សហរដ្ឋអាមេរិក ៖ បណ្ដាសារព័ត៌មានក្នុងស្រុកគូសបញ្ជាក់ថា ការបាញ់ប្រហារទី៣មួយទៀតកើតមាននៅសហរដ្ឋអាមេរិក ក្នុងរយៈពេលមិនដល់២៤ម៉ោងផង។ ជនមិនស្គាល់មុខម្នាក់នាថ្ងៃទី៤ ខែសីហា ឆ្នាំ២០១៩ បានបាញ់ប្រហារ ក្នុងឧទ្យានមួយនៃទីក្រុងស៊ីកាហ្គោ បណ្ដាលឲ្យមនុស្ស៧នាក់រងរបួស។
ការបាញ់ប្រហារទី៣ កើតមាននៅក្នុងឧទ្យានDOUGLAS PARKស្ថិតក្នុងសង្កាត់WEST SIDE នាវេលាម៉ោង១និង២០នាទីម៉ោងក្នុងស្រុក ខណៈជនមិនស្គាល់មុខម្នាក់បានបាញ់ចេញពីរថយន្តCHEVROLETពណ៌ខ្មៅមួយគ្រឿង។ បណ្ដាអ្នករបួសមាននារី៣នាក់និងបុរស៤នាក់។ យុវជនម្នាក់អាយុ២១ឆ្នាំរបួសធ្ងន់ធ្ងរ។ រួចមួយម៉ោងបន្ទាប់ពីនេះគឺនាវេលាម៉ោង២និង៣០នាទី មានការបាញ់ប្រហារថ្មីមួយទៀតក្នុងសង្កាត់ជិតខាង។ នារី២នាក់ត្រូវគ្រាប់កាំភ្លើង។
នេះជាការបាញ់ប្រហារលើកទី៣ នៅសហរដ្ឋអាមេរិក ក្នុងរយៈពេលតែ២ថ្ងៃដែលបណ្ដាលឲ្យមនុស្សស្លាប់២៩នាក់និងជាង៥០នាក់រងរបួស។ ការបាញ់ប្រហារទីមួយ កើតមាននាថ្ងៃទី៣សីហានៅផ្សារទំនើបមួយនាទីក្រុង EL PASOរដ្ឋតិចសាស់ បណ្ដាលឲ្យមនុស្សស្លាប់២០នាក់ និងរបួស២៦នាក់ក្នុងនោះច្រើននាក់ស្ថិតក្នុងស្ថានភាពធ្ងន់ធ្ងរ។ បន្ទាប់មកមានការបាញ់ប្រហារមួយទៀតនៅក្រុងDAYTONរដ្ឋអូហៃយ៉ូបណ្ដាលឲ្យមនុស្សស្លាប់១០នាក់រួមទាំងខ្មាន់កាំភ្លើងហើយមនុស្ស១៦នាក់រងរបួស។
ក្រោយការបាញ់ប្រហារបង្ហូរឈាមនៅតិចសាស់និងនៅអូហៃយ៉ូ ប្រធានាធិបតីអាមេរិកលោកដូណាក់ត្រាំ អះអាងនាថ្ងៃទី៤ សីហាថា ការចងអាឃាត នឹងមិនឲ្យមានឡើយនៅសហរដ្ឋអាមេរិក។ ប៉ុន្តែផ្ទុះការរិះគន់នានាប្រឆាំងពាក្យពេចន៍ដុតរោលរបស់ប្រធានាធិបតី ដែលពួកអ្នកប្រឆាំងចោទថា នាំឲ្យមានភាពតានតឹងក្នុងប្រទេស។ លោកត្រាំបន្តថាជនបាញ់ប្រហារជាអ្នកមានបញ្ហាសរសៃប្រសាទ។
យុវជនស្បែកសម្នាក់អាយុ២១ឆ្នាំ នាព្រឹកថ្ងៃទី៣សីហា បានបាញ់ប្រហារដោយកាំភ្លើងស្វ័យប្រវត្តិនៅទីក្រុងEL PASOជាទីក្រុងមានពួកហ៊ីសស្ប៉ានិកភាគច្រើន សម្លាប់មនុស្ស២០នាក់ ក្នុងនោះមានជនជាតិម៉ិកស៊ិក៦នាក់។ ប៉ូលិសមូលដ្ឋាននិយាយថា ខ្មាន់កាំភ្លើងរូបនោះនាថ្ងៃទី៤សីហាជាប់ការចោទប្រកាន់ ហើយរូបគេអាចមានទោសប្រហារជីវិត។
នាយប់ថ្ងៃទី៣មកទី៤សីហា យុវជនស្បែកសម្នាក់ទៀតអាយុ២៤ឆ្នាំ បានបាញ់សម្លាប់មនុស្ស៩នាក់ ក្នុងនោះមានប្អូនស្រីរបស់គេម្នាក់ ក្នុងសង្កាត់មានមនុស្សច្រើនកុះករមួយនៃទីក្រុងDAYTONរដ្ឋអូហៃយ៉ូ។ ជននេះត្រូវប៉ូលិសបាញ់សម្លាប់។
ក្រោយសោកនាដកម្មទាំងនេះ លោកត្រាំថ្លែងតាមទូរទ្សន៍ថានឹងពុំមានការចងអាឃាតឡើយនៅក្នុងប្រទេសយើង។ អំពើបែបនេះត្រូវបញ្ឈប់។ លោកត្រាំទទួលស្គាល់ថា ប្រហែលជាគេត្រូវធ្វើអ្វីច្រើនទៀត ដើម្បីតស៊ូប្រឆាំងការឆ្លងរាលដាលនៃអំពើបាញ់ប្រហារ៕ (កែសម្រួលដោយ ៖ បុប្ផា)
ចែករំលែកព័តមាននេះ