រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ប្តីប្រពន្ធពីរនាក់ស្នាក់នៅកន្លែងផ្សេងគ្នាបានជិះម៉ូតូ១គ្រឿងចេញពីកោះពេជ្រ ដោយប្រពន្ធជូនប្តីមកកន្លែងស្នាក់នៅមុនរួចជិះចេញមកផ្ទះវិញបានបន្តិច ស្រាប់តែត្រូវជនសង្ស័យមានគ្នា២នាក់ជិះម៉ូតូ១គ្រឿងមកឆាបនិងកាក់ពីមុខធ្វើឲ្យនារីជាប្រពន្ធភ័យស្លន់ស្លោដួលម៉ូតូ ហើយត្រូវជនសង្ស័យលើកយកជិះគេចខ្លួនបាត់ដោយសុវត្ថិភាពបង្កឱ្យមានការភ្ញាក់ផ្អើលកាលពីម៉ោង១០និង៣០នាទីយប់ ថ្ងៃទី០៣ ខែសីហា ឆ្នាំ២០១៩ ស្ថិតនៅចំណុចតូបលក់ចាប់ហួយមួយកន្លែង តាមបណ្តោយផ្លូវ៥១កែងនឹងផ្លូវព្រះសីហនុ ក្នុងសង្កាត់ចតុមុខ ខណ្ឌដូនពេញ។
ជនរងគ្រោះជាប្រពន្ធខាងលើឈ្មោះ នីតា ភេទស្រី អាយុ២២ឆ្នាំ មុខរបរធ្វើការ ស្នាក់នៅម្តុំបូរីពិភពថ្មី ក្នុងសង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតសង្កាត់ស្រះចកខណ្ឌដូនពេញ ចំណែកបុរសជាប្តីមិនស្គាល់អត្តសញ្ញាណនោះទេ។
តាមប្រភពពីនារីរងគ្រោះបានឲ្យដឹងថា មុនកើតហេតុ រូបគាត់និងប្តីបានជិះម៉ូតូម៉ាក zoomer-x មួយគ្រឿង ពណ៌ស ពាក់ស្លាកលេខភ្នំពេញ 1FJ-2523 ចេញពីកោះពេជ្រ ដោយប្តីជាអ្នកឌុប ឯរូបគាត់អង្គុយនៅខាងក្រោយ ក្នុងបំណងជូនប្តីរបស់គាត់ទៅកន្លែងស្នាក់នៅមុនសិន រួចហើយទើបបន្តទៅកន្លែងស្នាក់នៅរបស់គាត់វិញ ហើយរូបគាត់ និងប្តីស្នាក់នៅកន្លែងផ្សេងគ្នា ដោយបានធ្វើដំណើរតាមបណ្តោយផ្លូវលេខ៥១ ទិសដៅពីត្បូងទៅជើង។ លុះមកដល់ចំណុចកើតហេតុ ប្តីរបស់គាត់បានចុះពីលើម៉ូតូ រួចក៏ដើរចូលទៅក្នុងកន្លែងស្នាក់នៅបាត់ ចំណែករូបនាងបានឡើងជិះម៉ូតូដើម្បីបន្តដំណើរទៅកន្លែងស្នាក់នៅគាត់វិញ។
នារីរងគ្រោះបន្តថា ខណៈបើកម៉ូតូចេញបានបន្តិច ស្រាប់តែលេចមុខជនសង្ស័យពីរនាក់ជិះម៉ូតូមួយគ្រឿងម៉ាកអាយខុន ពណ៌ក្រហម មិនចាំស្លាកលេខ ធ្វើដំណើរបញ្ជ្រាស់ទិសដៅគ្នាពីជើងទៅត្បូង មកឆាប និងកាក់ពីមុខធ្វើឲ្យរូបគាត់កាច់ចង្កូតគេចពីជនសង្ស័យដួលភ័យស្លន់ស្លោរត់ចេញពីម៉ូតូ ធ្វើឱ្យជនសង្ស័យមានឱកាសលើកយកម៉ូតូគាត់ ជិះគេចខ្លួនបាត់ភ្លាមៗនោះ រូបគាត់បានស្រែកថា «ចោរៗ» តែគ្មានអ្នកជួយ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចតុមុខ ដើម្បីសមត្ថកិច្ចជួយស្រាវជ្រាវរកជនសង្ស័យមកផ្តន្ទាទោសទៅតាមផ្លូវច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ