ខេត្តកំពត ៖ បើតាមសេចក្តីរាយការណ៍បឋមបានឱ្យដឹងថា ផ្លូវជាតិលេខ3 និងផ្លូវជាតិលេខ33 ស្ថិតនៅក្នុងខេត្តកំពត ដែលត្រូវបានគេមើលឃើញជាក់ស្ដែងថា កំពុងមានស្ថានភាពដ៏អាក្រក់បំផុត ខណៈពេលផ្លូវទាំង2ខ្សែនេះ កំពុងជួសជុល ស្របពេលមានភ្លៀងធ្លាក់ជាប់ៗគ្នាអស់រយៈពេលជាច្រើនថ្ងៃមកហើយ។
បើតាមលោក ជីង គួង ប្រធានមន្ទីរសាធារណការ និងដឹកជញ្ជូនខេត្តកំពត បានប្រាប់អ្នកយកព័ត៌មានកាលពីព្រឹកថ្ងៃអាទិត្យ ទី១១ ខែសីហានេះថា ផ្លូវដែលមានការខូចខាតខ្លាំងនោះ គឺផ្លូវជាតិលេខ33 ដែលមានចម្ងាយប្រហែលជា8គីឡូប៉ុណ្ណោះ ហើយខាងក្រសួងកំពុងតែធ្វើ ប៉ុន្តែការយឺតយ៉ាវនេះដោយសាតែភ្លៀងជាប់ៗគ្នារយៈពេលជិតមួយខែមកហើយ។
លោនិយាយប្រាប់បន្តថា កន្លងមក មានបងប្អូនយើងបង្ហោះតាមបណ្ដាញក្នុងសង្គមហ្វេសប៊ុកធ្វើការរិះគន់រឿងផ្លូវខូច តែមិនអាចធ្វើឱ្យលឿនខុសបែបបទ បច្ចេកទេសរបស់ខាងជំនាញបានឡើយ។ ហើយអ្នកធ្វើដំណើរក៏អាចដឹងដែរ ព្រោះរយៈពេលប៉ុន្មានថ្ងៃនេះ ភ្លៀងធ្លាក់ជាប់រហូត ជួនពេលខ្លះរណ្ដៅជ្រៅពេក យកគ្រឿងចក្រឈួសឆាយទាំងភ្លៀងរលឹម ដើម្បីជួយសម្រួលដល់អ្នកធ្វើចរាចរណ៍ក៏មាន។
លោកប្រធានមន្ទីរសាធារណការខេត្តប្រាប់ឱ្យដឹងទៀតថា បើតាមការពិនិត្យជាក់ស្ដែង ពីមុនមានរថយន្តឆ្លងកាត់ផ្លូវក្នុងខេត្តកំពតនេះ ជិត1ពាន់គ្រឿងតែប៉ុណ្ណោះក្នុងមួយថ្ងៃ ប៉ុន្តែឥឡូវនេះ យើងបានរកឃើញថា មានរថយន្តដឹកធ្ងន់ និងស្រាលរហូតដល់4ពាន់ទៅ5ពាន់គ្រឿងក្នុងមួយថ្ងៃ។ ហើយប្រភេទរថយន្តទាំងអស់នោះ សុទ្ធតែជាប្រភេទរថយន្តដឹកធ្ងន់។
លោកប្រធានមន្ទីររូបនោះនិយាយថា ខាងមន្ទីរខិតខំសហការគ្នាជាមួយក្រសួង និងធ្វើឱ្យបានលឿន។ ដោយឡែកផ្លូវជាតិលេខ33 ឆ្លងកាត់ភូមិសាស្ត្រខេត្តកែប មានចម្ងាយផ្លូវតែ18គីឡូម៉ែត្រទេ ហើយផ្លូវមានចម្ងាយ18គីឡូម៉ែត្រនោះក៏កំពុងខូចខាតផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ