ប្រទេសរុស្ស៊ី ៖ បើតាមទីភ្នាក់ងារសង្គ្រោះបន្ទាន់រុស្ស៊ី បានរាយការណ៍ប្រាប់ SPUTNIK ឱ្យដឹងថា យន្តហោះមួយគ្រឿងដែលហោះទៅកាន់ទីក្រុងសេបាស្តូប៉ូល តំបន់គ្រីមេ ក្រោយពេលការហោះចេញពីព្រលានយន្តហោះ JOUKOVSKI…
ប្រទេសរុស្ស៊ី ៖ បើតាមទីភ្នាក់ងារសង្គ្រោះបន្ទាន់រុស្ស៊ី បានរាយការណ៍ប្រាប់ SPUTNIK ឱ្យដឹងថា យន្តហោះមួយគ្រឿងដែលហោះទៅកាន់ទីក្រុងសេបាស្តូប៉ូល តំបន់គ្រីមេ ក្រោយពេលការហោះចេញពីព្រលានយន្តហោះ JOUKOVSKI តំបន់ក្រុងមូស្គូ បានបន្តិច ស្រាប់តែត្រូវបង្ខំចុះចតបន្ទាន់ នាថ្ងៃទី១៥ ខែសីហា ឆ្នាំ២០១៩ នៅក្នុងចម្ការពោតមួយកន្លែង នៅជិតព្រលាននោះ។
ក្រោយការហោះចេញបន្តិច យន្តហោះធុន AIRBUS A321 នោះ បានបុក ហើយប៉ះបក្សីមួយហ្វូង ហើយបក្សីជាច្រើនក្បាលនោះក៏ហោះចូលទៅក្នុងម៉ាស៊ីនរេអាក់ទ័ររបស់យន្តហោះនោះតែម្តង បណ្តាលនាំឲ្យម៉ាស៊ីនទាំងអស់នោះត្រូវគាំងទាំងស្រុង។
ខណៈពេលជួបគ្រោះអាសន្នបែបនេះ យន្តហោះនោះត្រូវបានបង្ខំចុះជាបន្ទាន់ក្នុងចំការពោតមួយក្បែរព្រលាន ដោយមិនទាំងអាចទម្លាក់កង់បានផង។ ប៉ុន្តែពិតជាមហាសំណាងណាស់ ដែលយន្តហោះនោះពុំបានរងការឆេះនោះទេ ហើយមនុស្សទាំង២២៦នាក់ក្នុងយន្តហោះ ក្នុងនោះមានទាំងសមាជិកក្រុមយានិក៦នាក់ ពុំមាននរណាម្នាក់រងគ្រោះស្លាប់នោះឡើយ។
យោងតាមក្រសួងសុខាភិបាល បានឱ្យដឹងថា គ្រោះថ្នាក់ខាងលើនេះបណ្ដាលឲ្យមនុស្ស២៣នាក់រងរបួស ក្នុងនោះមានកុមារ៥នាក់ ដែលពួកគេត្រូវបានបញ្ជូនទៅកាន់មន្ទីរពេទ្យ។ ចំណែកយន្តហោះជួបឧប្បត្តិហេតុនេះ គឺជារបស់ក្រុមហ៊ុនអាកាសចរណ៍រុស្ស៊ី URAL AIRLINES។ ហើយអាជ្ញាធរទទួលខុសត្រូវខាងសន្តិសុខនៃការហោះហើរ បានបើកការស៊ើបអង្កេតមួយ៕ (កែសម្រួលដោយ ៖ បុប្ផា) (ប្រភពវីដេអូ ៖ Sputnik France Play)
ចែករំលែកព័តមាននេះ