ខេត្តស្វាយរៀង ៖ ប្រជាពលរដ្ឋ និងសិស្សានុសិស្សរស់នៅក្នុងឃុំដូង ស្រុករមាសហែក បានអំពាវនាវដល់អាជ្ញាធរ និងមន្ទីរពាក់ព័ន្ធ មេត្តាជួយស្ថាបនាផ្លូវក្រាលគ្រួសក្រហមមួយខ្សែប្រវែង០៦គីឡូម៉ែត្រតភ្ជាប់ពីផ្លូវជាតិលេខ៣១៣ ទៅកាន់ច្រកទ្វាព្រំដែនតំបន់ដូងឃុំដូង កំពុងរងការខូចខាតទាំងស្រុង នៅរដូវវស្សានេះ ដោយមានជង្ហុកធំៗ និងភក់ល្បាប់ បណ្តាលឲ្យរអិលពិបាកក្នុងការធ្វើដំណើរខ្លាំងណាស់ ជាពិសេសសិស្សានុសិស្ស ។ ការអំពាវនាវនេះដែរ កើតឡើងនៅថ្ងៃទី១៥ សីហានេះនៅភូមិ ។
បើតាមប្រជាពលរដ្ឋឃុំដូងបានឲ្យដឹងថា ផ្លូវមួយខ្សែនេះអាជ្ញាធរខេត្តបានស្ថាបនា និងជួសជុលនៅឆ្នាំ២០១៨ ដើម្បីងាយស្រួលដល់បងប្អូនប្រជាពលរដ្ឋ និងសិស្សានុសិស្សធ្វើដំណើរប៉ុន្តែបានល្អតែមួយរយៈតែប៉ុណ្ណោះ ។ ក្រោយមកមានរថយន្តយីឌុបធុនធំៗដឹកទំនិញធ្វើចរាចរណ៍ឆ្លងកាត់ផ្លូវនេះជារៀងរាល់ថ្ងៃ បណ្តាលឲ្យរងការខូចខាតក្លាយជារណ្តៅជង្ហុកធំៗហើយនារដូវវស្សានេះមានភ្លៀងធ្លាក់ច្រើន បណ្តាលឲ្យដក់ទឹក និងបែកល្បាប់ធ្វើឲ្យរអិលបែកភក់ពិបាកធ្វើដំណើរខ្លាំងណាស់ ជាពិសេសពេលសិស្សានុសិស្សតូចៗធ្វើដំណើរទៅរៀនរាល់ព្រឹក សិស្សខ្លះរអិលដួលប្រឡាក់សម្លៀកបំពាក់ខានទៅរៀនទៀតផង ។
ពាក់ពន្ធករណីផ្លូវនេះដែរ លោក តឹក យី មេឃុំដូងបានប្រាប់ឲ្យដឹងថា ផ្លូវនេះជាផ្លូវខេត្តកន្លងមកបានធ្វើការជួសជុលបានល្អហើយ ប៉ុន្តែបច្ចុប្បន្ននេះពិតជារងការខូចខាតពិតប្រាកដមែនហើយ កាលពីខែកក្កដាកន្លងទៅលោកបានស្នើរសុំទៅឯកឧត្តមអូនពន្ធមន្នីរត្ន័ ឧបនាយករដ្ឋរដ្ឋមន្ត្រីក្រសួង សេដ្ឋកិច្ចហិរញ្ញវត្ថុ ដើម្បីស្ថាបនាផ្លូវនេះ ជាផ្លូវក្រាលកៅស៊ូវិញ ដើម្បីធានាសុវត្ថិភាពដោយផ្លូវនេះមានរថយន្តធុនធំដឹកទំនិញធ្វើចរាចរណ៍ឆ្ពោះទៅកាន់ច្រកទ្វាតំបន់ព្រំដែនដូងឆ្លងកាត់ទៅប្រទេសវៀតណាម ។ លោកបន្តទៀតថា ៖ ផ្លូវនេះកន្លងមកមានលោកមេប៉ុសិ៍ច្រកទ្វាព្រំដែនដូងធ្វើការជួសជុល ប៉ុន្តែមួយរយៈនេះ លោកមេប៉ុស្តិ៍ច្រកទ្វារគាត់មិនធ្វើការជួសជុល បណ្តាលឲ្យរងការខូចផ្លូវនេះទាំងស្រុងតែម្តង ។
ពាក់ព័ន្ធនឹងការលើកឡើងរបស់ប្រជាពលរដ្ឋថា មានរថយន្តធំៗដឹកទំនិញធ្វើចរាចរណ៍លើផ្លូវនេះ បណ្តាលឱ្យរងការខូចខាតនេះយើងព្យាយាមទំនាក់ទំនងសុំការបំភ្លឺពីលោកនួន លីហួន ប្រធានមន្ទីរសាធារណការ និងដឹកជញ្ជូនខេត្តស្វាយរៀងដែរ ប៉ុន្តែមិនអាចទាក់ទងបាន ដោយសារទូរស័ព្ទចូលហើយគ្មានអ្នកលើកទទួល ៕ កែសម្រួលដោយ ៖សុឃាក់
ចែករំលែកព័តមាននេះ