តើអ្នកមានដឹងទេថា ខួរក្បាលរបស់អ្នកជះឥទ្ធិពលជាច្រើនលើសុខភាព ភាពជោគជ័យ និងជំនាញផ្សេងៗរបស់អ្នក ? យោងតាមវេជ្ជបណ្ឌិតជំនាញផ្នែកវះកាត់ខួរក្បាល Sanjay Gupta បានឲ្យដឹងថា ការផ្លាស់ប្តូរគំនិតរបស់អ្នកអាចជួយដល់បេះដូង សម្ពាធឈាម និងប្រព័ន្ធការពារក្នុងរាងកាយមនុស្សទៀតផង ។
ដូច្នេះប្រសិនបើអ្នកចង់ក្លាយជាមនុស្សជោគជ័យទាំងក្នុងការសិក្សា ការងារ ឬអាជីវកម្មនោះ អ្នកត្រូវតែផ្លាស់ប្តូរគំនិតរបស់អ្នកឲ្យជួយអ្នកឈានទៅរកភាពជោគជ័យទាំងនោះវិញ ។ ការស្រមើលស្រម៉ៃ ស្ថិតក្នុងចំណោមវិធីសាស្ត្រជាច្រើន ដែលអាចជួយដល់ខួរក្បាលរបស់អ្នកបានព្រោះ អ្នកអាចធ្វើឲ្យក្តីសង្ឃឹមមានរូបរាងដែលអាចមើលឃើញបាន និងឲ្យអ្នកដើរតាម ។
យោងទៅតាមការសិក្សាមួយដែលមានឈ្មោះថា The Future of Memory: Remembering, Imagining and the Brain បានឲ្យដឹងថា ខួរក្បាលរបស់មនុស្សមិនអាចដឹងពីភាពខុសគ្នារវាងការចងចាំ និងទស្សនៈវិស័យនៃអនាគតទេ ។ វាមានន័យថា ពេលដែលអ្នកព្យាយាមស្រមើលស្រមៃពីគោលដៅរបស់អ្នកនោះអ្នក និងខួរក្បាលរបស់អ្នកអាចព្យាយាមបង្កើតវាឲ្យក្លាយជាការពិត ។
វិធីសាស្ត្រនេះត្រូវបានសាកល្បងដោយកីឡាករដែលតែងតែស្រមើលស្រមៃថា ពួកគេជោគជ័យមុនការប្រកួត ដើម្បីបង្កើនសមត្ថភាពខ្លួន ។ ប៉ុន្តែដើម្បីផ្លាស់ប្តូរខួរក្បាលរបស់អ្នក អ្នកត្រូវតែព្យាយាមហ្វឹកហាត់ស្រមើលស្រម៉ៃយ៉ាងតិចណាស់ ពី៥ នាទីទៅ១០នាទី ក្នុងមួយថ្ងៃរហូតដល់៦សប្តាហ៍ដែរ ។ប្រសិនបើអ្នកមានភារកិច្ចរវល់អ្នកអាចសាកល្បងបាន មុនពេលចូលដំណេក ឬពេលក្រោកពីដំណេកជាដើម ។ មុនពេលចាប់ផ្តើម អ្នកគួរសួរខ្លួនឯងថា តើខ្ញុំមានទេពកោសល្យខុសគេអ្វីខ្លះ ? តើវានឹងល្អសម្រាប់នរណា ? តើខ្ញុំស្រលាញ់ចូលចិត្តអ្វី ? តើខ្ញុំមានគោលដៅអ្វី ?
វាពិតជាសំខាន់ក្នុងការស្រមើលស្រម៉ៃពីមនុស្សដែលអ្នកចង់ក្លាយទៅជា ឬអ្វីដែលអ្នកចង់សម្រេចជាដើម ។ ឧទាហរណ៍ដូចជា អ្នកចង់ធ្វើបទបង្ហាញដ៏អស្ចារ្យនៅក្រុមហ៊ុនជាដើម ។ អ្នកគួរតែស្រមើលស្រម៉ៃឃើញខ្លួនដើរទៅកាន់ការិយាល័យ និងនិយាយមុខអ្នកដទៃដោយមានជំនឿចិត្ត រួចទទួលបានការកោតសរសើរពីអ្នកទាំងអស់គ្នា ៕ កែសម្រួលដោយ ៖ សុឃាក់
ចែករំលែកព័តមាននេះ