ខេត្តមណ្ឌលគិរី ៖ អភិបាលខេត្តមណ្ឌលគិរីបានបញ្ជាឱ្យមន្ទីរសាធារណៈការ និងរដ្ឋបាលខេត្ត ត្រូវរូតរះបញ្ជូនគ្រឿងចក្រទៅជុសជុលផ្លូវ និងស្ពាន ស្ថិតក្នុងឃុំណងឃីលឹក និងឃុំសុខសាន្ត ស្រុកកោះញែក ឱ្យបានលឿនបំផុត ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ។
លោកស្វាយ សំអ៊ាង អភិបាលខេត្តមណ្ឌលគិរី កាលពីព្រឹកថ្ងៃទី១៥ សីហា បានចុះត្រួតពិនិត្យនូវហេដ្ឋារចនាសម្ព័ន្ធ នៅក្នុងស្រុកកោះញែក ដោយបានជំរុញដល់មន្ត្រីជំនាញ និងអាជ្ញាធរមូលដ្ឋានត្រូវសហការគ្នា យកចិត្តទុកដាក់ជួសជុលហេដ្ឋារចនាសម្ព័ន្ធ ដែលរងការខូចខាតដោយសារជំនន់ទឹកភ្លៀង ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋធ្វើដំណើរទៅមក ។
ចំពោះការខូចខាតដែលបណ្ដាលមកពីជំនន់ទឹកភ្លៀងនៅទូទាំងស្រុកកោះញែក ក្នុងឃុំណងឃីលឹក ទឹកហូរច្រោះផ្លូវកន្លែងលូ និងស្ពានប្រវែង៤៨០ម៉ែត្រ ស្ពានដែកបេឡេតិ៍នៅអូរជីមៀត ហូរច្រោះសងខាងប្រវែង២០ម៉ែត្រ ប៉ើងបាត់ស្ពានឆ្លងអូរប្រវែង៣.៥ម៉ែត្រចំនួន២កន្លែង ប៉ះពាល់ដល់សន្ទូងស្រូវពង្រោះចំនួន៤៧២ហិកតា ដំឡូងមី ស្វាយចន្ទី ពោត និងសណ្ដែកចំនួន១៥០ហិកតា ងាប់គោចំនួន២ក្បាល នឹងបាត់អស់ចំនួន០៤ក្បាល ជ្រូកងាប់ចំនួន១ក្បាល និងបាត់អស់ចំនួន២០ក្បាល បាត់ទូកអស់ចំនួន០២គ្រឿង និងប៉ើងខ្ទមស្រែចំនួន០៣ខ្នង ។
ចំណែកនៅក្នុង ទឹកជំនន់ហូរដាច់ផ្លូវនៅភូមិកញ្ជ័រចំនួន២កន្លែងសរុបប្រវែង៥០០ ម៉ែត្រ និងហូរច្រោះលូប្រអប់ចំនួន០១កន្លែងនៅភូមិជីក្លប ។ (សម្រួលដោយ៖ ស្រីណា)
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ