រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី១៨ មីនា បានអនុញ្ញាតឱ្យអនុរក្សពន្ធនាគារព្រៃសនាំខ្លួនជនជាមេខ្លោង២នាក់បងប្អូនដែលពាក់ព័ន្ធនឹងការលួចលាក់ផលិតគ្រឿងញៀនមកធ្វើការសាកសួរបន្ថែមដើម្បីរកជននៅពីក្រោយ។ ជនទាំង២នាក់នេះម្នាក់ឈ្មោះហុង អេនឌី ភេទប្រុស អាយុ៥១ឆ្នាំ និងម្នាក់ទៀតឈ្មោះហុង រស្មី ភេទប្រុស អាយុ៣២ឆ្នាំ។
ការនាំខ្លួនជនជាប់ពាក់ព័ន្ធនឹងការផលិតនិងជួញដូរគ្រឿងញៀននេះ គឺតាមការបង្គាប់ពីលោកអឿង សៀង ចៅក្រមស៊ើបរបស់សាលាដំបូងរាជធានីភ្នំពេញ តែក្រោយពីសាកសួរពុំមានប្រភពផ្លូវការណាមួយបញ្ជាក់ថា មានលទ្ធផលយ៉ាងណានោះទេ។ ទោះជាយ៉ាងណា បើតាមប្រភពព័ត៌មានឱ្យដឹងថា ករណីនេះគឺលោកចៅក្រមសាកសួរជនត្រូវចោទដើម្បីរកឱ្យឃើញអ្នកនៅពីក្រោយខ្នង។ ការចាត់ការយ៉ាងដូច្នេះ ពីព្រោះគេមិនជឿថា ឈ្មោះហុង អេនឌី និងហុង រស្មី អាចលួចផលិត ឬជួញដូរយ៉ាងធំសម្បើមដោយគ្មានអ្នកនៅពីក្រោយខ្នងនោះទេ។
គួរបញ្ជាក់ថា កាលពីថ្ងៃទី៤ មីនា កន្លងទៅនេះ សមត្ថកិច្ចនគរបាលការិយាល័យប្រឆាំងគ្រឿងញៀនរាជធានីភ្នំពេញ បានចាប់ខ្លួនជនជាប់ចោទពាក់ព័ន្ធនឹងការលួចផលិតគ្រឿងញៀនជាទ្រង់ទ្រាយធំនៅភូមិស្វាយតាអុក សង្កាត់វាលស្បូវ ខណ្ឌមានជ័យ។ ក្នុងពេលភ្លាមៗនោះសមត្ថកិច្ចបានឃាត់ខ្លួនមនុស្សចំនួន៣នាក់ គឺ១-ឈ្មោះហុង អេនឌី ភេទប្រុស អាយុ៥១ឆ្នាំ, ២-ឈ្មោះណៃ ស្រីនី ភេទស្រី អាយុ១៩ឆ្នាំ និង៣-ឈ្មោះណៃ វ៉ាន់ណែត ភេទប្រុស អាយុ១៦ឆ្នាំ ព្រមទាំងរឹបអូសវត្ថុតាងគ្រឿងញៀនប្រមាណជាង៦គីឡូក្រាម រថយន្តទំនើប៤គ្រឿង សម្ភារ និងឧបករណ៍ផលិតមួយចំនួនទៀត។
ក្រោយពីឃាត់ខ្លួនជនជាប់សង្ស័យខាងលើ សមត្ថកិច្ចនគរបាលសន្តិសុខផ្ទៃក្នុងក្រសួងមហាផ្ទៃក៏បានឃាត់ខ្លួនជនពាក់ព័ន្ធជាបន្តបន្ទាប់ទៀត ហើយពួកគេត្រូវបានតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃស ដើម្បីស៊ើបអង្កេតបន្ត និងធ្វើការស្រាវជ្រាវរកជនដែលនៅពីក្រោយខ្នងមុននឹងឈានទៅបើកសវនាការផ្តន្ទាទោសជនដែលត្រូវចោទ។ ក្រោយពីសាកសួររួច ជនដែលត្រូវចោទត្រូវបានអនុរក្សពន្ធនាគារនាំទៅឃុំខ្លួនបណ្តោះអាសន្ននៅពន្ធនាគារព្រៃសវិញ៕
ចែករំលែកព័តមាននេះ