បន្ទាយមានជ័យ ៖ សេចក្តីរាយការណ៍បឋមបានឲ្យដឹងថា សាច់ជ្រូកចំនួន១០ក្បាលត្រូវចំអិនរួចរៀបចំពិសាសាច់ជ្រូកសុវត្ថិភាពកុំអោយប្រជាពលរដ្ឋមានការព្រួយបារម្ភជំងឺប៉េស្តជ្រូកអាហ្វ្រិកមិនឆ្លងមកមនុស្សទេ ដែលត្រូវបានធ្វើឡើងនៅថ្ងៃទី១៣ ខែសីហានេះ នៅបរិវេណមុខផ្សារចំការគរ ស្ថិតសង្កាត់កំពង់ស្វាយ ក្រុងសិរីសោភ័ណ ។
ក្នុងឱកាសដែលរៀបចំពិសាសាច់ជ្រូកសុវត្ថិភាពនេះ មានលោក អ៊ុ រាត្រី អភិបាលខេត្តបន្ទាយមានជ័យ និងលោក ប៉ាង វណ្ណាសេដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្តបន្ទាយមានជ័យ និងមន្ទីរអង្គភាពពាក់ព័ន្ធប្រជាពលរដ្ឋ និងអាជីវករជាច្រើនបានចូលរួមពិសា ។
លោក ហ៊ុយ តូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យបានមានមតិថា ជាការណែនាំពីឯកឧត្តមរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានអំពាវនាវដល់ប្រជាពលរដ្ឋពិសាសាច់ជ្រូកវិញ ព្រោះជំងឺប៉េស្តជ្រូកអាហ្វ្រិកមិនឆ្លងមកមនុស្សបានទេ ទោះជាយើងបរិភោគក៏មិនឆ្លងដែរ ឬប៉ះពាល់ដល់សុខភាពអ្នកបរិភោគឡើយ ។
លោកបានបញ្ជាក់ថា ក្រោយពេលដែលជំងឺប៉េស្តជ្រូកអាហ្វ្រិកបានឆ្លងរាលដាលនៅប្រទេសភាគខាងកើត ហើយបណ្តាលឆ្លងមកកម្ពុជានៅខេត្តមួយចំនួនជាប់ព្រំដែនខាងកើតក៏ដោយ គឺខេត្តបន្ទាយមានជ័យមិនទាន់មានផ្ទុះជំងឺប៉េស្តជ្រូកអាហ្វ្រិកកើតមាននៅឡើយទេ ហើយមន្ត្រីជំនាញបានធ្វើការទប់ស្កាត់មិនអោយរាលដាលដល់ខេត្តបន្ទាយមានជ័យបានឡើយ ព្រោះមន្ត្រីជំនាញធ្វើការត្រួតពិនិត្យសត្វជ្រូកដែលនាំចូល ។
លោក ហ៊ុយ តូប បានបញ្ជាក់ថា ទោះជាខេត្តបន្ទាយមានជ័យមិនមានផ្ទុះជំងឺប៉េស្តជ្រូកអាហ្វ្រិកក៏ដោយអភិបាលខេត្តបន្ទាយមានជ័យលោក អ៊ុ រាត្រី បានអោយមន្ត្រីជំនាញរៀបចំពិសាសាច់ជ្រូកសុវត្ថិភាពដែលត្រូវបានធ្វើជ្រូកចំនួន១០ក្បាល មានចំនួន៩ក្បាលចំអិនហើយ រៀបចំពិសារួមគ្នាកុំអោយប្រជាពលរដ្ឋមានការភ័យខ្លាច និងព្រួយបារម្ម និង១ក្បាលទៀតវ៉ៃត្រា មន្ត្រីជំនាញ ដើម្បីណែនាំដល់អាជីវករ និងប្រជាពលរដ្ឋបានដឹង និងស្គាល់ជ្រូកដែលកាប់លក់តាមទីផ្សារ គឺជ្រូកដែលធ្វើការត្រួតពិនិត្យពីមន្ត្រីជំនាញទើបអោយកាប់លក់តាមទីផ្សារ ។
លោក អ៊ុ រាត្រី អភិបាលខេត្តបន្ទាយមានជ័យមានប្រសាសន៍ថា ប្រសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសអោយបងប្អូនប្រជាពលរដ្ឋត្រូវបរិភោគសាច់ជ្រូកបន្តទៀតជាធម្មតា ព្រោះមន្ត្រីជំនាញអះអាងថា ជំងឺប៉េស្តជ្រូកអាហ្វ្រិកនេះ មិនឆ្លងមកមនុស្ស ដែលបរិភោគសាច់ជ្រូកឡើយ ព្រោះជំងឺនេះឆ្លងពីសត្វជ្រូកទៅសត្វជ្រូកតែប៉ុណ្ណោះ ។
លោកបានអំពាវដល់បងប្អូនប្រជាពលរដ្ឋកុំអោយមានការព្រួយបារម្ភជំពោះជំងឺបេស្តជ្រូកអា ហ្វ្រិក ព្រោះមន្ត្រីក្រសួងជំនាញបានធ្វើការពិនិត្យ គឺជំងឺនេះឆ្លងពីសត្វជ្រូកទៅសត្វជ្រូកមិនឆ្លងមកមនុស្សឡើយ សូមអោយបងប្អូនបន្តពិសាសាច់ជ្រូកដូចធម្មតា ៕ កែសម្រួលដោយ ៖ សុឃាក់
ចែករំលែកព័តមាននេះ