ខេត្តឧត្តរមានជ័យ ៖ កម្លាំងសមត្ថកិច្ចចម្រុះដឹកនាំដោយលោកវរសេនីយ៍ឯក លី ដារិទ្ធ មេបញ្ជាការរងកងរាជអាវុធហត្ថខេត្ត សហការជាមួយលោក ជៀល សុផល នាយសង្កាត់រដ្ឋបាលព្រៃឈើស្រុកត្រពាំងប្រាសាទ…
ខេត្តឧត្តរមានជ័យ ៖ កម្លាំងសមត្ថកិច្ចចម្រុះដឹកនាំដោយលោកវរសេនីយ៍ឯក លី ដារិទ្ធ មេបញ្ជាការរងកងរាជអាវុធហត្ថខេត្ត សហការជាមួយលោក ជៀល សុផល នាយសង្កាត់រដ្ឋបាលព្រៃឈើស្រុកត្រពាំងប្រាសាទ និងមន្ត្រីបរិស្ថានស្រុក អាជ្ញាធរ និងមន្ត្រីស្ថាប័នពាក់ព័ន្ធជាច្រើនរូបទៀត កាលវេលាម៉ោងប្រមាណ២រសៀលថ្ងៃទី៣ ខែសីហាកន្លងទៅ បានចុះបង្ក្រាបទីតាំងស្តុកឈើមួយកន្លែង ដែលម្ចាស់ឈើបានដឹកយកទៅលាក់ទុកនៅក្រោយផ្ទះប្រជាពលរដ្ឋស្ថិតក្នុងភូមិត្រពាំង ឃុំត្រពាំងប្រាសាទ ស្រុកត្រពាំងប្រាសាទ ។
លោកវរសេនីយ៍ឯក លី ដារិទ្ធ បានឲ្យដឹងថា ដោយមានបទបញ្ជាពីលោកឧត្តមសេនីយ៍ ពុធ សារ៉ាន់ មេបញ្ជាការកងរាជអាវុធហត្ថខេត្ត និងមានការសម្របសម្រួលពីព្រះរាជអាជ្ញាអមសាលាដំបូងខេត្ត ទើបឈានដល់ការចុះបង្ក្រាបទីតាំងខាងលើ ដែលក្រុមឈ្មួញបានដឹកជញ្ជូនឈើពីតំបន់ផ្សេងៗយកទៅលាក់ទុកនៅតាមផ្ទះរបស់ប្រជាពលរដ្ឋ ព្រោះនៅចំណុចដាក់ឈើនេះ មានដើមស្វាយជាច្រើនដែលងាយស្រួលបិទបាំងមិនឲ្យមន្ត្រីជំនាញ និងសមត្ថកិច្ចរកឃើញ ។
លោកបន្តថា ឈើប្រណីតចម្រុះដែលបានរកឃើញនេះមានដូចជា សុក្រំ ត្រសេក កកោះ គ្រញូងស្វា ផ្ចឹក និងនាងខ្មៅ ហើយនៅពេលកម្លាំងសមត្ថកិច្ចចុះបង្ក្រាបទីតាំងស្តុកឈើនេះម្ចាស់ឈើបានគេចខ្លួនបាត់ ។ សមត្ថកិច្ចប្រមូលបានឈើសរុបចំនួន៣៧២ដុំ ហើយបានជួលគោយន្តកន្ត្រៃដឹកយកយកទៅរក្សាទុកនៅស្នាក់ការសង្កាត់រដ្ឋបាលព្រៃឈើស្រុកត្រពាំងប្រាសាទ និងធ្វើការវាស់វែងសរុបចំនួន១៧,៥២ម៉ែត្រគូប ។
គួររំឭកថា នៅភូមិសាស្ត្រស្រុកត្រពាំងប្រាសាទ គេសង្កេតឃើញមានសកម្មភាពដឹកជញ្ជូនឈើប្រណីតជារៀងរាល់យប់ថ្ងៃ ដាក់ចូលទៅតាមរោងសិប្បកម្មកែច្នៃជាច្រើនកន្លែង ៕ (សម្រួលដោយ៖ ស្រីណា)
ចែករំលែកព័តមាននេះ