បំរាមគោចរត្រូវបានដាក់កាលពីយប់ថ្ងៃទី២២ មក២៣ មីនា នៅទីក្រុងអៅហ្គាឌូហ្គូ រដ្ឋធានីបួគីណាហ្វាសូ ដែលនៅទីនោះប្រភពយោធាមួយលើកឡើងពីចលនាតវ៉ាមួយផ្ទុះចេញពីពួកទាហានមួយក្រុម ។
មានការបាញ់តគ្នារយៈពេលជាង៣ម៉ោង រវាងកងយោធា២ក្រុម មួយក្រុមស្ថិតក្នុងទីក្រុងអៅហ្គាឌូហ្គូ និងមួយក្រុមទៀតនៅជាយក្រុង
នេះ។ ស្ថានីយចាក់ប្រេងទាំងឡាយមានការចូលប្លន់ ហើយវិថីនានាហាក់ដូចជាស្ងាត់ជ្រងំកាលពីរសៀលថ្ងៃទី២៣ មីនា ។ រាល់អគាររដ្ឋបាលនៅតែបិទទ្វារក៏ដូចហាងទាំងឡាយនៃទីផ្សារសំខាន់របស់រដ្ឋធានី។
រដ្ឋមន្ត្រីការពារប្រទេសបួគីណាហ្វាសូ លោក YERO BOLY ដែលពុំបានលាតត្រដាងពីប្រភពនៃការបាញ់ប្រហារទាំងនោះបណ្តាលឱ្យមនុស្ស១២នាក់ត្រូវរបួសបានធ្វើការអំពាវនាវមួយឱ្យមានភាពស្ងប់ស្ងាត់។ លោក BOLY ពោលថា រដ្ឋាភិបាលអះអាងថា រាល់បញ្ហានឹងលើកទៅពិភាក្សាជាមួយក្រុមផ្សេងៗដើម្បីធ្វើឱ្យសភាពការណ៍វិលទៅរកប្រក្រតីភាពឡើងវិញ។
យោងតាមប្រភពមួយរបស់សេនាធិការដ្ឋានកងទ័ពថា កាំភ្លើងត្រូវបាញ់ចេញដោយពួកទាហានដែលតវ៉ាប្រឆាំងនឹងការកាត់ទោសដាក់គុកទាហាន៥នាក់ដែលជាប់ចោទថា វាយធ្វើបាបជនសីុវិលម្នាក់។
ជាប្រទេសមួយមានប្រជាជន១៥លាននាក់ស្ថិតនៅអាហ្វ្រិកខាងលិចបួគីណាហ្វាសូតែងចៀសផុតពីអស្ថេរភាពតំបន់ ទោះបីជាអាជ្ញាធរបានបិទសាកលវិទ្យាល័យទាំងឡាយនាខែនេះ បន្ទាប់ពីបាតុកម្មហិង្សារបស់ពួកនិស្សិតក៏ដោយ។ ជាប្រទេសផលិតកប្បាសយ៉ាងធំមួយ បួគីណាហ្វាសូរយៈពេលប៉ុន្មានឆ្នាំចុងក្រោយនេះជួបប្រទះនឹងការឡើងថ្លៃខ្ពស់នៃវត្ថុធាតុដើមទាំងឡាយ ៕
ចែករំលែកព័តមាននេះ