ព័ត៌មាន និងមតិយោបល់មានសារៈសំខាន់ណាស់ក្នុងការជួយឲ្យសហគ្រិនធ្វើការសម្រេចចិត្តបានដោយត្រឹមត្រូវ ប៉ុន្តែព័ត៌មានមិនតែងតែងាយស្រួលស្វែងរកឡើយ ។ ដោយហេតុដូចនេះទើបសហគ្រិនមិនអាចប្រកបអាជីវកម្មដោយពឹងផ្អែកតែលើខ្លួន និងបុគ្គលិកខ្លួនឡើយ ។ ពួកគេត្រូវការអ្នកណែនាំដែលអាចផ្តល់មតិយោបល់ត្រង់ៗ ដើម្បីជួយដល់ការធ្វើការសម្រេចចិត្តសំខាន់ៗ។ខាងក្រោមនេះ គឺជាអ្នកណែនាំទាំង៣ប្រភេទដែលសហគ្រិននីមួយៗគួរតែស្តាប់តាម ៖
១. អ្នកណែនាំក្រៅក្រុម៖
ពួកគេអាចជាសមាជិកគ្រួសារ មិត្តភក្តិ វិនិយោគិន ទីប្រឹក្សា ឬគ្រូបង្វឹកជាដើម ។ ពួកគេដើរតួយ៉ាងសកម្មក្នុងការផ្លាស់ប្តូរអ្នក និងអាជីវកម្មរបស់អ្នកពីខាងក្រៅដោយផ្តល់មតិយោបល់យោងតាមបទពិសោធន៍ដែលខ្លួនមាន ។ វាពិតជាមានតម្លៃណាស់ដល់សហគ្រិន ។
ការរកបានអ្នកណែនាំក្រៅក្រុមដែលអាចទុកចិត្តបានត្រូវការពេលវេលា និងកម្លាំងជាច្រើន ហើយសហគ្រិនក៏ត្រូវមានការយល់ដឹងពីខ្លួនឯង និងមានជំនាញស្តាប់បានល្អដែរ ។ អ្នកត្រូវតែបង្ហាញប្រាប់អ្នកណែនាំទាំងនេះថា អ្នកប្តេជ្ញាស្រូបយក និងប្រើចំណេះដឹងដែលទទួលបាន ដើម្បីឆ្លងកាត់ឧបសគ្គនានា ។
២. អ្នកណែនាំក្នុងក្រុម៖
ក្រុមការងារដែលមានសមត្ថភាពខ្ពស់ និងគួរឲ្យទុកចិត្ត គឺប្រៀបបានជាសសរដ៏រឹងមាំនៃអាជីវកម្មនីមួយៗ ។ ប្រសិនបើអ្នកអាចបង្កើតបានក្រុមការងារដែលល្អមួយនោះពួកគេក៏អាចជាអ្នកណែនាំអ្នកដែលបង្រៀនជំនាញផ្សេងៗ និងផ្តល់ចំណេះដឹងដល់អ្នកបន្ថែមដែរ ។ ប្រាកដណាស់ លទ្ធផលនេះអាចកើតមានឡើងបានលុះត្រាតែអ្នកយកចិត្តទុកដាក់ក្នុងការស្វែងរកមនុស្សដែលមានសមត្ថភាព និងមានភាពក្លាហានក្នុងការវិនិយោគលើធនធានមនុស្សរបស់អ្នក ។
៣. អតិថិជន៖
អតិថិជនរបស់អ្នកក៏ជាអ្នកណែនាំដែលអ្នកត្រូវតែស្តាប់ដែរ ។ តើអ្នកមានដែលសួរពីមតិយោបល់របស់អតិជនអ្នកទេ ? តើអ្នកយកព័ត៌មានដែលប្រមូលបានទៅធ្វើអ្វីខ្លះ ? តើអតិថិជនរបស់អ្នកផ្តល់តម្លៃលើអ្វីជាងគេ ? តើកត្តាអ្វីដែលជំរុញឲ្យអតិថិជនអ្នកជ្រើសយកអ្នក ? តើកត្តាអ្វីដែលធ្វើឲ្យពួកគេស្ទាក់ស្ទើរក្នុងការជ្រើសយកអ្នក ?
ទាំងនេះ គឺជាសំណួរដែលមិនងាយឆ្លើយទេ ហើយអ្នកត្រូវចំណាយពេល និងកម្លាំងច្រើនលើការស្ទង់មតិ និងធ្វើបទសម្ភាសន៍មនុស្សជាច្រើន ។ ប៉ុន្តែមតិយោបល់របស់ពួកគេមានតម្លៃណាស់ ក្នុងការធ្វើឲ្យផលិតផល ឬសេវាកម្មរបស់អ្នកកាន់តែប្រសើរឡើង ហើយវាក៏ជួយផ្តល់ជាព័ត៌មានដ៏សំខាន់ក្នុងការសម្រេចចិត្តនានាដែរ ៕ កែសម្រួលដោយ ៖ សុឃាក់
ចែករំលែកព័តមាននេះ