ខេត្តបាត់ដំបង ៖ យោងតាមព័ត៌មានបឋមបានដឹង នៅព្រឹកថ្ងៃទី០៥ សីហា នេះថា នៅតាមភូមិសាស្ត្រ មួយចំនួននៅក្នុងស្រុកសំឡូត ពេលនេះកំពុងរងនូវជំនន់ទឹកភ្លៀង ដែលធ្វើឲ្យកំណាត់ផ្លូវនៅកន្លែងខ្លះ ត្រូវ កាត់ផ្ដាច់ រីឯស្ពានយោលឆ្លងកាត់ដងស្ទឹងប៉ែកខាងលើៗកំពុងរងការគំរាមកំហែងផងដែរ ដែលធ្វើអ្នក ដំណើរ ឬសិស្សានុសិស្សមិនអាចធ្វើដំណើរបានឡើយ ។
បើតាមប្រភពព័ត៌មាននេះពីស្រុកសំឡូតនៅមុននេះបានឲ្យដឹងថា ជំនន់ទឹកភ្លៀងនាពេលនេះ គេសង្កេត ឃើញបាននិងកំពុងប៉ះទង្កិចខ្លាំងទៅលើភូមិសាស្ត្រនានា នៅក្នុងឃុំតតោក ស្រុកសំឡូត ។ ពេលនេះ កំពុងទឹក ហាក់កំពុងឡើងនៅតាមដងស្ទឹង និងតាមដងអូរនានា ដែលកំពុងគំរាមកំហែងស្ពានយោល «អូរននោង» ឆ្លងកាត់ដងស្ទឹងគ្រញូង ហើយថែមទាំងបានកាត់ផ្ដាច់កំណាត់ផ្លូវថ្នល់ខ្លះៗទៀតផង ។
មន្ត្រីមូលដ្ឋានបានឲ្យដឹងថា ពេលនេះ ស្ពានយោល ឬកំណាត់ផ្លូវមួយចំនួននៅក្នុងឃុំតតោត មិនអាចឲ្យ អ្នកដំណើរឆ្លងកាត់បានទេ។ ប្រភពដដែលបានបញ្ជាក់ថា ជំនន់ទឹកភ្លៀងកាត់ផ្ដាច់ផ្លូវ និងយាយីស្ពាន យោលខាងលើនេះ បានធ្វើសិស្សានុសិស្សត្រូវខកខានទៅប្រលង មន្ត្រីរាជការត្រូវខកខានទៅចូលរួម ប្រជុំនៅសាលាស្រុក ខណ:ប្រជាពលរដ្ឋត្រូវខកខានធ្វើដំណើទៅប្រកបមុខរបរប្រចាំថ្ងៃ ។
អាជ្ញាធរបានបញ្ជាក់ថា ភ្លៀងបានបង្អោរស្ទើរពេញមួយយប់នៅក្នុងស្រុកសំឡូត រហូតមកដល់ព្រឹកថ្ងៃទី ០៥ សីហា នេះមេឃក៏កំពុងភ្លៀងធ្លាក់ ដែលធ្វើឲ្យទឹកស្ទឹងឬអូរ កំពុងជនឡើងមិនឈប់ ។ ដោយឡែក នៅ ក្នុងក្រុងបាត់ដំបង ឬ នៅតាមបណ្ដាស្រុកមួយចំនួនក្នុងខេត្តបាត់ដំបង ពេលនេះភ្លៀងក៏ កំពុងបង្អោរ ជាប់ រហូតដែរ តែទឹកស្ទឹងសង្កែ ហាក់មិនទាន់មានការប្រែប្រូលនៅឡើយទេ។
ប៉ុន្តែយ៉ាងណា ប្រជាពលរដ្ឋ ដែលរស់នៅតាមដងស្ទឹងសង្កែ ប៉ែកខាងលើៗនៃស្រុកសំឡូត គួតែមានការប្រុងប្រយ័ត្ន។ ព្រោះពេលនេះ ទឹកស្ទឹងកំពុងឡើងបណ្ដើរៗដោយសារទឹកភ្លៀង ។ (សម្រួលដោយ៖ ស្រីណា)
ចែករំលែកព័តមាននេះ