ខេត្តស្វាយរៀង ៖ នាព្រឹកថ្ងៃទី១២ ខែសីហា ឆ្នាំ២០១៩នេះ លោកម៉ែន វិបុល អភិបាលខេត្តស្វាយរៀង បានថ្លែងទៅកាន់មន្ត្រីរាជការ លោកអភិបាលគ្រប់ស្រុក-ក្រុងនៃខេត្តស្វាយរៀងត្រូវចូលរួមផ្សព្វផ្សាយបញ្ជ្រាបដល់ពលរដ្ឋនៅមូលដ្ឋានរបស់ខ្លួនដោយធ្វើការអំពាវនាវដើម្បីឲ្យប្រជាពលរដ្ឋបរិភោគសាច់ជ្រូកឡើងវិញ តបតាមការអំពាវនាវរបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រោះជំងឺប៉េស្តជ្រូកអាហ្វ្រិកមិនឆ្លងដល់មនុស្សទេ គឺឆ្លងតែសត្វជ្រូកគ្នាវាប៉ុណ្ណោះ។
ការថ្លែងរបស់អភិបាលខេត្តស្វាយរៀងបែបនេះនៅក្នុងឱកាសដែលលោកអញ្ជើញជាអធិបតីក្នុងពិធីបរិភោគសាច់ជ្រូកនៅសាលាក្រុងបាវិត
ដែលរៀបចំឡើងដោយមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង ក្រោមប្រធានបទ «ដើម្បីក្តីសង្ឃឹមដល់អ្នកចិញ្ចឹមជ្រូកនិងដើម្បីយើងទាំងអស់គ្នា»។ ការបរិភោគសាច់ជ្រូកនេះគឺឧបត្ថម្ភពីក្រុមហ៊ុនស៊ីភី(CP)ដែលបានខ្វៃជ្រូកចំនួន១០ក្បាល។
ក្នុងឱកាសនោះដែរក៏មានការអញ្ជើញចូលរួមពីសំណាក់លោកជុំ
ហាត ប្រធានក្រុមប្រឹក្សាខេត្ត លោក លោកស្រី ជាសមាជិកក្រុមប្រឹក្សាខេត្ត លោកអភិបាលរងខេត្ត
ប្រធាន-អនុប្រធានមន្ទីរ មន្ត្រីរាជការ លោកអភិបាល អភិបាលរងស្រុក-ក្រុងទាំង៨ លោកស្នងការ ស្នងការរង កងរាជអាវុធហត្ថ ក្រុមអាជីវករក្រុមប្រឹក្សាឃុំសង្កាត់ប្រជាពលរដ្ឋជាច្រើនកុះករ។
លោកថាច់ រតនា ប្រធានមន្ទីរកសិកម្មរុក្ខាប្រម៉ាញ់និងនេសាទខេត្ត
បានមានប្រសាសន៍ថា ដោយមានផ្ទុះជំងឺប៉េស្តជ្រូកអាហ្វ្រិកនៅភូមិឬស្សីជួរខាងត្បូង ឃុំក្រោលគោ
ស្រុកស្វាយជ្រំ ធ្វើឲ្យប្រជាពលរដ្ឋខេត្តស្វាយរៀងភ័យខ្លាចឈប់បរិភោគសាច់ជ្រូកធ្វើឲ្យប៉ះពាល់ដល់អ្នកចិញ្ចឹមជ្រូកជាលក្ខណៈគ្រួសារត្រូវខាតបង់ថវិកា។
លោកថាច់ រតនា បន្តទៀតថា ការផ្ទុះជំងឺប៉េស្តជ្រូកអាហ្វ្រិកនៅភូមិឬស្សីជួរខាងត្បូងនេះបណ្តាលឱ្យជ្រូកងាប់ចំនួន៩៥ក្បាល
និងសម្លាប់ចោល២៥ក្បាល កប់ចោលនិងបាញ់ថ្នាំការពារសុវត្ថិភាពនៅទីតាំងកើតជម្ងឺនេះមានចម្ងាយ១០គីឡូម៉ែត្រពីតំបន់ផ្ទុះជំងឺ
ហើយរហូតមកដល់ពេលនេះជំងឺប៉េស្តជ្រូកអាហ្រ្វិកបានធូរស្រាលវិញហើយយើងគ្រប់គ្រងបាន។
លោកម៉ែន វិបុល អភិបាលខេត្តក៏បានណែនាំដល់មន្ត្រីមន្ទីរកសិកម្មរុក្ខាប្រមាញ់
និងនេសាទ និងមន្ត្រីសមត្ថកិច្ចដែលពាក់ពន្ធ័ទាំងអស់ត្រូវបន្តចុះពិនិត្យរាល់សាច់ជ្រូកដែលនាំចូលមកលក់ក្នុងទីផ្សារឲ្យបានហ្មត់ចត់
ដោយមិនត្រូវឲ្យមានការនាំជ្រូកពីក្រៅប្រទេសមកចូលនៅក្នុងទឹកខេត្តស្វាយរៀងនោះទេ។
បើតាមការបញ្ជាក់ពីលោកថាច់ រតនា ប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀងបានលើកឡើងថា
ការផ្ទុះឡើងនូវជំងឺប៉េស្តជ្រូកអាហ្វ្រិកមកប្រទេសកម្ពុជា
ធ្វើឲ្យបងប្អូនប្រជាពលរដ្ឋនៅក្នុងប្រទេសកម្ពុជាក៏ដូចជានៅក្នុងខេត្តស្វាយរៀងឈប់បរិភោគសាច់ជ្រូក
និងទិញសាច់ជ្រូកនៅក្នុងផ្សារ ដោយភ័យខ្លាចពីជំងឺទាំងនេះឆ្លងមកខ្លួន។
លោកបានបន្តទៀតថា ចំពោះជំងឺប៉េស្តជ្រូកអាហ្វ្រិកនេះ
គឺមិនបណ្ដាលឲ្យឆ្លងមកមនុស្សនោះទេ គឺឆ្លងតែជ្រូកគ្នាវាតែប៉ុណ្ណោះ។
ដូច្នេះសូមបងប្អូនប្រជាពលរដ្ឋនៅទូទាំងប្រទេសកម្ពុជា ក៏ដូចជាពលរដ្ឋនៅខេត្តស្វាយរៀងនាំគ្នាហូបសាច់ជ្រូកជាធម្មតាវិញចុះ
ព្រោះវាមិនឆ្លងដល់មនុស្សទេ ដើម្បីលើកទឹកចិត្តដល់អ្នកចិញ្ចឹមជ្រូកក្នុងស្រុក ។ ម្យ៉ាងទៀត
រាល់ការទិញជ្រូកទៅហូប ត្រូវពិនិត្យមើលសាច់ជ្រូក ដែលមានត្រាពេទ្យសត្វត្រឹមត្រូវ
ចៀសវាងទិញសាច់ជ្រូក ដែលគ្មានត្រាពីពេទ្យសត្វ។ រាល់ការលក់សាច់ជ្រូក នៅលើទីផ្សារ
ត្រូវតែមានវាយត្រាពីពេទ្យសត្វ ទើបបញ្ជាក់ថា សាច់សត្វនោះ
បានពិនិត្យសុខភាពសត្វយ៉ាងត្រឹមត្រូវ ពីមន្ត្រីជំនាញ។
លោកថាច់ រតនា បានឲ្យដឹងទៀតថា ចំពោះខេត្តស្វាយរៀង ដែលមានករណីផ្ទុះនៅភូមិឫស្សីជួរខាងត្បូង ឃុំក្រោលគោ ស្រុកស្វាយជ្រំ ឥឡូវបានស្ងប់ស្ងាត់ទៅវិញហើយ ដោយមានការយកចិត្តទុកពីក្រសួងកសិកម្ម រុក្ខាប្រម៉ាញ់ និងនេសាទចុះផ្សព្វផ្សាយអំពីជំងឺបេស្តជ្រូកអាហ្វ្រិក នៅតំបន់មានឆ្លង អំពីវិធីបង្ការទប់ស្កាត់ និងបានបាញ់ថ្នាំសម្លាប់មេរោគ នៃការរីករាយដាល នៃជំងឺនេះផងដែរ ហើយជំងឺប៉េស្តជ្រូកអាហ្វ្រិក បានសម្លាប់ជ្រូកចំនួន៩៥ក្បាល នៅឃុំក្រោលគោ ៕ (កែសម្រួលដោយ ៖ ធីតា)
ចែករំលែកព័តមាននេះ