អ្នកដែលល្បីខាងឡើងអគារខ្ពស់ៗកប់ពពកលោកអាឡាំង រ៉ូប៊ែត ដែលមានរហស្សនាមថា «មនុស្សពីងពាងបារាំង» កាលពីថ្ងៃទី២៨ មីនា បានបង្ហាញខ្លួននៅក្នុងប្រទេសអេមីរ៉ាត អារ៉ាប់រួម ហើយតោងឡើងអគារ Burj Khalifa ដែលជាប់ចំណាត់ថ្នាក់ជាអគារខ្ពស់បំផុតនៅលើពិភពលោក ស្ថិតនៅក្នុងទីក្រុងឌូបៃ ។ អគារនោះមានកម្ពស់៨២៨ម៉ែត្រ ។
លោកអាឡាំង រ៉ូប៊ែត អាយុ៤៨ឆ្នាំ បានប្រើពេលប្រហែល៦ម៉ោង ដើម្បីឡើងអគារនេះ ។ មនុស្សពីងពាងបារាំងបានឡើងអគារ Burj Khalifa នេះដើម្បីបំពេញបំណងប្រាថ្នារបស់លោកដែលប៉ងចង់ឡើងអគារខ្ពស់បំផុតនេះ
តាំងពីអគារនោះសាងសង់រួចភ្លាមមកម៉្លេះ ។
លោកអាឡាំង រ៉ូប៊ែត បានឡើងអគារខ្ពស់ៗបំផុតជាង៨០នៅក្នុងប្រទេសនានាលើពិភពលោក ហើយក៏ធ្លាប់ត្រូវចាប់ខ្លួនជាច្រើនលើកច្រើនសាររួចមកហើយដែរ ដោយសារការឡើងអគាររបស់លោក ៕
ចែករំលែកព័តមាននេះ