រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ក្រុមប្រឹក្សាជំនុំជម្រះសាលាដំបូងរាជធានីភ្នំពេញ នាព្រឹកថ្ងៃទី៩ ខែសីហា ឆ្នាំ២០១៩ បានបញ្ចប់ការសាកសួរដេញដោលលើសំណុំរឿងក្ដីអតីតបុគ្គលិកវិទ្យុអាស៊ីសេរី ២នាក់ និងបានសម្រេចលើកពេលប្រកាសសាលក្រមទៅថ្ងៃទី៣០ ខែសីហា ខាងមុខនេះ ។
ជនជាប់ចោទក្នុងសំណុំរឿងក្តីនេះ មាន លោក អ៊ួន ឈិន និង លោក យាង សុធារិន ហៅ យាង សុជាមេត្តា អតីតអ្នកយកព័ត៌មានវិទ្យុអាស៊ីសេរី ។ ជនជាប់ចោទត្រូវបានចៅក្រមសាលាដំបូងរាជធានីភ្នំពេញ កោះហៅឲ្យចូលខ្លួនមកឆ្លើយបំភ្លឺនៅមុខក្រចកសេះម្តងរួចទៅហើយ កាលពីព្រឹកថ្ងៃទី២៦ កក្កដា ពាក់ព័ន្ធពីបទល្មើសផ្ដល់ព័តិមានឲ្យបរទេស ។
លោក ប្លង់ សុផល ព្រះរាជអាជ្ញារង ដែលជាតំណាងអយ្យការក្នុងអង្គសវនាការ បញ្ជាក់ថា ទោះបីវិទ្យុអាស៊ីសេរី ត្រូវបានផ្អាកបណ្ដោះអាសន្ននៅក្នុងស្រុក ប៉ុន្តែជនជាប់ទាំង២នាក់នៅតែបន្តការផ្ដល់ព័ត៌មានទៅក្រៅប្រទេស ដែលអំពើនេះជាបទល្មើស «ការប្រគល់ឲ្យរដ្ឋបរទេស នូវ ព័ត៌មានជាអាទិ៍ ដែលបង្កឲ្យមានការអន្តរាយដល់ការការពារជាតិ» គប្បីត្រូវផ្ដន្ទាទោសតាមច្បាប់កំណត់ ។
ចំណែកមេធាវីការពារក្ដីឲ្យជនជាប់ចោទ បានច្រានចោលការចោទប្រកាន់របស់តំណាងអយ្យការនេះ ហើយស្នើសុំឲ្យចៅក្រមក្រុមប្រឹក្សាជំនុំជម្រះលើកលែងទោសដល់កូនក្ដីរបស់លោកផងដែរ ។ សវនាការនេះបានធ្វើឡើងនៅចំពោះមុខជនជាប់ចោទឈ្មោះ អ៊ួន ឈិន និង ឈ្មោះ យៀង សុធារិន ហៅ យាង សុជាមេត្តា ទាំងពីរលើក ។ យ៉ាងណាក្តី ជនជាប់ចោទទាំង២នាក់នៅតែបដិសេធរាល់ការចោទប្រកាន់នោះ ដោយអះអាងថា រដ្ឋាភិបាលបានបិទវិទ្យុអាស៊ីសេរី មុនពេលពួកគេត្រូវចាប់ខ្លួនម្ល៉េះ។
សូមរំលឹកថា អាជ្ញាធរមានសមត្ថកិច្ចបានចាប់ឃុំខ្លួនលោក អ៊ួន ឈិន និងលោក យៀង សុធារិន ហៅ យាង សុជាមេត្តា កាលពីពាក់កណ្តាលខែវិច្ឆិកា ឆ្នាំ២០១៧ រួមទាំងរឹបអូសយកសម្ភារៈមួយចំនួន ដោយចោទប្រកាន់ថា បង្កើតស្ទូឌីយូថតចម្រៀងគ្មានការ អនុញ្ញាត ។
ក្រោយបើកការសាកសួរពីសំណាក់ស្ថាប័នអយ្យការ ពួកគេទាំង២នាក់ត្រូវបានចោទប្រកាន់ពីបទ«ប្រគល់ ឲ្យរដ្ឋបរទេសនូវព័ត៌មានជាអាទិ៍ដែលបង្កឲ្យមានការអន្តរាយដល់ការការពារជាតិ » តាម មាត្រា ៤៤៥ នៃ ក្រម ព្រហ្ម ទណ្ឌ ។
ក្រោយជាប់ពន្ធនាគាររយៈពេលប្រមាណជាង៩ខែ ពួកគេទាំងពីរនាក់ត្រូវបានដោះលែងឲ្យ នៅក្រៅឃុំបណ្តោះអាសន្នវិញ នាចុងខែសីហា ឆ្នាំ២០១៨ ។ ក្រៅពីសំណុំរឿងជាប់ចោទផ្ដល់ព័ត៌មានបរទេស លោក អ៊ួន ឈិន និងលោក យាង សុជាមេត្តា នៅជាប់ចោទរឿងក្ដីព្រហ្មទណ្ឌមួយទៀត គឺសំណុំរឿងផលិតវីដេអូរអាសអាភាស ។
ដែលរឿងក្ដីនេះ ត្រូវលើកយកមកបើកសវនាការនៅថ្ងៃទី៩ ខែសីហា ឆ្នាំ២០១៩នេះ តែរឿងក្ដីនោះអង្គសវនាការបានប្រព្រឹត្តទៅដោយអសាធារណៈ ពោលគឺមិនអនុញ្ញាតិសាធារណជន ឬអ្នកសារព័ត៌មានចូលស្តាប់នៅពេលសាកសួរដេញដោលលើជនជាប់ចោទនោះទេ ។ ដែលសំណុំរឿងក្តីទាំង២ នេះ រង់ចាំស្តាប់លទ្ធផលនៃជោគវាសនាពួកគេនៅថ្ងៃទី៣០ ចុង ខែសីហា ខាងមុខនេះ ។ (កែសម្រួលដោយ ៖ បុប្ផា)
ចែករំលែកព័តមាននេះ