រាជធានីភ្នំពេញ៖ គណៈកម្មការមូលបត្រកម្ពុជា ហៅថា «គ.ម.ក.» និង គណៈកម្មការមូលបត្រថៃបានព្រមព្រៀងរៀបចំឱ្យមានការចុះអនុស្សរណៈយោគយល់គ្នា ពាក់ព័ន្ធនឹងការបោះផ្សាយលក់មូលបត្រកម្មសិទ្ធិឆ្លងដែន និងផលិតផលឌីប៉ូស៊ីតធើរីរីស៊ីប បន្ថែមលើ MOU ដែលបានចុះហត្ថលេខាក្នុងឆ្នាំ ២០១៤ កន្លងមកក្នុងគោលដៅសម្របសម្រួលឱ្យក្រុមហ៊ុនដែលចុះបញ្ជីលក់មូលបត្រនៅកម្ពុជា និង ថៃ អាចចុះបញ្ជីលក់មូលបត្រឆ្លងដែនជាលើកទី ២ នៅថៃ និងកម្ពុជា ដើម្បីអនុញ្ញាតឱ្យក្រុមហ៊ុនអាចមានលទ្ធភាពទទួលបានហិរញ្ញប្បទានក្នុងទំហំកាន់តែធំ ព្រមទាំងមានសន្ទនីយភាពក្នុងការជួញដូរ ។
នេះបើតាមគណៈកម្មការមូលបត្រកម្ពុជាឱ្យដឹងកាលពីថ្ងៃទី ៥ ខែសីហានេះក្នុងជំនួបពិភាក្សាជាមួយលោកស្រី Ruenvadee Suwanmongkol អគ្គលេខាធិការថ្មីនៃគណៈកម្មការមូលបត្រថៃ ។ គ.ម.ក.គូសបញ្ជាក់ថា «MOU បន្ថែមថ្មីនេះនឹងចែងលម្អិតអំពីតួនាទីក្រុមការងារនិយ័តករទាំងពីរ លើដំណើការ អនុវត្តការចុះបញ្ជីលក់មូលបត្រកម្មសិទ្ធិឆ្លងដែន និងការបោះផ្សាយលក់ផលិតផលឌីប៉ូស៊ីតធើរីរីស៊ីបតាមរយៈការដាក់ចេញនូវគោលការណ៍ណែនាំសម្រាប់ក្រុមហ៊ុនដែលមានបំណងធ្វើការបោះផ្សាយលក់មូលបត្រឆ្លងដែន ។ ក្នុងកិច្ចពិភាក្សានេះ តំណាងធនាគារពិភពលោក (ថៃ) បានបញ្ជាក់ការគាំទ្រដល់កិច្ចសហប្រតិបត្តិការដើម្បីជំរុញឱ្យការងារបោះផ្សាយនេះអាចសម្រេចបានរវាងប្រទេសទាំងពីរ ។ និយ័តករទាំងពីរ គ្រោងនឹងចុះ MOU នេះនៅប្រទេសថៃនៅចុងខែកញ្ញា ឆ្នាំ ២០១៩ ដែលនឹងឆ្លុះបញ្ជាំងពីកិច្ចសហប្រតិបត្តិការកាន់តែជិតស្និតរវាងនិយ័តករប្រទេសទាំងពីរកម្ពុជានិងថៃ» ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជាធ្លាប់មានប្រសាសន៍ថា «ផលិតផលដែលកំពុងដាក់ឱ្យដំណើរការជួញដូរនៅក្នុងផ្សារមូលបត្រកម្ពុជាមានចំនួន ៣ រួមមាន៖ មូលបត្រកម្មសិទ្ធិ ដែលហៅថា ភាគហ៊ុន, មូលបត្របំណុល ឬហៅថាសញ្ញាប័ណ្ណ និងឧបករណ៍និស្សន្ទ» ។ លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាមានប្រសាសន៍ក្នុងកម្មវិធី អាជីវកម្មបង្កើតថ្មីបែបនវានុវត្តិបច្ចេកវិទ្យាកាលពីថ្ងៃទី ៦ ខែសីហាមកនេះថា ផ្សារមូលបត្រកម្ពុជាបានដំណើរការ ៧ ឆ្នាំមកហើយ ។ បច្ចុប្បន្ននេះមានក្រុមហ៊ុនចុះបញ្ជីមានចំនួន ៧ក្រុមហ៊ុន ដែលក្នុងនោះមានក្រុមហ៊ុនចំនួន ៥ បានចុះបញ្ជីភាគហ៊ុន និង ២ ផ្សេងទៀតបានចុះបញ្ជីសញ្ញាប័ណ្ណ ហើយថ្មីៗនេះទៀតធនាគារ ABA ទើបទទួលបានការអនុញ្ញាតពី គ.ម.ក. ដើម្បីបោះផ្សាយលក់មូលបត្របំណុល ហើយនៅពេលដ៏ខ្លីខាងមុខនឹងមានក្រុមហ៊ុនទី ៨ ដែលជាធនាគារពាណិជ្ជដំបូងនឹងមាននៅផ្សារមូលបត្រកម្ពុជា ។
លោកអគ្គនាយកបញ្ជាក់ថា «បើគិតជាទឹកប្រាក់នៃក្រុមហ៊ុនទាំង ៧ ប្រមូលបានពីទីផ្សារមូលបត្រតាមរយៈការបោះផ្សាយលក់បូលបត្រជាសាធារណៈគឺមានប្រមាណ ១៤០ លានដុល្លារអាមេរិក ។ ភាគហ៊ុនទាំងនេះបានដាក់ឱ្យជួញដូរជាសាធារណៈដោយមានទំហំជួញដូរប្រចាំថ្ងៃមានជិត ៣០ ម៉ឺនដុល្លារអាមេរិក នៅឆមាសទី ១ ឆ្នាំ ២០១៩ នេះ» ។ លោកឱ្យដឹងទៀតថា ទឹកប្រាក់ខាងលើនេះវានូវមានទំហំតូចនៅឡើយបើប្រៀបធៀបទៅនឹងប្រទេសជិតខាង តែផ្សារមូលបត្រកម្ពុជានឹងជំរុញការអភិវឌ្ឍទីផ្សារឱ្យរីកចម្រើនប្រហាក់ប្រហែលនឹងប្រជិតខាងកម្ពុជានៅប៉ុន្មានឆ្នាំខាងមុខ ។
លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុធ្លាប់មានប្រសាសន៍ថា «កន្លងមកនេះក្នុងគោលដៅជំរុញការអភិវឌ្ឍផ្សារមូលបត្រនេះ រាជរដ្ឋាភិបាលក៏បានផ្តល់ការលើកទឹកចិត្តផ្នែកពន្ធដារដល់វិនិយោគិន និងក្រុមហ៊ុនដែលចុះបញ្ជីនៅផ្សារមូលបត្រកម្ពុជា ដែលជាផ្នែកមួយចាំបាច់នៃការលើកទឹកចិត្តក្រុមហ៊ុនចុះបញ្ជីនិងជំរុញកំណើននៃវិស័យមូលបត្រ ។ ស្របគ្នានេះដែររាជរដ្ឋាភិបាលកម្ពុជាតាមរយៈអគ្គនាយកដ្ឋានពន្ធដារកំពុងពង្រឹងការអនុវត្តការប្រមូលពន្ធក្នុងគោលដៅបង្កើនចំណូលរដ្ឋ និងកាត់បន្ថយការប្រកួតប្រជែងមិនយុត្តិធម៌ ជាពិសេសរវាងក្រុមហ៊ុនដែលចុះបញ្ជីនៅផ្សារមូលបត្រកម្ពុជា និងក្រុមហ៊ុនដែលនៅខាងក្រៅផ្សារ» ៕ កែសម្រួលដោយ ៖ សុឃាក់
ចែករំលែកព័តមាននេះ