ខេត្តព្រះសីហនុ ៖ លោកគួច ចំរើន អភិបាលខេត្តព្រះសីហនុបានព្រមានដល់អ្នកដែលលុបប្រឡាយរបស់រដ្ឋឲ្យបញ្ឈប់ជាបន្ទាន់ ក្នុងចាក់ដីលុបប្រឡាយរបស់រដ្ឋ ហើយអនុញ្ញាតឲ្យក្រុមការងាររបស់រដ្ឋបាលខេត្តធ្វើការគាស់កាយប្រឡាយដែលបានលុបទាំងនោះឡើងវិញ ដើម្បីទុកសម្រាប់ស្ដាទឹកចូលទៅក្នុងប្រឡាយទាំងនោះកុំឲ្យមានគ្រោះទឹកជំនន់កើតឡើងជាបន្តទៀត ។ ការព្រមានរបស់លោកអភិបាលខេត្ត…
ខេត្តព្រះសីហនុ ៖ លោកគួច ចំរើន អភិបាលខេត្តព្រះសីហនុបានព្រមានដល់អ្នកដែលលុបប្រឡាយរបស់រដ្ឋឲ្យបញ្ឈប់ជាបន្ទាន់ ក្នុងចាក់ដីលុបប្រឡាយរបស់រដ្ឋ ហើយអនុញ្ញាតឲ្យក្រុមការងាររបស់រដ្ឋបាលខេត្តធ្វើការគាស់កាយប្រឡាយដែលបានលុបទាំងនោះឡើងវិញ ដើម្បីទុកសម្រាប់ស្ដាទឹកចូលទៅក្នុងប្រឡាយទាំងនោះកុំឲ្យមានគ្រោះទឹកជំនន់កើតឡើងជាបន្តទៀត ។
ការព្រមានរបស់លោកអភិបាលខេត្ត បន្ទាប់ពីមានការរំលោភបំពានមកលើដីប្រឡាយរបស់រដ្ឋ ពីសំណាក់ប្រជាពលរដ្ឋខិលខូចមួយចំនួនដែលជាកត្តាធ្វើឲ្យមានគ្រោះទឹកជំនន់នៅក្នុងខេត្តព្រះសីហនុ ។ ផ្តល់កិច្ចសម្ភាសន៍ជាមួយអ្នកសារព័ត៌មានកាលពីថ្ងៃទី១១ ខែសីហានេះថា ចំ ពោះបញ្ហាសាងសងសំណងនានាទៅលើអូរ ឬប្រឡាយ ឬការចាក់ដី ការធ្វើរបង ទៅលើអូរ ឬ ប្រឡាយរបស់រដ្ឋនេះ គឺលោកបានអំពាវនាវទៅដល់ប្រជាពលរដ្ឋដែលធ្នាប់បានចាក់ដីលុបអូ ប្រឡាយនោះពីមុនមកត្រូវចូលរួមសហការជាមួយរដ្ឋបាលខេត្តក្នុងការកាប់កាយស្ដាឡើងវិញនូវប្រឡាយដែលបានលុបពីមុននោះ ។
លោកបានសង្កត់ធ្ងន់ថា កន្លែងណាដែលលោកអាចធ្វើបានលោកនឹងធ្វើជាបន្ទាន់ ហើយលោកសូមការយោគយល់ពីសំណាក់ប្រជាពលរដ្ឋដែលធ្វើការកាប់កាយស្ដាប្រឡាយឡើងវិញទៅ ប៉ះចំដីរបស់ពលរដ្ឋម្នាក់ណានោះផងដែរ ។ លោកអភិបាលខេត្តបានបញ្ជាក់ថា ៖« ពិតប្រាកដណាស់ ការកាប់កាយនេះក៏អាចប៉ះចំកម្មសិទ្ធិស្របច្បាប់របស់ប្រជាពលរដ្ឋមួយចំនួន ។ ប៉ុន្តែយ៉ាងណាក៏ដោយ ក្រុមការងាររបស់រដ្ឋបាលខេត្តព្រះសីហនុនឹងមិនទៅយកដីធ្លីរបស់ប្រជាពលរដ្ឋណាដែលមានកម្មសិទ្ធិស្របច្បាប់នោះឡើយ ។ ប៉ុន្តែចំពោះមុខត្រូវតែធ្វើការកាប់កាយ ជាបណ្ដោះអាសន្នសិន ដើម្បីបើកមុខទឹកឲ្យហូរសម្រាប់ជាការធានាក្នុងការដោះស្រាយនៅក្នុងរដូវវស្សាជូនដល់ប្រជាពលរដ្ឋនៅទូទាំងក្រុងព្រះសីហនុ» ។
លោកបន្ថែមថា «មួយផ្នែកទៀត គឺថាបងប្អូនប្រជាពលរដ្ឋមួយចំនួន គឺពួកគាត់បានសងសូវសំណងធ្វើរបងនានាចាក់ដីផ្សេងៗ រំលោភចូលទៅលើដីប្រឡាយ, អូរដែលយើងមានដែលយើងបានកំណត់ច្បាស់លាស់ ទុករួចហើយ ។ ចឹងចំណុចនេះ គឺថាក្រុមការងារ គឺត្រូវតែធ្វើការកាប់កាយនៅចំពោះមុខនេះហើយ ដើម្បីធ្វើការដោះស្រាយ ។
ដោយឡែកសំណងជាលំនៅដ្ឋាន គឺប្រសិនបើបងប្អូនមានការយោគយល់ ហើយមានការអនុគ្រោះចំពោះស្ថានការបែបនេះ សូមឲ្យបងប្អូនបើរួមចំណែកបាននូវចំណុច បើអាចកាត់បានចំពោះមុខ សូមឲ្យបងប្អូនបានចូលរួម ដើម្បីយើងខ្ញុំគាស់កាយចេញសម្រាប់ធានាទៅដល់ការំដោះទឹក ហើយច្បាស់លាស់ថា ដាច់ខាតសូមបងប្អូនកុំបន្តបំពានធ្វើការសាងសង ឬក៏ចាក់ដីរំលោភទៅលើអូប្រឡាយនេះជាបន្តទៀត ។ ព្រោះថា គ្រោះថ្នាក់ដែលបង្កធ្វើឲ្យមានការប៉ះពាល់ទៅដល់ប្រជាពលរដ្ឋទូទាំងក្រុងដែលបានបំផ្លិចបំផ្លាញនូវទ្រព្យសម្បត្តិរបស់បងប្អូន ប្រជាពលរដ្ឋប៉ះពាល់ដល់អាយុជីវិត ប្រជាពលរដ្ឋនានាផ្សេងៗទៀត ដែលគិតថាគ្រោះថ្នាក់លើកនេះពិតជាបង្កយ៉ាងធំធេង » ។
ជាមួយគ្នានោះដែរលោកអភិបាលខេត្តក៏បានបញ្ជាក់ថា រហូតមកដល់ពេលនេះស្ថាន ភាពទឹកជំនន់ដែលបានបង្កឡើងដោយសារទឹកភ្លៀងនោះបានស្រកអស់ហើយ ។ សូមបញ្ជាក់ថា កាលពីពេលថ្មីនេះគ្រោះទឹកជំនន់ដោយទឹកភ្លៀងបានវាយប្រហារមកលើក្រុងព្រះសីហនុយ៉ាងខ្លាំង ដែលធ្វើឲ្យមានការខូចខាតរបស់របរ ប្រជាពលរដ្ឋជាច្រើន ព្រមទាំងធ្វើឲ្យមានមនុស្សបាត់បង់ជីវិតផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ