ប្រទេសប៉ាគីស្ថាន-ឥណ្ឌា ៖ ប្រទេសប៉ាគីស្ថានកាលពីថ្ងៃទី១៤សីហាបានប្រកាន់ភាសាសង្គ្រាមប្រឈមមុខជាមួយឥណ្ឌា ដោយព្រមានក្រុងញូវដែល្លីប្រឆាំងរាល់ការឈ្លានពានលើផ្នែកកាស្មៀររបស់ខ្លួន។ ដែនដីកាស្មៀរជាតំបន់ភ្នំដែលប្រជាជនភាគច្រើនកាន់សាសនាអ៊ិស្លាម ហើយប្រទេសទាំង២មានជម្លោះជាមួយគ្នានិងធ្លាប់ច្បាំងគ្នា២លើករួចមកហើយ។
នាយករដ្ឋមន្ត្រីប៉ាគីស្ថានលោកអីុមរ៉ានខាន់ កាលពីថ្ងៃទី១៤សីហា នាថ្ងៃបុណ្យឯករាជ្យរបស់ប្រទេសលោកថ្លែងថា កងទ័ពប៉ាគីស្ថានទទួលបានព័ត៌មានរឹងមាំនានាដែលថា ឥណ្ឌាមានចេតនាធ្វើអ្វីម្យ៉ាងនៅកាស្មៀរប៉ាគីស្ថាន។ ប្រសិនបើគេហ៊ាន នោះយើងនឹងឆ្លើយតបវិញយ៉ាងមឺុងម៉ាត់។ លោកអះអាងបែបនេះ ក្នុងសុន្ទរកថាមួយនាទីក្រុងមូហ្សាវហ្វារ៉ាបាដរដ្ឋធានីកាស្មៀរប៉ាគីស្ថាន។ លោកបន្តថាប្រសិនបើឥណ្ឌាប្រព្រឹត្តការរំលោភបំពានមួយ នោះយើងសម្រេចប្រយុទ្ធតតាំងរហូតដល់ទីចុងបំផុត។ ពេលវេលាមកដល់ហើយដែលយើងត្រូវផ្ដល់មេរៀនមួយដល់គេ។
ចំណែកនាយសេនាធិការកងទ័ពប៉ាគីស្ថានឧត្ដមសេនីយ QAMAR JAVED BAJWAថ្លែងថា កងទ័ពរបស់លោកត្រៀមជាស្រេចក្នុងការបំពេញតួនាទីរបស់ខ្លួន។ នេះជាការផ្លាស់ប្ដូរវោហារសាស្ត្ររបស់ប៉ាគីស្ថាន ខណៈនាពេលមុននេះ រដ្ឋមន្ត្រីការបរទេសរបស់ខ្លួន លោក SHAH MEHMOOD QURESHIធ្លាប់ថ្លែងកាលពីថ្ងៃទី៨សីហាថា ប្រទេសរបស់លោកពុំគ្រោងជ្រើសរើសយកផ្លូវយោធាទេ។ យើងនឹងពិនិត្យលើការជ្រើសរើសខាងផ្លូវនយោបាយ ការទូតនិងច្បាប់។
ភាពតានតឹងរវាងប្រទេសជិតខាងទាំង២មានខ្ពស់ ក្រោយពីការសម្រេចរបស់ឥណ្ឌាដកស្វ័យភាពពីផ្នែកកាស្មៀររបស់ខ្លួន ដែលប៉ាគីស្ថានទាមទារយក។ វិធានការនោះដែលសំដៅដាក់ដែនដីដែលមានឧទ្ទាមកម្មនេះ ឲ្យស្ថិតក្រោមការត្រួតត្រាដោយផ្ទាល់របស់ឥណ្ឌា ត្រូវបានប៉ាគីស្ថានចាត់ទុកថាខុសច្បាប់។ ដែនដីកាស្មៀរចាប់តាំងពីពុះបំបែកចែកគ្នាពីឆ្នាំ១៩៤៧មក នាំឲ្យប្រទេសទាំង២មានជម្លោះនឹងគ្នា និងធ្លាប់ច្បាំងគ្នា២លើករួចមកហើយ។
យោងតាមអភិបាលរដ្ឋចាមូនិងកាស្មៀរឥណ្ឌាថា បំរាមគោចរណ៍ដែលដាក់នៅកាស្មៀរឥណ្ឌា នឹងត្រូវសម្រាលក្រោយបុណ្យឯករាជ្យជាតិថ្ងៃទី១៥សីហា៕ (កែសម្រួលដោយ ៖ បុប្ផា)
ចែករំលែកព័តមាននេះ