ប្រទេសវៀតណាម-ចិន ៖ នាវាមួយក្រុមរបស់ចិនបានចាកចេញពីតំបន់សេដ្ឋកិច្ចដាច់មុខរបស់វៀតណាម ក្នុងសមុទ្រចិនខាងត្បូងហើយ ដែលនោះជាការបញ្ចប់រយៈពេល១ខែនៃការប៉ះទង្គិចគ្នាខាងការទូត ទាក់ទិននឹងដែនទឹកនោះដែលសម្បូរដោយធនធាន ទាមទារដោយប្រទេសទាំង២និងប្រទេសឯទៀតៗនៅអាស៊ីអាគ្នេយ៍។
នាវាស្រាវជ្រាវរបស់ផ្នែកភូគម្ភសាស្ត្រចិនអមដោយនាវាជាច្រើនគ្រឿងទៀត បានចាប់ផ្ដើមពីថ្ងៃទី៣កក្កដាមក នូវបេសកកម្មស្រាវជ្រាវមួយ នៅជុំវិញប្រជុំកោះSPRATLEYS ដែលបណ្ដាលឲ្យវៀតណាម សហរដ្ឋអាមេរិកនិងសហភាពអឺរ៉ុបមានការខឹងសម្បា ដោយចាត់ទុកថានោះជាសកម្មភាពឈ្លានពានមួយ។
ក្រុងហាណូយអះអាងនាថ្ងៃទី៨សីហាថា បណ្ដានាវាចិនទាំងនោះ បានចាកចេញពីតំបន់សេដ្ឋកិច្ចដាច់មុខរបស់ខ្លួនក្នុងសមុទ្រចិនខាងត្បូង ក្រោយការតវ៉ាផ្ទួនៗរបស់ខ្លួនមក។ អ្នកនាំពាក្យក្រសួងការបរទេសវៀតណាម លោកស្រីTHI THU HANGថ្លែងទៅកាន់សារព័ត៌មានថា នាថ្ងៃទី៧សីហាកងនាវាHAIYANG8របស់ចិន បានបញ្ចប់ប្រតិបត្តិការស្រាវជ្រាវភូគម្ភសាស្ត្ររបស់ខ្លួន ហើយចាកចេញពីតំបន់សេដ្ឋកិច្ចដាច់មុខរបស់វៀតណាមហើយ។ លោកស្រីបន្តថា វៀតណាមបានបង្ហាញពីសុឆន្ទៈរបស់ខ្លួននិងស្វែងរកការចរចាជាមួយបណ្ដាប្រទេសដែលទាក់ទិនដើម្បីដោះស្រាយជម្លោះ។
ក្រុងប៉េកាំងមិនបានអះអាងពីវត្តមាននៃកងនាវាខ្លួនក្នុងតំបន់នោះឡើយ។ ចិនដោយសំអាងពីវត្តមានដ៏ចំណាស់បំផុតរបស់ខ្លួន ក្នុងតំបន់ដែលមានជម្លោះនោះជាមួយប្រទេសជាច្រើនមានវៀតណាម ហ្វ៊ីលីពីន ម៉ាឡេស៊ី និងព្រុយណេ លើកពីអធិបតេយ្យភាពរបស់ខ្លួន លើបណ្ដាកោះនៃតំបន់សមុទ្រដ៏ធំទូលាយនោះ ដែលចិនទាមទារស្ទើរទាំងស្រុង តំបន់សមុទ្រចិនខាងត្បូងជាផ្លូវសមុទ្រធ្វើពាណិជ្ជកម្មសំខាន់មួយនៃពិភពលោក។ ក្រុងប៉េកាំងបានបង្កើនវត្តមានយោធានៅទីនោះដោយដាក់ពង្រាយបណ្ដានាវាចម្បាំងនិងបង្កើតប៉ុស្តិ៍ជួរមុខនានា។
ពេលមកកាន់ប្រទេសថៃកាលពីសប្ដាហ៍មុនរដ្ឋមន្ត្រីការបរទេសអាមេរិក លោកMIKE POMPEO បានស្នើដល់បណ្ដាប្រទេសអាសីុអាគ្នេយ៍ឲ្យប្រឆាំងនឹងទង្វើនោះរបស់ចិន។ មុននេះសហរដ្ឋអាមេរិកបានអំពាវនាវឲ្យក្រុងប៉េកាំងបញ្ចប់ការវាតទីរបស់ខ្លួនក្នុងតំបន់នេះ៕ (កែសម្រួលដោយ ៖ បុប្ផា)
ចែករំលែកព័តមាននេះ