រាជធានីភ្នំពេញ៖ បុរសម្នាក់បានដកប្រាក់តាមវីងអស់រយៈពេលប្រមាណ៥ថ្ងៃមកហើយ លុះពេលយកទៅចាយ ស្រាប់តែលុយ៥០ដុល្លារក្នុងនោះរួមមានក្រដាស១០ដុល្លារចំនួន៣សន្លឹក និងក្រដាស២០ដុល្លារចំនួន១សន្លឹកសុទ្ធជាលុយសែនទាំងអស់ ហើយបុរសម្នាក់នោះបានមកសួរនាំបង្កការភ្ញាក់ផ្អើលនៅកន្លែងវេរលុយវីងទាំងព្រឹក។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកាលពីវេលាម៉ោង១០និង៤០នាទីព្រឹកថ្ងៃទី៧ ខែសីហា ឆ្នាំ២០១៩ នៅកន្លែងវីងយីហោ «វិច្ឆិកាប៊ីធីធី» ស្ថិតនៅតាមផ្លូវលេខ៥៩៨ ក្នុងភូមិទួលពពែ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
ទោះបីជាយ៉ាងណា ពាក់ព័ន្ធនឹងករណីខាងលើ គេពុំដឹងថា លុយសែននោះជាលុយរបស់វីង ឬក៍ជាលុយដែលបុរសនោះដូរហើយមកសួរនាំម្ចាស់វីងឬយ៉ាងណានោះទេ ព្រោះលុយនោះបានដកយកចេញពីវីងរយៈពេល៥ថ្ងៃ តាំងពីថ្ងៃទី២ សីហា ហើយបែរជាបុរសម្នាក់ខាងលើមកអះងអាងថាជាលុយក្លែងក្លាយ (លុយសែន) បែបនេះទៅវិញ ។ នៅព្រឹកកើតហេតុនោះដែរក៍បានផ្អើលដល់នគរបាលប៉ុស្តិ៍ចុះទៅត្រួតពិនិត្យកាមេរ៉ាសុវត្ថិភាព ហើយនាំទៅធ្វើការសាកសួរនៅប៉ុស្តិ៍នគរបាលផងដែរ។
តាមប្រភពពីបុរសម្នាក់ខាងលើឈ្មោះសួន សុភាព អាយុ២២ឆ្នាំ ស្នាក់នៅឃ្លាំងតាមផ្លូវលេខ៥៩៨ សង្កាត់ច្រាំងចំរេះទី២ ខណ្ឌឬស្សីកែវ បានអោយដឹងថា កាលពីវេលាម៉ោងប្រមាណ៣រសៀលថ្ងៃទី២ ខែសីហា គាត់បានមកដកប្រាក់នៅកន្លែងវីងខាងលើនេះ ចំនួន១៥០ដុល្លារ ហើយបានដូរយកលុយខ្មែរចំនួន១០០ដុល្លារ នៅសល់៥០ដុល្លារ ក្នុងនោះក្រដាស១០ចំនួន៣សន្លឹក និងក្រដាស២០ចំនួន១សន្លឹក។ លុះនៅព្រឹកថ្ងៃទី៧ ខែសីហា គាត់ក៍បានយកក្រដាសប្រាក់១០ដុល្លារទៅចាយ ស្រាប់តែជាលុយសែន ហើយគាត់ក៏បានមកសួរនាំកន្លែងវីងថាជាលុយសុទ្ធ ឬក្លែងក្លាយ? ក៏បានផ្អើលទាំងព្រឹកតែម្តង។
នៅព្រឹកនោះដែរ នគរបាលក៏បានចុះទៅសាកសួរ និងសុំម្ចាស់វីងដើម្បីពិនិត្យកាមេរ៉ាសុវត្ថិភាពឃើញថា លុយដែលម្នាក់ខាងលើដកយកទៅជាលុយសុទ្ធ ហើយសមត្ថកិច្ចមានការសង្ស័យថា លុយនោះអាចត្រូវគេលួចដូរ ដោយយកលុយសុទ្ធទៅបាត់ ហើយដាក់លុយសែនចូលនៅក្នុងកាបូបវិញ។
តាមប្រភពពីម្ចាស់វីងបានអោយដឹងថា គាត់បានរកស៊ីដោយសុចរិត មិនបានយកលុយក្លែងក្លែង ឬលុយសែនមកបន្លំនោះទេ ហើយនៅហាងក៏បានដាក់ស្លាកថា «សូមពិនិត្យលុយអោយបានច្បាស់មុនចាកចេញ» ផងដែរ។
បន្ទាប់ពីភ្ញាក់ផ្អើល នគរបាលក៏បានហៅម្ចាស់វីង និងបុរសម្នាក់ខាងលើទៅកាន់ស្នាក់ការប៉ុស្តិ៍ នគរបាល ដោយមានការសង្ស័យខ្លួនឯងថាមានគេលួចដូរយកលុយសុទ្ធទៅបាត់ បុរសម្នាក់ខាងលើក៏បានធ្វើកិច្ចសន្យាចំពោះសមត្ថកិច្ចមិនបានប្តឹងផ្តល់អ្វីនោះទេ ដោយយល់ច្រឡំថាជាក្រដាសប្រាក់ក្លែងក្លាយ (លុយសែន) ហើយបុរសម្នាក់ខាងលើនេះក៏បានវិលត្រឡប់ទៅផ្ទះវិញ៕ (កែសម្រួលដោយ ៖ ធីតា)
ចែករំលែកព័តមាននេះ