ខេត្តកំពង់ស្ពឺ ៖ មនុស្ស៥នាក់ត្រូវបានកងរាជអាវុធហត្ថកំពង់ស្ពឺ ធ្វើការឃាត់ខ្លួន បន្ទាប់ពីក្រុមជនសង្ស័យទាំងនេះបានតាំងខ្លួន អ្នកខ្លះជាមេធាវី អ្នកខ្លះថៅកែក្រុមហ៊ុន អ្នកខ្លះអង្គរក្ស និងម្ចាស់ដីទៀតផង ដែលធាតុពិតសុទ្ធតែរូបភាពបោកប្រាស់…
ខេត្តកំពង់ស្ពឺ ៖ មនុស្ស៥នាក់ត្រូវបានកងរាជអាវុធហត្ថកំពង់ស្ពឺ ធ្វើការឃាត់ខ្លួន បន្ទាប់ពីក្រុមជនសង្ស័យទាំងនេះបានតាំងខ្លួន អ្នកខ្លះជាមេធាវី អ្នកខ្លះថៅកែក្រុមហ៊ុន អ្នកខ្លះអង្គរក្ស និងម្ចាស់ដីទៀតផង ដែលធាតុពិតសុទ្ធតែរូបភាពបោកប្រាស់ ហើយយកប្លង់ដីកូពីមួយសន្លឹកទៅលក់ឱ្យម្ចាស់ដីពិត ទីបំផុតក៏ជាប់ខ្នោះរបស់សមត្ថកិច្ចតែម្តង។
ទោះជាយ៉ាងណា ក្រោយបញ្ចប់ការសាកសួរសមត្ថកិច្ចនឹងបញ្ជូនក្រុមជនសង្ស័យទៅកាន់អយ្យការអមសាលាដំបូងខេត្តចាត់ការបន្ត ក្រោយប្រើល្បិចស៊ីមិនបានសម្រេចរួចមក។ ការឃាត់ខ្លួនមនុស្ស៥នាក់ ក្នុងករណីឆបោកនេះ ធ្វើឡើងកាលពីរសៀលថ្ងៃទី០៤ ខែសីហា ឆ្នាំ២០១៩ នៅជាប់ផ្លូវលេខ៥១ ស្ថិតក្នុងភូមិអំពឹលរូង ឃុំព្រះស្រែ ស្រុកឧដុង្គ ខេត្តកំពង់ស្ពឺ ។
ក្រុមជនសង្ស័យខាងលើរួមមាន ១-ឈ្មោះ នួន វណ្ណា ភេទប្រុស អាយុ៤១ឆ្នាំ មុខរបរបុគ្គលិកក្រុមហ៊ុន សុខរដ្ឋា អចលទ្រព្យ មានទីលំភូមិជើងស្រុក ឃុំជង្រុក ស្រុកគងពិសី ខេត្តកំពង់ស្ពឺ, ២-ឈ្មោះ តន់ សុផាន់ណានិន ភេទស្រី អាយុ៣៥ឆ្នាំ មុខរបរកម្មកររោងចក្រ (ក្លែងជាបងប្អូនម្ចាស់ដី) មានទីលំនៅភូមិព្រៃភក្តី ឃុំព្រៃពួច ស្រុកអង្គស្នួល ខេត្តកណ្តាល, ៣-ឈ្មោះ ភោគ សានិន ភេទប្រុស អាយុ៥៩ឆ្នាំ មុខរបរមិនពិតប្រាកដ មានទីលំនៅភូមិកំបូល សង្កាត់កំបូលខណ្ឌកំបូល រាជធានីភ្នំពេញ, ៤-ឈ្មោះ ច្រឹក ចិត្រា ភេទប្រុស អាយុ៣៨ឆ្នាំ មុខរបរលក់ដូរ មានទីលំនៅភូមិភ្នំពេញថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញ និង៥-ឈ្មោះ ហ៊ាង អេងទ្រី ភេទប្រុស អាយុ៣២ឆ្នាំ មុខរបរមិនពិតប្រាកដ មានទីលំនៅភូមិត្រពាំងជើង ស្រុកសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ប្រភពព័ត៌មានបានឱ្យដឹងថា មុនដំបូងក្រុមជនសង្ស័យបានរៀបគំរោងលក់ដីទំហំ១៧៥.២៥៦ម៉ែត្រការ៉េ ស្ថិតនៅភូមិប្រកិល ឃុំព្រះស្រែ ស្រុកឧដុង្គ ខេត្តកំពង់ស្ពឺ ដែលជាដីមានប្លង់កម្មសិទ្ធិ និងមានម្ចាស់ត្រឹមត្រូវ ដោយមានអ្នកដើរតួជាបងប្អូនម្ចាស់ដី ជាថៅកែក្រុមហ៊ុន ទិញដីជាមេធាវី ជាអង្គរក្ស និងអ្នកបើកឡានទៀងផង។
ក្រោយមកក្រុមជនសង្ស័យក៏បានទាក់ទងទៅបុរសម្នាក់ដោយប្រាប់ថា ខ្លួនមានដីទំហំខាងលើ ចង់លក់ក្នុងតម្លៃថោក (មិនឱ្យមើលឯកសារមុនឡើយ) តែបើមានអ្នកទិញណាហើយចង់ជួបម្ចាស់ផ្ទាល់ ទាល់តែកក់លុយទ្រនាប់ដៃចំនួន៥០.០០០ដុល្លារមកពួកខ្លួនជាមុនសិន ហើយ៤ថ្ងៃក្រោយត្រូវកក់៥០.០០០ដុល្លារទៀត ទើបអាចជួបម្ចាស់ដីបាន។
ប្រភពដដែលបន្តថា ដោយចង់ទិញដី និងមិនអស់ចិត្ត ហើយចង់ស្គាល់ទីតាំងដីផង បុរសរូបនោះសុខចិត្តប្រគល់លុយចំនួន៥០.០០០ដុល្លារទៅកាន់ក្រុមជនសង្ស័យ ដោយមានធ្វើលិខិតប្រគល់ទទួលផងដែរ ។ នៅពេលទៅមើលដី ស្រាប់តែបុរសរូបនោះភ្ញាក់ខ្លួនព្រើត ដោយសារតែទីតាំងនោះជាដីរបស់ខ្លួន ហើយពេលពិនិត្យឯកសារក៏ឃើញឈ្មោះខ្លួនថែមទៀត ទើបប្តឹងឱ្យកងរាជអាវុធហត្ថឃាត់ខ្លួនក្រុមជនសង្ស័យតែម្តង។
ព័ត៌មានពិស្តារនឹងមានផ្សាយនៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ