ខេត្តមណ្ឌលគិរី ៖ ស្ពានដែកដ៏សំខាន់ឆ្លងកាត់អូរទេរប្រវែង៦០ម៉ែត្រតភ្ជាប់រវាងឃុំមេម៉ង់ និងឃុំចុសផ្លាស់ ស្រុកកែវសីមា ដែលជាផ្លូវច្រកសេដ្ឋកិច្ចតែមួយគត់ សម្រាប់ប្រជាពលរដ្ឋឆ្លងទៅទីប្រជុំជន ខេត្តមណ្ឌលគិរី ត្រូវបានទឹកជន់លិចអស់ រយៈពេលជាច្រើនម៉ោងក្រោយមានភ្លៀងមួយមេធំ…
ខេត្តមណ្ឌលគិរី ៖ ស្ពានដែកដ៏សំខាន់ឆ្លងកាត់អូរទេរប្រវែង៦០ម៉ែត្រតភ្ជាប់រវាងឃុំមេម៉ង់ និងឃុំចុសផ្លាស់ ស្រុកកែវសីមា ដែលជាផ្លូវច្រកសេដ្ឋកិច្ចតែមួយគត់ សម្រាប់ប្រជាពលរដ្ឋឆ្លងទៅទីប្រជុំជន ខេត្តមណ្ឌលគិរី ត្រូវបានទឹកជន់លិចអស់ រយៈពេលជាច្រើនម៉ោងក្រោយមានភ្លៀងមួយមេធំ តាំងពីល្ងាចថ្ងៃទី០៦ រហូតដល់ព្រឹកថ្ងៃទី០៧ សីហានេះ ។
លោក យន់ សារ៉ោម ប្រធានមន្ទីរអភិវឌ្ឍន៍ជនបទ ខេត្តមណ្ឌលគិរីបានឲ្យដឹងថា គិតត្រឹមវេលាម៉ោង០៣និង៣៥នាទីរសៀល កម្រិតទឹកនៅជន់លិចលើស្ពានកម្ពស់ជាងកន្លះម៉ែត្រ តែមិនបង្កឲ្យគ្រោះថ្នាក់តួស្ពាននោះទេ ។ លោកប្រធានមន្ទីរបន្តថា ទឹកបានជន់លិចស្ពានតាំងពីវេលាអាធ្រាត្រ ថ្ងៃទី០៦ ឈានចូលថ្ងៃទី០៧ ដោយទឹកបានបន្តជន់ឡើងលិចដល់ផ្លូវលំទីប្រជុំជន ឃុំមេម៉ង់ ផ្ទះសម្បែង និងផលដំណាំរបស់ប្រជាពលរដ្ឋ ដែលបានដាំដុះនៅជិតមាត់អូរទេរ ។
លោក យន់ សារ៉ោម បញ្ជាក់ថា ដោយព្រួយបារម្ភសុវត្ថិភាពប្រជាពលរដ្ឋដែលចាំបាច់ត្រូវធ្វើដំណើរឆ្លងកាត់ស្ពាន និងជៀសវាងមានដើមឈើធំៗហូរតាមទឹកជន់មកពីតំបន់ផ្នែកខាងលើទៅបុកតួស្ពាន លោកបានឲ្យមន្ត្រីជំនាញសហការជាមួយកងកម្លាំងវិស្វកម្មដាក់គ្រឿងចក្រប្រចាំការ ដើម្បីការពារឈើទៅបុកស្ពាន ។
ព័ត៌មានចុងក្រោយដែលកោះសន្តិភាពបាននៅវេលាម៉ោង៤ល្ងាចថ្ងៃទី០៧ ស្ពានដែកបេឡេខាងលើត្រូវបានផ្អាកចរាចរណ៍ជាបណ្តោះអាសន្ន ដោយសារកម្រិតទឹកនៅលើស្ពានបានឡើងដល់កម្ពស់៧តឹក អាចបង្កឲ្យមានគ្រោះថ្នាក់នៅពេលមានមនុស្សឆ្លងកាត់ព្រោះទឹកហូរខ្លាំង ។
សូមបញ្ជាក់ថា នៅស្ទើរពេញផ្ទៃខេត្តមណ្ឌលគិរីមានភ្លៀងធ្លាក់គ្រប់ភូមិស្រុក ខណៈអាកាសធាតុនៅក្រុងសែនមនោរម្យបានធ្លាក់ចុះចន្លោះពី២០អង្សាសេ ទៅ២៤អង្សាសេប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ