ខេត្តបន្ទាយមានជ័យ ៖ អត្រាជំងឺគ្រុនឈាមនៅខេត្តបន្ទាយមានជ័យក្នុងឆ្នាំ២០១៩នេះ កើនដល់ជាង៣.០០០ករណី ធៀបនឹងឆ្នាំ២០១៨ ដែលមានតែ២០០ករណីប៉ុណ្ណោះ ហើយតំបន់មួយចំនួនដែលឆ្នាំមុនធ្លាប់ផ្ទុះជំងឺគ្រុនឈាម បែរជាឆ្នាំនេះមិនមាន និងតំបន់ដែលមិនធ្លាប់កើតបែរជាកើតមានទៅវិញ ។ នេះបើតាមការលើកឡើងរបស់លោកវេជ្ជបណ្ឌិត កែវ សុភក្ត្រាប្រធានមន្ទីរសុខាភិបាលខេត្ត ថ្លែងនៅក្នុងឱកាសប្រារព្ធយុទ្ធនាការប្រយុទ្ធប្រឆាំងនឹងជំងឺគ្រុនឈាមនៅក្រុងប៉ោយប៉ែត នាព្រឹកថ្ងៃទី៩ ខែសីហា ។
លោកវេជ្ជបណ្ឌិត កែវ សុភក្ត្រា ថ្លែងទៀតថា ផ្អែកលើទិន្ន័យនៃករណីជំងឺគ្រុនឈាមតាមបែបអេពីដេមីសាស្ត្រ ក្នុងឆ្នាំ២០១៩នេះ គឺជាវដ្តនៃការផ្ទុះទ្រង់ទ្រាយធំនៃជំងឺគ្រុនឈាមនៅទូទាំងប្រទេសកម្ពុជា ។ ដោយឡែក នៅខេត្តបន្ទាយមានជ័យ បានចាប់ផ្តើមមានពី៦ករណីនៅសប្តាហ៍ទី១ នៃខែឧសភា ឆ្នាំ២០១៩ រហូតដល់៦៣ករណីនៅសប្តាហ៍ទី២០ និងកើនឡើងរហូតដល់សប្តាហ៍ទី២៧ ចុះបន្តិចនៅសប្តាហ៍ទី២៨ គឺគិតត្រឹមថ្ងៃទី៣០ ខែកក្កដា និងត្រឹមសប្តាហ៍ទី៣០ សរុបទាំងអស់មានចំនួន៣.១៦៤ករណី ក្នុងនោះមាន
ចំនួន១.៩៦១ករណីទៅទទួលសេវានៅខេត្តសៀមរាប ១.២០៣ករណីស្មើនឹង៣៨%ប្រើប្រាស់សេវា ក្នុងខេត្តបន្ទាយមានជ័យ ភាគច្រើនកើតលើកុមារអាយុពី៥ឆ្នាំទៅ១៤ឆ្នាំ ក្នុងនោះសង្កេតឃើញជំងឺគ្រុនឈាមកើតលើមនុស្សពេញវ័យចំនួន៥៨នាក់ ស្មើ២% និងពុំមានករណីស្លាប់ទេ ។
លោកប្រធានមន្ទីរសុខាភិបាលខេត្ត បានបញ្ជាក់ទៀតថា ជាការឆ្លើយតបនឹងស្ថានភាពផ្ទុះ ជំងឺគ្រុនឈាម ក្រុមឆ្លើយតបបន្ទាន់នៃមន្ទីរសុខាភិបាលខេត្ត បានធ្វើការអប់រំសុខភាពតាមរយៈការចាក់ផ្សាយសារអប់រំចល័តនិងនៅតាមមូលដ្ឋានសុខាភិបាល បានអន្តរាគមន៍ដាក់ពង្រាយថ្នាំបាណកឃាត(ដែលគេថាអាបែត)ចំនួនជាង១០តោន ថ្នាំវីតូបាក់១៥០គីឡូក្រាម និងទឹកថ្នាំ ២០០លីត្រ ក្នុងការបាញ់សម្លាប់មួស សម្លាប់ដង្កូវទឹកតាមអាង ពាង និងភាជន៍ទឹកមិនប្រើប្រាស់នៅតាមក្រុង ស្រុកមួយចំនួនដែលមានករណីគ្រុនឈាមខ្ពស់ ចំនួន២៨៤ភូមិ ក្នុង២៨ឃុំ-សង្កាត់ ស្មើនឹងអត្រាគ្របដណ្តប់តែ៤៣%បើធៀបនឹង៦៥ឃុំសង្កាត់ក្នុងខេត្តបន្ទាយមានជ័យ ។
លោក គាត ហ៊ុល អភិបាលក្រុងប៉ោយប៉ែត មានប្រសាសន៍ថា លោកគាំទ្រចូលរួមក្នុងយុទ្ធនាការអប់រំ លុបបំបាត់ជម្រកមូសខ្លាក្នុងការទប់ស្កាត់ជំងឺគ្រុនឈាមនាពេលនេះគឺជាគំរូប្រពៃបំផុត ។ ជាមួយនេះ លោកសំណូមពរដល់ពលរដ្ឋទាំងអស់ ត្រូវចូលរួមប្រកាន់ខ្ជាប់នូវពាក្យថា គ្មានដង្កូវទឹកដោយការលាងសម្អាតវត្ថុដាក់ទឹកប្រើប្រាស់ ដាក់គម្របត្រឹមត្រូវ ចិញ្ចឹមត្រី៧ពណ៌ និងកម្ទេចឲ្យអស់នូវវត្ថុដាក់ទឹកមិនប្រើប្រាស់ក្នុងភូមិឋានរបស់គ្រួសារនីមួយៗ នោះយើងនឹងបញ្ចប់មួសខ្លា បញ្ចប់ជំងឺគ្រុនឈាម ៕
ចែករំលែកព័តមាននេះ