រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ជាមន្ត្រីយោធាភូមិភាគទី៥ ដោយសារតែភ្លើងប្រចណ្ឌឆេះរោលរាលដកកាំភ្លើងខ្លីបាញ់ប្រពន្ធ៤គ្រាប់ បណ្តាលឲ្យរងរបួសធ្ងន់ធ្ងរ បង្កឲ្យមានការភ្ញាក់ផ្អើលឡើងកាលពីម៉ោង១១និង៤០នាទីយប់ ថ្ងៃទី០៧ ខែសីហា ឆ្នាំ២០១៩…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ជាមន្ត្រីយោធាភូមិភាគទី៥ ដោយសារតែភ្លើងប្រចណ្ឌឆេះរោលរាលដកកាំភ្លើងខ្លីបាញ់ប្រពន្ធ៤គ្រាប់ បណ្តាលឲ្យរងរបួសធ្ងន់ធ្ងរ បង្កឲ្យមានការភ្ញាក់ផ្អើលឡើងកាលពីម៉ោង១១និង៤០នាទីយប់ ថ្ងៃទី០៧ ខែសីហា ឆ្នាំ២០១៩ ត្រង់ចំណុចក្នុងហាងផឹកស៊ីយីហោ «ទី រ៉ានី» នៅតាមបណ្ដោយផ្លូវរថភ្លើងកែងនិងផ្លូវហាណូយ ស្ថិតក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ។
សេចក្តីរាយការណ៍បន្តថា បុរសមន្ត្រីយោធាជាខ្មាន់កាំភ្លើងខាងលើឈ្មោះ ឆោម ចំណាន ភេទប្រុស អាយុ៣៩ឆ្នាំ ជាមន្ត្រីយោធា រស់នៅភូមិភាគទី៥ ស្នាក់នៅភូមិសាលាដែង ឃុំឬស្សីក្រោក ស្រុកមង្គលបូរី ខេត្តបាត់ដំបង។ ចំណែកឯជនរងគ្រោះជាប្រពន្ធឈ្មោះ ជា បតី អាយុ៣៥ឆ្នាំ មុខរបរលក់ខោអាវនៅផ្សារជិនណាន់ ស្នាក់នៅផ្ទះអត់លេខ ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ។
តាមប្រភពពីស្ត្រីម្នាក់ឈ្មោះថា នួន រ៉ានី ដែលជាម្ចាស់ហាងខាងលើបាប្រាប់ឲ្យដឹងថា គាត់ និងជនសង្ស័យជាមួយនឹងជនរងគ្រោះ គឺជាអ្នករាប់អានគ្នា ហើយកន្លងមកពួកគេឧស្សាហ៍មកផឹកស៊ីនៅក្នុងហាងរបស់គាត់ដែរ ។ លុះនៅម៉ោងប្រមាណ៣ល្ងាច មុនកើតហេតុ ជនសង្ស័យបានបើករថយន្ត១គ្រឿងម៉ាកហាយឡែនឌ័រ ពណ៌ស ពាក់ស្លាកលេខ បន្ទាយមានជ័យ 2A-6753 មកផឹកស៊ីនៅហាងរបស់គាត់តែម្នាក់ឯង។ រហូតដល់ម៉ោង១០យប់ ខណៈជនសង្ស័យស្រវឹងជោកជាំ ស្រាប់តែឃើញជនរងគ្រោះជាប្រពន្ធជិះម៉ូតូ១គ្រឿងម៉ាក YAMAHA JANUS ពណ៌ស្វាយ ពាក់ស្លាកលេខ ភ្នំពេញ1HJ-8167 មកកន្លែងកើតហេតុ និងអង្គុយផឹកស៊ីជាមួយនឹងជនសង្ស័យខាងលើ ។
ប្រភពដដែលបន្តថា លុះដល់ម៉ោងកើតហេតុ ជនរងគ្រោះមិនដឹងជាមានរឿងអ្វីជាមួយនឹងជនសង្ស័យនោះទេ ទើបបានជាជនសង្ស័យដើរទៅយកកាំភ្លើងខ្លី១ដើមម៉ាក K59 ពីក្នុងរថយន្ត រួចក៏បាញ់សំដៅទៅលើជនរងគ្រោះចំនួន៧គ្រាប់ បណ្តាលឲ្យត្រូវជនរងគ្រោះ៤គ្រាប់ ចំដើមដៃខាងឆ្វេង២គ្រាប់ និងចំ.ពោះ២គ្រោះរងរបួសធ្ងន់ធ្ងរ។ ភ្លាមៗនោះក៏ត្រូវម្ចាស់ហាងដឹកតាមរថយន្តយកទៅសង្គ្រោះនៅឯមន្ទីរពេទ្យកាលម៉ែតតែម្តង។
ដោយឡែកជនសង្ស័យ បន្ទាប់ពីបាញ់ប្រហារប្រពន្ធរបស់ខ្លួនរួច ក៏បើករថយន្តខាងលើគេចចេញពីកន្លែងកើតហេតុភ្លាមៗផងដែរ ខណៈពេលនោះ ក៏មានប្រជាពលរដ្ឋរាយការណ៍ជូនសមត្ថកិច្ចមូលដ្ឋានដែលកំពុងជិះល្បាតឲ្យជួយអន្តរាគមន៍តែម្តង ក្រោយមកក៏ត្រូវសមត្ថកិច្ចប្រទះឃើញ និងជិះដេញតាមពីក្រោយរថយន្តរបស់ជនសង្ស័យខាងលើ រួចក៏ធ្វើការស្ទាក់ចាប់ឃាត់ខ្លួន និងដកហូតកាំភ្លើងខ្លី១ម៉ាក K59 នៅត្រង់ចំណុចខាងមុខហ្គែនភ្នំពេញ តាមបណ្ដោយផ្លូវហាណូយ ស្ថិតក្នុងសង្កាត់ឃ្មួញ ខណ្ឌសែនសុខ។
តាមប្រភពពីសមត្ថកិច្ចឱ្យដឹងថា ជនសង្ស័យ និងជនរងគ្រោះគឺបានរៀបការជាមួយគ្នានៅឆ្នាំ២០០៥ និងរស់នៅជាមួយគ្នាមានកូនប្រុសស្រី២នាក់ជាចំណងដៃផងដែរ រហូតដល់ឆ្នាំ២០១៩ជនសង្ស័យក៏ចូលបម្រើក្នុងជួរកងទ័ពដោយឈរជើងនៅតំបន់ភូមិភាគទី៥ ស្ថិតនៅក្នុងខេត្តបាត់ដំបង។ បន្ទាប់មកក្រោយពីជនសង្ស័យជាប្តីបានចូលបំរើការក្នុងជួរកងទ័ពមក ជនរងគ្រោះនិងកូនក៏នាំគ្នាទៅរស់នៅឯណាភ្នំពេញ ដោយប្រកបមុខរបរលក់ដូរនៅឯផ្សារជាងណាន។
ហើយជនរងគ្រោះក៏មានអត្តចរឹកផ្លាស់ប្ដូរខុសធម្មតាធ្វើឲ្យការរស់នៅរវាងជនសង្ស័យ និងជនរងគ្រោះមិនសូវចុះសម្រុងគ្នានោះទេ។ រហូតដល់ថ្ងៃកើតហេតុ ខណៈ ជនសង្ស័យទៅផឹកស៊ីនៅក្នុងហាង រហូតដល់ស្រវឹង រួចក៏បានទេហៅជនរងគ្រោះឱ្យមកផឹកស៊ីជាមួយ បន្ទាប់មកស្រាប់តែជនសង្ស័យកើតចេញជាភ្លើងប្រចណ្ឌ រហូតដកកាំភ្លើងបាញ់៧គ្រាប់ទៅលើជនរងគ្រោះជាប្រពន្ធ បណ្ដាលឲ្យចំចំនួន៤គ្រាប់រងរបួសធ្ងន់ធ្ងរតែម្ដង។
បច្ចុប្បន្នជនសង្ស័យ រួមទាំងវត្ថុតាងត្រូវសមត្ថកិច្ចបញ្ជូនខ្លួនទៅធ្វើការសាកសួរនៅអធិការដ្ឋាននគរបាលខណ្ឌសែនសុខ និងកសាងសំណុំរឿងដើម្បីរង់ចាំធ្វើការបញ្ជូនទៅតុលាការចាត់ការតាមនីតិវិធីជាបន្តទៀត។ (កែសម្រួលដោយ ៖ បុប្ផា)
ចែករំលែកព័តមាននេះ