ខេត្តកែប ៖ ប្រជាពលរដ្ឋមួយភាគនៅខេត្តកែប ដែលប្រឈមនឹងភាពក្រីក្រ មិនមានលទ្ធភាពទិញទូកសម្រាប់ធ្វើការនេសាទនៅសមុទ្រ បានពួកគាត់បានងាកមកច្នៃធ្វើឧបករណ៍ម្យ៉ាង ដោយអ្នកខ្លះយកកាំបិតកាយដីរកងាវ អ្នកខ្លះយកស្លាបព្រាបាយជីកដី អ្នកខ្លះទៀតធ្វើរនាស់ដែកខ្វារដី និងពលរដ្ឋខ្លះទៀតចងដែកអូសចុះអូសឡើងនៅពេលទឹកសមុទ្រនាចម្ដងៗ ។
ការប្រើឧបករណ៍ជាលក្ខណៈច្នៃបែបនេះ អាចប៉ះងាវនៅក្នុងដីបាតសមុទ្រ ។ បើតាមស្ត្រីម្នាក់ឈ្មោះ ម៉ម វឿន អាយុ៥៣ឆាំ្ន នៅភូមិភ្នំលាវ ឃុំពងទឹក ស្រុកដំណាក់ចង្អើរ និយាយថា ពលរដ្ឋដែលនាំគ្នាមកជីកដី និងយកដែកចងអូសក្នុងសមុទ្រសុទ្ធតែអ្នកក្រីក្រដែលគ្មានទូក ។ ការអូសដែកនេះត្រូវសង្កត់ឲ្យធ្ងន់បន្តិចទើបអាចប៉ះងាវ ហើយអ្នកអូសក៏ត្រូវឈប់រើសងាវសិនដែរ ។ ចំណែកអ្នកជីក និងអ្នកកាយដីបើប៉ះងាវត្រូវរើសយកដែរ ។
អ្នកភូមិភ្នំលាវនិយាយទៀតថា ពេលទឹកនាច ម្ដងៗអ្នកភូមិជាច្រើននាក់បានចុះមកសមុទ្រអស់ ហើយខំស្វែងរកគ្រឿងសមុទ្រក្នុងម្នាក់ៗរកបានពី២ទៅ៥គីឡូក្រាម ។ និយាយដោយឡែក ងាវ នេះ លក់ឲ្យទៅអ្នកទទួលទិញនៅកែប បានតែ៣ពាន់រៀលទេក្នុង១គីឡូក្រាម ហើយលក់បន្តឲ្យភ្ញៀវងាវ១គីឡូក្រាមបាន៨ពាន់ទៅ១មឺុនរៀល ។
គេបានសង្កេតឃើញថា ប្រជាពលរដ្ឋនៅខេត្តកែប មិនមានលទ្ធភាពទិញទូកធ្វើនេសាទបាន ពួកគាត់តែងតែដើររកក្ដាមថ្មនៅក្នុងព្រៃកោងកាង ឬដើររកគ្រឿងសមុទ្រផ្សេងៗទៀតតាមលទ្ធភាពដែលពួកគាត់រកបាន គ្រាន់ដោះស្រាយជីវភាពប្រចាំថ្ងៃ ។ (សម្រួលដោយ៖ ស្រីណា)
ចែករំលែកព័តមាននេះ