ខេត្តស្ទឹងត្រែង ៖ សេចក្តីរាយការណ៍ឱ្យដឹងថា ក្រោមយុទ្ធនាការចុះត្រួតពិនិត្យរោងសិប្បកម្មកែច្នៃឈើគ្រឿងសង្ហារឹមទូទាំងខេត្តស្ទឹងត្រែង ក៏ត្រូវបានគេរកឃើញថា មានរោងសិប្បកម្មជិត២០០កន្លែងគ្មាន
ច្បាប់នោះទេ ។ ទាក់ទិនយុទ្ធនាការបង្ក្រាបនេះ គឺបន្ទាប់ពីគណៈបញ្ជាការឯកភាពខេត្តបានលើកប្រជុំ កាលពីព្រឹកថ្ងៃទី២៩ កក្កដា កន្លងផងដែរ បានរៀបចំកម្លាំងចុះទៅតាមគោលដៅ កាលពីរសៀល រហូត
មកទល់នឹងថ្ងៃទី៦ សីហា នេះ កម្លាំងចម្រុះពិនិត្យរោងសិប្បកម្មកែច្នៃឈើគ្រឿងសង្ហារឹមទូទាំងខេត្តបាន
១៧៦កន្លែង ក្នុងនោះរោងសិប្បកម្មដែលបានចុះបញ្ជីច្បាប់មាន៩កន្លែង និងដេប៉ូលក់ឈើក្រហម២
កន្លែង សរុបមានច្បាប់១១កន្លែង រីឯ១៦៥កន្លែងគ្មានច្បាប់ ។
បើតាមមន្ត្រីអាវុធហត្ថបានបញ្ជាក់ថា ចំនួននេះនិងអាចមានការកើនឡើង ខណៈគណៈកម្មការចម្រុះនៅតែបន្តការរុករករោងសិប្បកម្មកែច្នៃឈើគ្រឿងសង្ហារឹមនេះដដែល ។ ប្រភពពីមន្ត្រីអាវុធហត្ថដដែលថា យុទ្ធ នាការរុករកត្រួតពិនិត្យរោងសិប្បកម្មនេះមិនបោះបង់ឡើយ បើសិនមានរបាយការណ៍ស្តីពីទីតាំងថ្មីនិងបន្តចុះពិនិត្យដដែល។
ពាក់ព័ន្ធការចុះពិនិត្យនេះដែរកម្លាំងគណៈកម្មការចម្រុះដឹកនាំសម្របសម្រួលពីស្ថាប័នអាយ្យការនៃសាលាដំបូងបានធ្វើការអប់រំណែនាំដល់ម្ចាស់សិប្បកម្មផ្តិតមេដៃធ្វើកិច្ចសន្យាបើសិនចង់ប្រកបអាជីវកម្មដដែលតម្រូវអោយទៅចុះបញ្ជីច្បាប់ត្រឹមត្រូវ។ចំណែកសិប្បកម្មដែលស្តុកឈើគ្មានច្បាប់ត្រូវបញ្ជាអោយរឹបអូសទាំងឈើរួមទាំងឧបករណ៍គ្រឿងម៉ាសីុនទាំងអស់ទៅរក្សាទុកនៅខណ្ឌរដ្ឋបាលព្រៃឈើខេត្ត។
នៅក្នុងប្រតិបត្តិត្រួតពិនិត្យរោងសិប្បកម្មនេះដែរគណៈកម្មការចម្រុះបានរកឃើញសិប្បកម្មដែលមានច្បាប់ទាំងអស់បានធ្វើផ្ទុយពីឯកសារច្បាប់ដោយជំនាញរដ្ឋបាលព្រៃឈើចេញប៉េសេកន្លែងខ្លះ៥ម៉ែត្រគូបឯកន្លែងខ្លះ១០ម៉ែត្រគូបសុទ្ធសឹងខុសទៅនឹងយៈថាប្រភេទដែលជម្រុញអោយមានការរឹបអូសជាសម្បត្តិរដ្ឋផងដែររហូតមកទល់នឹងថ្ងៃទី៦សីហានេះឈើដែលបានរឹបអូសនៅមិនទាន់បូកសរុបវាស់វែងនៅឡើយដែរតែបរិមាណចំនួនរាប់រយម៉ែត្រគូប។
ទាក់ទងករណីខាងលើកម្លាំងគណៈកម្មការចម្រុះបានអប់រំដល់ម្ចាស់ទីតាំងទាំងអស់ហើយក៍មានការឃាត់ខ្លួនមនុស្សប្រុសស្រីមួយចំនួនដែលប្រឆាំងមិនព្រមសហការជាមួយសមត្ថកិច្ចតែគេនៅមិនទាន់ដឹងថាមនុស្សទាំងនោះ នឹងប្រឈមផ្លូវច្បាប់យ៉ាងណាឡើយ ។ (សម្រួលដោយ៖ ស្រីណា)
ចែករំលែកព័តមាននេះ