ខេត្តបាត់ដំបង ៖ យោងតាមការចុះត្រួតពិនិត្យរបស់មន្ត្រីជំនាញ លើយានយន្តគ្រប់ប្រភេទដែលកំពុងធ្វើចរាចរណ៍លើដងផ្លូវ គឺស្ទើរពាក់កណ្ដាលនៃយានយន្តត្រូវបានពិនិត្យឃើញថា មានកំហុសបច្ចេកទេសលើលិខិតស្នាមដែលមិនបានបំពេញបែបបទត្រឹមត្រូវ តាមលក្ខខណ្ឌនៃច្បាប់កំណត់ ។ នេះបើតាមការអះអាងរបស់មន្ត្រីចរាចរណ៍ដែលបានចូលរួមចុះត្រូតពិនិត្យយានយន្តនៅលើដងផ្លូវ នាពេលកន្លងមក និងរហូតដល់សព្វថ្ងៃនេះ។
លោកឆៃ ច័ន្ទតារា ប្រធានការិយាល័យចរាចរណ៏ជើងគោក នៃស្នងការដ្ឋានខេត្ត បានប្រាប់កោះសន្តិភាពនៅព្រឹកថ្ងៃទី០៧ សីហា ថា យានយន្តនានា ដែលមន្ត្រីជំនាញ ធ្លាប់រកឃើញមានកំហុសបច្ចេកទេស (រថយន្តកែឆ្នៃ) កន្លងមក ពេលនេះ ហាក់មានការកែតម្រូវច្រើន ដែលយើងអាចនិយាយបានថា រថយន្តកែឆ្នៃបែបនេះ នៅមានសេសសល់តិចទូចប៉ុណ្ណោះ ហើយយើងកំពុងធ្វើកិច្ចការនេះបន្តនៅឡើយ ។ ប៉ុន្តែលោកនាយការិយាល័យរូបនេះ ហាក់បានផ្ដោតអំពីកំហុស នៅពេលនេះទៅលើយានយន្តគ្រប់ប្រភេទ ដែលមិនបានបំពេញបែបបទលិខិតស្នាមត្រិមត្រូវតាមលក្ខណៈបច្ចេកទេស ដែលកំណត់ដោយច្បាប់។
លោកឆៃ ច័ន្ទតារា បានបញ្ជាក់ថា បើតាមការត្រូតពិនិត្យរាល់ថ្ងៃនេះ យើងបានរកឃើញយានយន្តគ្រប់ប្រភេទ ស្ទើរពាក់កណ្ដាលនៃរថយន្តដែលបានត្រូតពិនិត្យ គឺខកខានមិនបានបំពេញបន្ត នូវលិខិតស្នាមដែលពាក់ព័ន្ធនឹងលក្ខណៈបច្ចេកទេសយានយន្តនេះ។ ពោលគឺការប្រើប្រាស់ «ឈៀក និង លិខិតធ្វើអាជីវកម្មយានយន្ត ផុតកំណត់»។
ជាក់ស្ដែង នៅថ្ងៃទី០៦ សីហា កម្លាំងចម្រុះត្រូតពិនិត្យយានយន្តលើដងផ្លូវជាតិនានា នៅក្នុងខេត្តបាត់ដំបង ដែលមានកិច្ចសហការរវាងកម្លាំងជំនាញចរាចរណ៏ខេត្ត កម្លាំងកងរាជអាវុធហត្ថ និងមន្ត្រីជំនាញ នៃមន្ទីរសាធារណៈការនិងដឹកជញ្ជូនខេត្ត បានចុះត្រូតពិនិត្យយានយន្តលើកំណាត់ផ្លូវជាតិលេខ៥ ត្រង់ចំណុចភូមិដំបូកខ្ពស់ ឃុំអន្លង់វិលស្រុកសង្កែ។ កម្លាំងចម្រុះនេះ បានត្រូតពិនិត្យលើយានយន្តគ្រប់ប្រភេទប្រមាណ១៥០គ្រឿង ក្នុងនោះមានយានយន្តជិតពាក់កណ្ដាលត្រូវបានរកឃើញថា មានកំហុសបច្ចេកទេសលើលិខិតស្នាមប្រើប្រាសយានយន្ត។
មន្ត្រីជំនាញបាននិយាយថា ម្ចាស់យានយន្តទាំងនេះមានការធ្វេសប្រហែស ដែលនាំឲ្យខកខានមិនបានទៅបំពេញសំណុំឯកសារដែលពាក់ព័ន្ធនឹងការប្រើប្រាសយានយន្តរបស់ខ្លួន។ ដូចជា ការប្រើប្រាស«ឈៀក និង សំបុតធ្វើអាជីវកម្មយានយន្ត» ផុតកំណត់។ល។ ប៉ុន្តែរថយន្តដែលកែឆ្នៃទ្រុង ឬ កែឆ្នៃខុសធាតុដើម យូរៗគេប្រទះឃើញ១គ្រឿង ឬ ២គ្រឿងប៉ុណ្ណោះ។ ពោលមិនមានច្រើនដូចមុនៗទេ គឺម្ចាស់យានយន្តភាគច្រើនបានភ្ញាក់រលឹកកែតម្រូវតាមច្បាប់កំណត់ហើយ ។
លោកឆៃ ច័ន្ទតារា ប្រធានការិយាល័យចរាចរណ៏ជើងគោក បាននិយាយថា យានយន្តទាំងឡាយណាដែលមានកំហុសដូចខាងលើនេះ យើងត្រូវតែធ្វើការផាកពិន័យទៅតាមច្បាប់ ហើយបង្គាប់ឲ្យពួកគេទៅបំពេញបែបបទលិខិតស្នាមយានយន្តឲ្យបានត្រិមត្រូវតាមល័ក្ខខណ្ឌនៃច្បាប់ មុនពេលបន្តធ្វើចរាចរណ៏នៅលើដងផ្លូវ។
បើមិនដូច្នេះទេ មន្ត្រីជំនាញ និងបន្តធ្វើការផាកពិន័យទ្វេដងទៀត បើពិនិត្យឃើញថា រថយន្តដដែលៗនោះ មិនព្រមអនុវត្តតាមការណែនាំរបស់សមត្ថកិច្ច ឬ ឈានដល់ការអនុវត្តតាមច្បាប់ធ្ងន់ធ្ងរតែម្ដង។ ចំពោះយានយន្តទាំងឡាយណាដែលមានកំហុសធ្ងន់ធ្ងរជាងនេះ ក៏ត្រូវបាននាំយកទៅរក្សាទុកបណ្ដោះអាសន្ននៅការិយាល័យជំនាញផងដែរ ដើម្បីអនុវត្តតាមច្បាប់ ។
ដោយឡែក ចំពោះអ្នកបើកបររថយន្តវិញ គឺមានខ្លះៗដែរ ដែលយើងរកថា បើកបរដោយគ្មានប័ណ្ណ បើកបរត្រិមត្រូវ។ ប៉ុន្តែយ៉ាងណា លោកប្រធានការិយាល័យជំនាញរូបនេះ បានបញ្ជាក់ថា កម្លាំងចម្រុះ នៅតែបន្តចុះត្រូតពិនិត្យបច្ចេកទេសលើយានយន្តនេះស្ទើររាល់ថ្ងៃដដែល ដោយចល័តគោលដៅជាប្រចាំ លើផ្លូវជាតិនានា ដែលឆ្លងកាត់ខេត្តបាត់ដំបង ៕ (សម្រួលដោយ៖ ស្រីណា)
ចែករំលែកព័តមាននេះ