រាជធានីភ្នំពេញ៖ អ្នកចម្រៀងមួយចំនួនព្រោះតែចង់មានបទចម្រៀងចេញផ្សាយបានចាញ់បោកគេអស់ប្រាក់។ នេះបើតាមអ្នកចម្រៀងទាំងនោះបកអាក្រាតទៅលើឈ្មោះឆេង ទីម៉ា ។ នាពេល ថ្មីៗកន្លងមកអ្នកចម្រៀងធា រ៉ានី បានទម្លាយរឿងអ្នកនិពន្ធបទចម្រៀងឈ្មោះឆេង ទីម៉ា ថាបោកប្រាស់នាង ។ ទីម៉ា បានទាមទារយកលុយពីនាងមុន ប៉ុន្តែ៣ខែទៅហើយមិនដឹងជាបទចម្រៀងនៅឯណា ។
ក្រៅពីនេះនៅមានអ្នកដទៃទៀតបានជួបរឿងស្រដៀងកញ្ញាធា រ៉ានី ដែរ ។ ពួកគេបានទម្លាយតាមរយៈសារហ្វេសប៊ុកថា បានចាញ់បោកអ្នកចម្រៀង និងអ្នកនិពន្ធឆេង ទីម៉ា ។ នាងធា រ៉ានី ឲ្យដឹងថា នាងភ្ញាក់ផ្អើលខ្លាំងនៅពេលបានឃើញសារពីអ្នកចម្រៀងផ្សេងទៀត ដែលអះអាងថា ពួកគេបានចាញ់បោកលោកទីម៉ា ក្នុងរូបភាពស្រដៀងនាងដែរ ។
អ្នកចម្រៀង Da Ariya បានសរសេរថា «ម្នាក់ហ្នឹង (ទីម៉ា) បោកខ្ញុំដែរហ្នឹង លុយកក់ច្រៀងបោកឯងអស់៣០ដុល្លារដែរហ្នឹង»។ ចំណែកម្ចាស់ហ្វេសប៊ុកឈ្មោះ Rin Savoen បានសរសេរថា «ជំពាក់លុយខ្ញុំ១០ដុល្លារតែមិនសង អាថោក»។
ដោយឡែកហ្វេសប៊ុកមួយទៀត ឈ្មោះ Mey Manit Johm បានសរសេរថា «ខ្ញុំធ្លាប់ឌីហ្សាញឲ្យច្រើនណាស់ ចុងក្រោយស្គាល់ធាតុពិតអាក្មេងអំនួតម្នាក់នេះ អាកូនកាត់បរទេសគោ ។ ផ្ដាំបងប្អូនដែលស្រលាញ់សិល្បៈចៀសឲ្យឆ្ងាយពីបុគ្គលនេះទៅ ព្រោះថាគ្មានចេះស្អីទេ មានគេប្រាប់ខ្ញុំច្រើនណាស់ថា បោកគេយកលុយច្រើនណាស់ ខ្លះ២០០ ខ្លះ៣០០ ខ្លះ៤០០ ដុល្លារ មានអ្នកខ្លះលើសហ្នឹងទៀត ខ្ញុំធ្លាប់ឌីហ្សាញអាល់ប៊ុមឲ្យច្រើនដែរ តែការទូទាត់គ្មានបានសូម្បីតែមួយរៀលលុយខ្មែរ»។
អ្នកចម្រៀងធា រ៉ានី និយាយថា នាងមានការភ្ញាក់ផ្អើលនៅពេលដែលឃើញមិត្តសិល្បៈផ្សេងទៀត ក៏ចាញ់បោកលោកឆេង ទីម៉ា ដែរ ហើយនៅពេលដែលមានរឿងផ្ទុះបែបនេះហើយ គេមិនត្រឹមតែមិនចេញមុខរកដំណោះស្រាយទទួលខុសត្រូវទេ តែមានតេឌឺថែមទៀត ។ ធា រ៉ានី ថានាងចេញមុខបកអាក្រាតឆេង ទីម៉ា នៅពេលនេះ គឺដើម្បីកុំឲ្យអ្នកសិល្បៈផ្សេងទៀតចាញ់បោកជននេះដូចរូបនាងដែរ និងកុំឲ្យប៉ះពាល់ដល់អ្នកនិពន្ធត្រឹមត្រូវផ្សេងទៀត ។
នេះគ្រាន់តែជាការចោទរបស់អ្នកដែលតាំងខ្លួនថាជាអ្នករងគ្រោះប៉ុណ្ណោះ មិនអាចចាត់ទុកថាត្រឹមត្រូវ ឬយ៉ាងណាទេ ដ្បិតមិនទាន់មានការឆ្លើយតបពីឆេង ទីម៉ា ។ ទីម៉ា អាចនឹងមានហេតុផល ឬការវាយបកតបវិញ ព្រោះវាអាចជាការចោទប្រកាន់មិនត្រឹមត្រូវ ៕ (កែសម្រួលដោយ ៖ បុប្ផា)
ចែករំលែកព័តមាននេះ