ការប្រជុំ គឺជារឿងធម្មតាមួយដែលតែងតែកើតមានឡើងនៅគ្រប់ស្ថាប័នការងារ ប៉ុន្តែកិច្ចប្រជុំមិនតែងតែផ្តល់អត្ថប្រយោជន៍ដល់បុគ្គលិកទេ ។ ពេលខ្លះកិច្ចប្រជុំបែរជាខ្ជះខ្ជាយពេលវេលាទៅវិញ ព្រោះតែមិនមានការរៀបចំដិតដល់ច្បាប់ទម្លាប់ច្បាស់លាស់ ឬមានអ្នកចូលរួមតិច ឬច្រើនពេកជាដើម ។ សម្រាប់មហាសេដ្ឋីដែលមានទ្រព្យសម្បត្តិរាប់ប៊ីលានដុល្លារ…
ការប្រជុំ គឺជារឿងធម្មតាមួយដែលតែងតែកើតមានឡើងនៅគ្រប់ស្ថាប័នការងារ ប៉ុន្តែកិច្ចប្រជុំមិនតែងតែផ្តល់អត្ថប្រយោជន៍ដល់បុគ្គលិកទេ ។ ពេលខ្លះកិច្ចប្រជុំបែរជាខ្ជះខ្ជាយពេលវេលាទៅវិញ ព្រោះតែមិនមានការរៀបចំដិតដល់ច្បាប់ទម្លាប់ច្បាស់លាស់ ឬមានអ្នកចូលរួមតិច ឬច្រើនពេកជាដើម ។ សម្រាប់មហាសេដ្ឋីដែលមានទ្រព្យសម្បត្តិរាប់ប៊ីលានដុល្លារ ពួកគេមិនមានពេលក្នុងការចំណាយ ដើម្បីអង្គុយក្នុងកិច្ចប្រជុំដែលមិនមានការរៀបចំបានល្អឡើយ ។ លើសពីនេះទៅទៀតពួកគេមានទម្លាប់ប្រជុំប្លែកៗដែលជួយឲ្យពួកគេសន្សំសំចៃពេលវេលា និងបង្កើនប្រសិទ្ធិភាពការងារក្នុងក្រុមហ៊ុនផងដែរ ។
១. លោក Elon Musk ដែលជានាយកប្រតិបត្តិរបស់ក្រុមហ៊ុន Tesla
លោក Must មានស្តង់ដាខ្ពស់ណាស់ ហើយលោកល្បីឈ្មោះថា ជាចៅហ្វាយដែលបញ្ឈប់ការងារបុគ្គលិក ប្រសិនបើពួកគេមិនអាចសម្រេចកិច្ចការតាមពេលវេលាកំណត់ទេនោះ ។ ដូច្នេះប្រសិនបើអ្នកចូលរួមកិច្ចប្រជុំជាមួយនឹងលោក អ្នកត្រូវតែត្រៀមខ្លួនឲ្យបានដិតដល់ ។
លោកធ្លាប់ផ្ញើអ៊ីម៉ែលមួយទៅកាន់បុគ្គលិកទាំងអស់ថា «សូមឈប់មានកិច្ចប្រជុំធំៗលុះត្រាតែវាផ្តល់អត្ថប្រយោជន៍ដល់មនុស្សទាំងអស់ដែលចូលរួម… សូមកុំមានកិច្ចប្រជុំញឹកញាប់លុះត្រាតែត្រូវដោះស្រាយបញ្ហាសំខាន់… សូមដើរចេញពីបន្ទប់ប្រជុំពេលដែលអ្នកមិនមានអ្វីនិយាយ…។»
២. អ្នកស្រី Sheryl Sanberg ដែលជាអ្នកគ្រប់គ្រងជាន់ខ្ពស់ Facebook
អ្នកស្រី Sandberg ទាមទារឲ្យកិច្ចប្រជុំប្រព្រឹត្តទៅតាមរៀបវារៈច្បាស់លាស់ ។ អ្នកស្រីតែងតែកាន់សៀវភៅកត់ត្រាមួយជាប់ខ្លួនជារៀងរាល់ពេលមានកិច្ចប្រជុំ ហើយអ្នកស្រីសរសេរពីចំណុចដែលត្រូវនិយាយ និងមានលើរបៀបវារៈ ។ ទស្សនាវដ្តី Fortune បានឲ្យដឹងថា អ្នកស្រីនឹងឆូតវាចោលម្តងមួយៗ រួចប្តូរទៅនិយាយពីប្រធានបទដែលមានលើរបៀបវារៈផ្សេងទៀតបន្ទាប់ពីការឆូត ។ កិច្ចប្រជុំនឹងបញ្ចប់ពេលដែលប្រធានបទទាំងអស់ត្រូវបានពិភាក្សាមិនថា វាមានរយៈពេល១ម៉ោង ឬ១០នាទីទេ ។
៣. លោក Steve Jobs ដែលជាអតីតនាយកប្រតិបត្តិរបស់ Apple
លោក Jobs ចូលចិត្តកិច្ចប្រជុំតូចៗ ។ លោកមិនចូលចិត្តទេ ពេលដែលមានមនុស្សច្រើនពេកចូលរួមកិច្ចប្រជុំព្រោះលោកគិតថា មានគំនិតច្រើនពេកក្នុងបន្ទប់តែមួយ ដែលប៉ះពាល់ដល់ភាពងាយស្រួល ។ លោក Jobs នឹងដេញអ្នកដែលមិនមានឈ្មោះក្នុងបញ្ជីចូលរួមកិច្ចប្រជុំចេញ ហើយលោកតែងតែបដិសេធរាល់ការអញ្ចើញចូលកិច្ចប្រជុំដែលមានមនុស្សចូលរួមច្រើនដូចពេលដែលលោកអតីតប្រធានាធិបតី Barack Obama អញ្ជើញលោកឲ្យចូលរួមកិច្ចប្រជុំក្រុមហ៊ុនបច្ចេកវិទ្យាជាដើម ៕ កែសម្រួលដោយ ៖សុឃាក់
ចែករំលែកព័តមាននេះ