ខេត្តព្រៃវែង ៖ លោក ទូច ភក្ត្រា អាយុ៣១ឆ្នាំ ជាអតីតនិស្សិតផ្នែកវិទ្យាសាស្ត្រកសិកម្ម នៅសាកលវិទ្យាល័យភូមិន្ទកសិកម្មចំការដូង បច្ចុប្បន្នជាម្ចាស់កសិដ្ឋានចិញ្ចឹមចង្រិតមួយ នៅភូមិសំរោង…
ខេត្តព្រៃវែង ៖ លោក ទូច ភក្ត្រា អាយុ៣១ឆ្នាំ ជាអតីតនិស្សិតផ្នែកវិទ្យាសាស្ត្រកសិកម្ម នៅសាកលវិទ្យាល័យភូមិន្ទកសិកម្មចំការដូង បច្ចុប្បន្នជាម្ចាស់កសិដ្ឋានចិញ្ចឹមចង្រិតមួយ នៅភូមិសំរោង ឃុំល្វា ស្រុកព្រះ ស្តេច បានប្រាប់កោះសន្តិភាពថា មុខរបរចិញ្ចឹមចង្រិតរបស់លោកកំពុងកាក់កបខ្លាំង ហើយលោកចង់ឱ្យប្រជាកសិករដទៃទៀត ងាកមកចាប់យកមុខរបរនេះ ដូចរូបលោកដែរ ។
លោក ទូច ភក្ត្រា បានឲ្យដឹងថា កសិដ្ឋានចិញ្ចឹមចង្រិតរបស់លោកមានអាងចិញ្ចឹមចង្រិតចំនួន១៨អាង ដែលផ្តល់ប្រាក់ចំណូលបានប្រមាណជា២៥០០ដុល្លារ បើទូទាត់កាត់ប្រាក់ចំណាយលើចំណីចង្រិតរួច ឃើញថា លោកអាចចំណេញបានជាង១ពាន់ដុល្លារដែរ នៅក្នុងរយៈពេលតែ៤៥ថ្ងៃប៉ុណ្ណោះ ក្នុងការងារចិញ្ចឹមចង្រិតនេះ ។ អតីតនិស្សិតផ្នែកវិទ្យាសាស្ត្រកសិកម្មរូបនេះបញ្ជាក់ទៀតថា ដំបូងឡើយលោកបានសាកល្បងចិញ្ចឹមសត្វចង្រឹតនេះ តាយមរយៈមើលតាមវីដេអូក្នុង Youtube និង Facebook ។
ដោយពីដំបូងលោកចិញ្ចឹមសាកល្បងតែអាងតូចៗចំនួន២ប៉ុណ្ណោះ ហើយការចិញ្ចឹមនេះ គឺក្នុងបំណងសម្រាប់តែចែកគ្នាហូបប៉ុណ្ណោះ មិនគិតចិញ្ចឹមលក់ដូរនោះទេ ប៉ុន្តែ១ខែក្រោយមក ការចិញ្ចឹមចង្រិតរបស់លោកទទួលបានផលល្អ ហើយដោយមានការលើកទឹកចិត្តពីបងប្អូនមិត្តភ័ក្ត្រ និងក្រុមគ្រួសារ គួបផ្សំនឹងចំណេះដឹងខាងផ្នែកកសិកម្មផងនោះ លោកក៏សម្រេចចិត្តពង្រីកការចិញ្ចឹមចង្រឹតនេះ ឈានទៅដល់ការធ្វើជាកសិដ្ឋានចិញ្ចឹមចង្រឹតទ្រង់ទ្រាយមធ្យម សម្រាប់លក់ទៅលើទីផ្សារតែម្តង ដោយចាប់ផ្តើមពីដើមខែមេសាកន្លងទៅនេះ ដោយចំណាយទឹកប្រាក់អស់ប្រមាណជាង៤ពាន់ដុល្លារ លើការសាងសង់អាងនិងឧបករណ៍ចិញ្ចឹមចង្រិត ។
ចំពោះវិធីសាស្ត្រនៃការចិញ្ចឹមចង្រិតវិញ អតីតនិស្សិតផ្នែកកសិកម្មរូបនេះថា ចំណីដែលត្រូវដាក់អោយកូនចង្រិតស៊ីថ្ងៃដំបូង គឺកន្ទក់ខ្មុកលាយជាមួយ និងចំណីកូនមាន់ ។ លុះកូនចង្រិតអាយុបានមួយអាទិត្យ ទើបយើងដាក់ស្លឹកឈើរុក្ខជាតិមួយចំនួនឲ្យវាស៊ីដូចជា ស្លឹកចេក ស្លឹកឆៃយ៉ា និងដើមស្មៅយក្សជាដើម។ ដល់
ចង្រឹតមានអាយុបាន២៣ទៅ២៥ថ្ងៃ ទើបយើងចាប់ដក ឈប់ដាក់ចំណីកូនមាន់ទៀតហើយ ដាក់តែកន្ទក់និងស្លឹករក្ខជាតិតែប៉ុណ្ណោះ ធ្វើបែបនេះរហូតដល់៤៥ថ្ងៃទៅ៥០ថ្ងៃ ទើបចង្រឹតអាចចាប់លក់បាន។
ចំពោះការមើលថែរ គឺវាមិនលំបាកណាស់ណាទេ តែយើងចាំបាច់ត្រូវទៅមើល ដាក់ទឹកដាក់ចំណីជារៀងរាល់ថ្ងៃ រហូតដល់ថ្ងៃចាប់លក់។ ហើយការចំណាយគឺអស់តែលើកដំបូងទេ ដូចជាឩបករណ៍ និងពូជចង្រឹត ប៉ុន្តែយើងក៏អាចបានពូជចង្រឹត ពីចង្រិតដែលយើងកំពុងចិញ្ចឹមផងដែរ ព្រោះក្នុងកំឡុងពេល៤៥ថ្ងៃ ចង្រឹតវាពងពី២ទៅ៣ដង ដូច្នេះយើងអាចរក្សារទុកកូននិងពងធ្វើពូជបន្តទៀតបាន។
ការចិញ្ចឹមចង្រឹតនេះ គឺត្រូវចំណាយប្រាក់លើចំណីចង្រិតចន្លោះពី៧០ទៅ៨០ដុល្លារ ក្នុងចង្រិតមួយអាង ដោយចាប់រាប់ពីថ្ងៃដាក់កូនចង្រិតដំបូង រហូតដល់ថ្ងៃប្រមូលផល ហើយចំពោះការលក់វិញ គេអាចលក់បានពី១៣០ទៅ១៥០ដុល្លាក្នុងមួយអាង ហើយក្នុងមួយអាងបានចង្រឹតពី៤០ទៅ៥០គីឡូក្រាម ដោយក្នុង១គីឡូក្រាមលក់បានតម្លៃពី២ ទៅ៣ដុល្លា តែពេលខ្លះអាចលក់បានរហូតដល់៤ដុល្លារក៏មាន វាអាស្រ័យលើតំលៃហាងឆេងទីផ្សារផងដែរ ។ (សម្រួលដោយ៖ ស្រីណា)
ចែករំលែកព័តមាននេះ