខំរៀននោះឡើយ ហើយនេះក៏ជាជំនឿសាសនាតាំងពីដូនតាមកម្ល៉េះ នៅសល់តែបួនថ្ងៃទៀតដល់ពេលប្រឡង ខ្លួនគេបានជ្រើសរើសមេរៀនមកមើលផងដែរ មិនមែនដេកដួលតាមការបែរបន់នោះទេ ។
សិស្សវិទ្យាល័យទួលទំពូងម្នាក់និយាយក្នុងន័យសុំមិនបញ្ចេញឈ្មោះបានលើកឡើងថា នាងក៏បានជាវទៀនធូប ផ្កាមកអុជធូបថ្វាយដល់ព្រះអង្គដងកើ ដែលប្រជាពលរដ្ឋកម្ពុជានៅទូទាំងប្រទេសមានជំនឿខ្លាំងណាស់ ពេលពួកគាត់មានទុក្ខគាត់បន់បានដូចក្តីប្រាថ្នាមែន តែចំពោះរូបនាងវិញ ថ្ងៃនេះត្រូវចំថ្ងៃទី១៥ សីហា ដូច្នេះនៅសល់តែបួនថ្ងៃទៀត គឺដល់ថ្ងៃប្រឡងបាក់ឌុបហើយ នាងសុំឲ្យព្រះថែរក្សារូបនាងពេលប្រឡង កុំឲ្យជួបហេតុការណ៍ចង្រៃណាមួយឡើយចំពោះនាង ការប្រឡងនេះដែរនាងត្រៀមខ្លួនជាស្រេច ក្នុងការមើលមេរៀនឡើងវិញ រួមទាំងទៅរៀនគួបន្ថែមទៀតផង ។ នាងថាការមកបន់ស្រន់នេះ គឺធ្វើឡើងទៅតាមជំនឿសាសនាតែប៉ុណ្ណោះ បើយើងមិនខំរៀនផង តើប្រឡងជាប់ម្តេចនឹងកើត ប៉ុន្តែខ្ញុំប្រឹងរៀនណាស់ ។
លោកសាស្ត្រាចារ្យ ប៊ុន សោភ័ណ ដែលអះអាងថា លោកជាគ្រូបង្រៀននៅវិទ្យាល័យបឹងត្របែក ហើយបានឈរមើលក្រុមសិស្សានុសិស្សប្រុសស្រី ដែលនាំគ្នាសំរុកចូលកន្លែងទីសក្ការព្រះអង្គដងកើ ហើយម្នាក់ៗមានកាន់ទៀនធូបនិងផ្កាដើម្បីបន់នេះ លោកបានឲ្យដឹងថា តាមលោកយល់ឃើញនេះ គឺជាទម្លាប់របស់ក្រុមសិស្សានុសិស្ស ខណៈពេលប្រឡងបាក់ឌុបជិតឈានមកដល់ ទើបម្នាក់ៗមកបន់សុំឲ្យជួយប្រឡងជាប់និងកុំជួបគ្រោះចង្រៃផ្សេងៗនៅពេលប្រឡង ។
នេះជាបញ្ហាមួយទៅតាមជំនឿសាសនាព្រះពុទ្ធ អ្វីដែលលោកយល់នោះដើម្បីឲ្យពួកគេប្រឡងជាប់ ក្មួយសិស្សានុសិស្សត្រូវខិតខំរៀនសូត្រ ហើយត្រូវជ្រើសរើសយកមេរៀនដែលយល់ថាពាក់ព័ន្ធ នឹងការប្រឡងមកមើល នោះសង្ឃឹមថាអាចប្រឡងជាប់ ។ លោកថា បើសិនជាពួកគេមិនដែលយកមេរៀនមកមើលផង តើឲ្យជាប់របៀបណា ថ្ងៃទំនេរនាំគ្នាដើរលេងសប្បាយតាមរមណីយដ្ឋាននានា ។
លុះជិតដល់ពេលប្រឡងទើបនាំគ្នាស្វាត់ស្វែងយកមេរៀនមកមើលនិងរត់ទៅបន់ស្រន់ តើបានដូចបំណងដែរឬទេ ? សរុបមកមានតែអ្នកចេះពិតនឹងអាចប្រឡងជាប់មួយរយភាគរយ ។ លោកសាស្ត្រាចារ្យយក៏បានរំលឹកផងដែរថា ខណៈការប្រឡងបាក់ឌុបកាន់តែខិតជិតមកដល់ ក្រៅពីប្រឹងរំលឹកមេរៀន បេក្ខជនត្រូវគិតពីសុខភាពរបស់ខ្លួន ពោលគឺកុំរៀនរហូតដល់យប់ជ្រៅពេក ដែលអាចបង្កជាបញ្ហាសុខភាពនៅថ្ងៃប្រឡង ។
ដោយឡែក លោកតាអាចារ្យម្នាក់ដែលនៅថែរក្សាទីសក្ការព្រះអង្គដងកើបានលើកឡើងថា សិស្សានុសិស្សរាប់រយនាក់ដែលនាំគ្នាមកអុជធូបថ្វាយផ្កានៅព្រះអង្គដងកើនេះមិនមានអ្វីប្លែកឡើយ ហើយវាក៏មិនខុសពីបណ្តាឆ្នាំមុនៗដែរ ឲ្យតែដល់ពេលប្រឡងឌីប្លូម និងបាក់ឌុបម្តងៗគឺក្មួយៗសិស្សានុសិស្សរាប់រយនាក់នាំគ្នាមកអុជធូបថ្វាយផ្កាឈូក និងសុំទឹកមន្តយកទៅលុបមុខ អ្នកខ្លះទៀត សុំឲ្យព្រះអង្គជួយពួកគេឲ្យប្រឡងជាប់ នេះគ្រាន់តែជាជំនឿការយល់ឃើញរបស់មនុស្សម្នាក់ៗ ហើយជារៀងរាល់ឆ្នាំផងដែរ មុនពេលប្រឡងពួកគេមកអុជធូបតាំងពីព្រឹករហូតដល់យប់ឯណោះ ។
គួរបញ្ជាក់ផងដែរថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ ធ្វើឡើងរយៈពេល២ថ្ងៃ គឺនៅថ្ងៃទី១៩ និងថ្ងៃទី២០ ខែសីហា ឆ្នាំ២០១៩។ សម័យប្រឡងសញ្ញាបត្រទុតិយភូមិឆ្នាំ២០១៩នេះ មានបេក្ខជនដាក់ពាក្យចំនួន១១៩.២១៧ នាក់ ថ្នាក់វិទ្យាសាស្ត្រចំនួន ៤៥.៤១៤នាក់ និងថ្នាក់វិទ្យាសាស្ត្រសង្គមមានចំនួន៧៣.៨០៣នាក់ និងមានមណ្ឌលប្រឡងចំនួន២០២ មណ្ឌលទូទាំងប្រទេស ៕
ចែករំលែកព័តមាននេះ