រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា គូស្នេហ៍១គូបានដឹកដៃគ្នាចូលទៅរួមមេត្រីនៅក្នុងផ្ទះសំណាក់ ប៉ុន្តែពេលទៅដល់មិនទាន់ចាប់ផ្ដើមបើកប្រតិបត្តិការនៅឡើយ ព្រោះតែរវល់តែឆ្លៀតបឺតបង្ហុយថ្នាំញៀនយ៉ាងឆ្ងាញ់មាត់មុនសិន ស្រាប់តែកម្លាំងនគរបាលចូលទៅទាន់ក៏ចាប់ខ្លួនទាំង២នាក់តែម្តងបង្កឱ្យមានការភ្ញាក់ផ្អើលកាលពីម៉ោង២រសៀល ថ្ងៃទី៥ ខែសីហា ឆ្នាំ២០១៩ នៅក្នុងបន្ទប់ផ្ទះសំណាក់យីហោ «សំបូរពេជ្រ» ស្ថិតនៅក្នុងភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ។
សេចក្តីរាយការណ៍បន្តថា គូស្នហ៍១គូនោះខាងប្រុសឈ្មោះ លឹម សំអាង អាយុ២៤ឆ្នាំ រស់នៅក្នុងភូមិច្រប ឃុំព្រះនិព្វាន ស្រុកគងពិសី ខេត្តកំពង់ស្ពឺ ចំណែកខាងស្រីហៅស្រីស អាយុ២៥ឆ្នាំ ស្នាក់នៅសង្កាត់ចោមចៅ៣ ។
នគរបាលបានឲ្យដឹងថា នៅមុនកើតហេតុ គូស្នេហ៍វ័យក្មេង១គូនេះ បាននាំគ្នាចូលទៅកាន់ផ្ទះសំណាក់ខាងលើ ដើម្បីរួមមេត្រីជាមួយគ្នាដោយខាងប្រុសនាំយកថ្នាំញៀនទៅជាមួយផងដែរ លុះពេលទៅដល់មិនទាន់គិតរួមមេត្រីសិនទេ បែរជានាំគ្នាសេពគ្រឿងញៀនយ៉ាងឆ្ងាញ់មាត់ទៅវិញ។
នគរបាលបន្តថា ខណៈពេលនោះដោយមានការសហការណ៍ល្អជាមួយម្ចាស់ផ្ទះសំណាក់ ទើបកម្លាំងនគរបាលប៉ុស្តិ៍កាកាប១ ក្រោមការបញ្ជាពីសំណាក់លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានចុះទៅធ្វើការឆែកត្រួតពិនិត្យក៏រកឃើញថ្នាំញៀន១កញ្ចប់ ដបសម្រាប់ជក់ថ្នាំ១ ទើបចាប់ខ្លួនគូស្នេហ៍ទាំង២នាក់នេះតែម្ដង។
ក្រោយពេលចាប់ខ្លួន នគរបាលបាននាំគូស្នេហ៍ទាំង២នាក់នេះ រួមជាមួយវត្ថុតាងទៅសាកសួរនៅប៉ុស្តិ៍កាកាប១ ដើម្បីសាកសួរ និងកសាងសំណុំរឿងបញ្ជូនទៅផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ