រាជធានីភ្នំពេញ ៖ បុរសម្នាក់បើកបររថយន្តមួយគ្រឿងម៉ាកឡិចស៊ីស RX 300 មិនដឹងថាមានរឿងអ្វីនោះទេ ពេលធ្វើដំណើរតាមផ្លូវមកដល់ស្ពានអាកាសស្ទឹងមានជ័យស្រាប់តែដកកាំភ្លើងខ្លីបាញ់ផ្អើលមេឃអស់៣ទៅ៤គ្រាប់ រួចបើករថយន្តគេចខ្លួនបាត់ស្រមោល បង្កអោយមានការភ្ញាក់ផ្អើលកាលពីវេលាម៉ោង៤ទៀបភ្លឺថ្ងៃទី៧ ខែសីហា…
រាជធានីភ្នំពេញ ៖ បុរសម្នាក់បើកបររថយន្តមួយគ្រឿងម៉ាកឡិចស៊ីស RX 300 មិនដឹងថាមានរឿងអ្វីនោះទេ ពេលធ្វើដំណើរតាមផ្លូវមកដល់ស្ពានអាកាសស្ទឹងមានជ័យស្រាប់តែដកកាំភ្លើងខ្លីបាញ់ផ្អើលមេឃអស់៣ទៅ៤គ្រាប់ រួចបើករថយន្តគេចខ្លួនបាត់ស្រមោល បង្កអោយមានការភ្ញាក់ផ្អើលកាលពីវេលាម៉ោង៤ទៀបភ្លឺថ្ងៃទី៧ ខែសីហា ឆ្នាំ២០១៩ នៅលើស្ពានអាកាសស្ទឹងមានជ័យ តាមផ្លូវ២៧១ ក្នុងសង្កាត់ទំនប់ទឹក ខណ្ឌចំការមន ។
តាមសម្តីបុរសម្នាក់សុំមិនបញ្ចេញឈ្មោះបានប្រាប់អោយដឹងថា មុនពេលកើតហេតុ គាត់បានអង្គុយចាំឌុបម៉ូយ នៅម្តុំគល់ស្ពានអាកាសស្ទឹងមានជ័យ ក៏ឃើញបុរសមិនស្គាល់អត្តសញ្ញាណម្នាក់បើកបររថយន្តមួយគ្រឿងម៉ាកឡិចស៊ិស RX៣០០ ពណ៌ស មិនចាំស្លាកលេខ បានធ្វើដំណើរតាមផ្លូវ២៧១ក្នុងទិសដៅពីត្បូងទៅជើង ឡើងស្ពានអាកាសស្ទឹងមានជ័យ លុះមកដល់លើស្ពានមិនដឹងថា អ្នកបើកបររថយន្តខឹងរឿងអ្វីនោះទេ ស្រាប់តែបើកកញ្ចក់រថយន្ត ហើយទាញកាំភ្លើងខ្លីមិនស្គាល់ម៉ាកបាញ់ឡើងលើចំនួន៣ទៅ៤គ្រាប់ បន្ទាប់មកបុរសមិនស្គាល់អត្តសញ្ញាណនោះបានបើករថយន្តចេញទៅបាត់តែម្តង ។
តាមប្រភពដដែលបានបន្តថា បន្តិចក្រោយមក គេឃើញកម្លាំងសមត្ថកិច្ចបានចុះទៅពិនិត្យកន្លែងកើតហេតុ រួចហើយក៍បានរកឃើញនូវសំបកកន្ទុះចំនួន១គ្រាប់ផងដែរ ។
ក្រោយពេលកើតហេតុ សមត្ថកិច្ចបានហៅសាក្សី និងយកសំបកកន្ទុះទៅពិនិត្យ ថាតើជាប្រភេទសម្បកគ្រាប់កាំភ្លើងអ្វីអោយច្បាស់ និងដើម្បីងាយស្រួលស្វែងរកមុខសញ្ញាជនល្មើសដើម្បីយកមកផ្តន្ទាទោសតាមច្បាប់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ