តាម​ប្រភព​ព័ត៌មាន The Sun បានឱ្យ​ដឹង​ថា ក្លិប​បិសាច​ក្រហម Manchester United កំពុង​តែ​ចាប់អារម្មណ៍​លើ​កីឡាករ​វ័យក្មេង​ម្នាក់​ទៀត ក្រោយ​ពី​បានឃើញ​បានឃើញ​គេ​លេង​បាន​ល្អ ។
កីឡាករ​ខ្សែបម្រើ​វ័យ​១៩​ឆ្នាំ Hakon Evjen លេង​បាន​យ៉ាង​ល្អ នៅ​រដូវ​កាល​មុន​នេះ​ដែល​ធ្វើ​ឱ្យ​ក្លិប​បិសាច​ក្រហម​ចាប់អារម្មណ៍ ។ គ្រូបង្វឹក​ក្លិប Man Utd លោក Ole Gunnar Solskjaer ធ្លាប់​បាន​បញ្ជូន​មនុស្ស​ឱ្យទៅ​មើល​ការ​ប្រកួត​របស់ FK Bodo/Glimt ជួប​ជាមួយនឹង Stromgodset ដើម្បី​ឃើញ​ការ​លេង​របស់ Evjen ។ នេះ​បើ​យោង​តាម​ព័ត៌មាន TV2 ។

Evjen បាន​ធ្វើ​ឱ្យ​គ្រប់​គ្នា​មានការ​ភ្ញាក់ផ្អើល​ជាមួយនឹង​ការ​ស៊ុត​បាល់​បញ្ចូល​ទី​បាន​២​គ្រាប់ ដែល​ធ្វើ​ឱ្យ​ក្រុម​របស់​ខ្លួន​ឈ្នះ​ក្នុង​លទ្ធផល 3-1 ។ គេ​ក៏​បាន​រក​គ្រាប់​បាល់​បាន​៦​គ្រាប់ ក្នុង​ការ​ប្រកួត​១៤​ដង នៅ​រដូវ​កាល​មុន​ផង​ដែរ ។ អ្វី​ដែល​គួរ​ឱ្យ​ចាប់អារម្មណ៍​គឺ Evjen មិន​បាន​ឆ្លើយ​នឹង​សំនួរ​ឱ្យ​ចំ​ចំនុច​ទេ ពេល​គេ​សួរ​ដេញដោល​ពី​ការ​ទៅ​លេង​ឱ្យ​ក្លិប​បិសាច​ក្រហម ។ គេ​បាន​ឆ្លើយ​ថា​៖ «​ប្រសិនបើ​អ្នក​ចង់​ដឹង​រឿង​នេះ អ្នក​អាច​ទៅ​និយាយ​ជាមួយនឹង​ភ្នាក់ងារ​របស់ខ្ញុំ​បាន​។​»

គួរ​បញ្ជាក់​ផង​ដែរ​ថា នៅ​ប៉ុន្មាន​ថ្ងៃមុន​នេះ Manchester United បាន​ទិញ​យក​កីឡាករ​វ័យក្មេង​ម្នាក់​ដែរ ដែល​ធ្វើ​ឱ្យ​គូប្រជែង​មួយ​ចំនួន​ដូច​ជា Arsenal, Liverpool និង Chelsea មានការ​ខកចិត្ត​យ៉ាង​ខ្លាំង​។ គេ​បាន​ទិញ Hannibal Mejbri ពី​ក្លិប Monaco ក្នុង​តម្លៃ​ខ្លួន​៩.១​លាន​ផោន ៕ កែសម្រួល​ដោយ ៖ សុ​ឃា​ក់