រាជធានីភ្នំពេញ ៖ មន្ត្រីខុទ្ទកាល័យគណបក្សសម រង្ស៊ី បានបង្ហើបឱ្យដឹងកាលពីព្រឹកថ្ងៃទី២១ មីនា ២០១១ ថា គណបក្សសម រង្ស៊ី មិនមានគម្រោងដាក់សមាជិកណាម្នាក់ជំនួសអាសនៈរបស់លោកសម រង្ស៊ី តំណាងរាស្ត្រមណ្ឌលកំពង់ចាមនោះទេ ហើយថា គណបក្សរក្សាទុកអាសនៈនេះឱ្យនៅទំនេររហូតដោយអះអាងថា លោកសម រង្ស៊ី មិនមែនជាជនឧក្រិដ្ឋនោះទេ ហើយអ្វីដែលលោកសម រង្ស៊ី ធ្វើ គឺដើម្បីប្រទេសជាតិ និងប្រជាជនកម្ពុជា ។
គេមិនអាចទាក់ទងលោកយឹម សុវណ្ណ អ្នកនាំពាក្យគណបក្សសម រង្ស៊ី ដើម្បីសុំការបំភ្លឺទាក់ទិននឹងបញ្ហានេះនៅឡើយទេ ។ មន្ត្រី គ.ជ.ប បានឱ្យដឹងថា លោកសម រង្ស៊ី នឹងត្រូវលុបឈ្មោះចេញពីបញ្ជីបោះឆ្នោត និងលែងមានសិទ្ធិបោះឆ្នោត ឬឈរឈ្មោះឱ្យគេបោះឆ្នោតឱ្យទៀត ហើយចាប់ពីពេលយុទ្ធនាការចុះឈ្មោះបោះឆ្នោតនៅខែកញ្ញាខាងមុខនេះតទៅ ពីព្រោះរដ្ឋសភាបានដកសិទ្ធិជាអ្នកតំណាងរាស្ត្រមណ្ឌលកំពង់ចាម កាលពីថ្ងៃទី១៥ មីនា ២០១១ កន្លងទៅនេះ គឺដូចជាបានបញ្ចប់ជីវិតនយោបាយរបស់គាត់អ៊ីចឹង។
គួររំលឹកថា សម្តេចហេង សំរិន ប្រធានរដ្ឋសភាជាតិ ដោយយោងតាមសាលដីការបស់តុលាការកំពូលចុះថ្ងៃទី១ មីនា ២០១១ សម្តេចបានចុះហត្ថលេខានៅលើសេចក្តីប្រកាសកាលពីថ្ងៃទី១៥ មីនា ២០១១ ឱ្យដឹងថា លោកសម រង្ស៊ី ត្រូវបាត់បង់ទាំងស្រុងនូវបុព្វសិទ្ធិ និងសមាជិកភាពជាសមាជិករដ្ឋសភានីតិកាលទី៤
ហើយ ៕
ចែករំលែកព័តមាននេះ