ខេត្តកំពង់ឆ្នាំង ៖ ក្មេងស្រីអាយុជាង១ឆ្នាំម្នាក់ ត្រូវបានគេប្រទះឃើញលង់ទឹកប្រឡាយស្លាប់ កាលពីវេលាម៉ោងជាង៤រសៀលថ្ងៃទី៥ ខែសីហា ឆ្នាំ២០១៩ នៅភូមិសេះស្លាប់ ឃុំឆ្នុកទ្រូ ស្រុកបរិបូរណ៍…
ខេត្តកំពង់ឆ្នាំង ៖ ក្មេងស្រីអាយុជាង១ឆ្នាំម្នាក់ ត្រូវបានគេប្រទះឃើញលង់ទឹកប្រឡាយស្លាប់ កាលពីវេលាម៉ោងជាង៤រសៀលថ្ងៃទី៥ ខែសីហា ឆ្នាំ២០១៩ នៅភូមិសេះស្លាប់ ឃុំឆ្នុកទ្រូ ស្រុកបរិបូរណ៍ ។
ក្មេងស្រីដែលស្លាប់ឈ្មោះ សាត ភីរ៉ា អាយុជាង១ឆ្នាំ រស់នៅជាមួយជីដូន ក្នុងភូមិឃុំកើតហេតុខាងលើ ។
សមត្ថកិច្ចមូលដ្ឋានបានអោយដឹងថា ក្មេងស្រីរងគ្រោះរស់នៅជាមួយជីដូន ដោយម្តាយរបស់ក្មេងស្រីរងគ្រោះបានទៅធ្វើការនៅប្រទេសថៃ ។ នៅមុនពេលកើតហេតុ ជីដូនឈឺក៏ដេកលង់លក់បន្តិច លុះពេលភ្ញាក់ដឹងខ្លួន រកចៅមិនឃើញ ទើបបង្កការភ្ញាក់ផ្អើលដល់អ្នកជិតខាងនាំគ្នាជួយដើររក ស្រាប់តែប្រទះឃើញ ក្មេងស្រីរងគ្រោះលង់ទឹកប្រឡាយស្លាប់បាត់ទៅហើយ ។
តាមប្រភពដដែលបានបន្តថា បន្ទាប់ពីឃើញសពក្មេងស្រីរងគ្រោះរួចហើយ ក្រុមគ្រួសារបានរាយការណ៍ទៅសមត្ថកិច្ចនគរបាលមូលដ្ឋាន ដើម្បីឱ្យចុះមកពិនិត្យ និងកោសល្យវិច្ច័យ ។ បន្ទាប់ពីធ្វើកោសល្យវិច្ច័យរួច សមត្ថកិច្ចបានសន្និដ្ឋានថា ក្មេងស្រីរងគ្រោះពិតជាស្លាប់ដោយសារលង់ទឹកប្រាកដមែន រូចបានប្រគល់សពក្មេងស្រីរងគ្រោះទៅឱ្យក្រុមគ្រួសារធ្វើបុណ្យតាមប្រពៃណី ។
ពាក់ព័ន្ធនឹងករណីខាងលើនេះដែរ កន្លងមកអាជ្ញាធរគ្រប់លំដាប់ថ្នាក់ ទាំងអាជ្ញាធរខេត្តផងដែរ តែងតែអំពាវនាវដល់បងប្អូនប្រជាពលរដ្ឋប្រុងប្រយ័ត្ននៅរដូវវស្សា ព្រោះជាខែទឹកឡើង សូមយកចិត្តទុកដាក់ចំពោះកូនចៅតូចៗ ចៀសវាងមានករណីលង់ទឹកណាមួយកើតចេញពីការធ្វេសប្រហែស ៕ (កែសម្រួលដោយ ៖ ធីតា)
ចែករំលែកព័តមាននេះ