រថយន្តស្ថិតក្នុងចំណោមការទិញសំខាន់ៗដែលកើតមានឡើងក្នុងជីវិតរបស់អ្នក ដូច្នេះអ្នកត្រូវតែមានការប្រុងប្រយ័ត្ន និងធានាថា ខ្លួនពិតជាទិញរថយន្តក្នុងតម្លៃដែលសមរម្យបំផុតពិតមែន ។ ដើម្បីសម្រេចបានគោលដៅនេះអ្នកត្រូវតែចៀសវាងធ្លាក់ចូលក្នុងអន្ទាក់បីធំៗដែលអ្នកលក់រថយន្តតែងតែប្រើ ដើម្បីឲ្យអ្នកចាយវាយច្រើនដែលមានដូចខាងក្រោមនេះ ៖ ១. ជំរុញឲ្យអ្នកទិញរថយន្តដែលផ្តល់ប្រាក់ចំណេញច្រើនៈ…
រថយន្តស្ថិតក្នុងចំណោមការទិញសំខាន់ៗដែលកើតមានឡើងក្នុងជីវិតរបស់អ្នក ដូច្នេះអ្នកត្រូវតែមានការប្រុងប្រយ័ត្ន និងធានាថា ខ្លួនពិតជាទិញរថយន្តក្នុងតម្លៃដែលសមរម្យបំផុតពិតមែន ។ ដើម្បីសម្រេចបានគោលដៅនេះអ្នកត្រូវតែចៀសវាងធ្លាក់ចូលក្នុងអន្ទាក់បីធំៗដែលអ្នកលក់រថយន្តតែងតែប្រើ ដើម្បីឲ្យអ្នកចាយវាយច្រើនដែលមានដូចខាងក្រោមនេះ ៖
១. ជំរុញឲ្យអ្នកទិញរថយន្តដែលផ្តល់ប្រាក់ចំណេញច្រើនៈ
ពេលដែលអ្នកទៅមើលរថយន្តអ្នកគួរតែដឹងពីប្រភេទរថយន្តដែលអ្នកចង់ទិញ ជាមុនសិន បើមិនដូច្នេះទេនោះអ្នកលក់រថយន្តនឹងជំរុញឲ្យអ្នកទិញរថយន្តដែលអាចរកប្រាក់ចំណេញឲ្យពួកគេច្រើន ។
ប្រសិនជាអាចអ្នកគួរតែមានប្រភេទ និងម៉ូដែលរថយន្តក្នុងចិត្តឲ្យបានច្បាស់លាស់សិន ។ ដើម្បីជ្រើសរើសរថយន្តអ្នកគួរតែដឹងថា តើអ្នកត្រូវបើកបរផ្លូវឆ្ងាយ ឬទេ ? តើអ្នកត្រូវការរថយន្តដែលមិនស៊ីសាំងទេ ? តើអ្នកមានបច្ចេកវិទ្យាអ្វីដែលអ្នកចង់បានទេ ? តើអ្នកត្រូវការបាំងក្រោយឬទេ ? លើសពីនេះទៀត អ្នកត្រូវតែកំណត់ថ្លៃរថយន្តដែលអ្នកចង់ទិញឲ្យបានច្បាស់លាស់ ដើម្បីជៀសវាងមិនជ្រើសយករថយន្តដែលមានតម្លៃខ្ពស់ពេក ។
២. ជំរុញឲ្យអ្នកបង់រំលស់ៈ
អ្នកលក់រថយន្តចូលចិត្តបង្វែរអារម្មណ៍អតិថិជនឲ្យចាប់អារម្មណ៍លើការបង់រំលស់រថយន្តដែលមានកម្រិតទាបពីថ្លៃ សរុបរបស់រថយន្តពិតប្រាកដ ។ ទោះជាអ្នកបង់ថ្លៃទាបពីមួយខែទៅមួយខែពិតមែនក្តី អ្នកនៅតែត្រូវខាតបង់ច្រើនព្រោះតែថ្លៃការប្រាក់ដែលអ្នកត្រូវបង់រហូតដល់អស់ ។ ប្រសិនបើអ្នកជ្រើសរើសការបង់រំលស់ អ្នកគួរតែជ្រើសយកផែនការដែលមានរយៈពេលខ្លី ព្រោះអ្នកនឹងត្រូវខាតបង់ថ្លៃការប្រាក់ច្រើន ប្រសិនបើរយៈពេលបង់រំលស់វែង ។
៣. លក់ឧបករណ៍ និងគ្រឿងផ្សេងៗដែលអ្នកមិនត្រូវការៈ
ការលក់មិនទាន់ចប់បន្ទាប់ពីអ្នកប្រគល់លុយដល់ដៃអ្នកលក់ទេ ។ ពេលដែលអ្នកសម្រេចចិត្តទិញរថយន្តណាមួយហើយ អ្នកលក់រថយន្តតែងតែមានតួនាទីក្នុងការផ្សព្វផ្សាយផលិតផលផ្សេងៗដែលក្រុមហ៊ុនលក់ រួមទាំងការធានាបន្ថែមផងដែរ ។ ប្រសិនបើវាមិនមែនជាឧបករណ៍ និងគ្រឿងដែលចាំបាច់សម្រាប់អ្នកទេ អ្នកមិនគួរទិញវាឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ