រាជធានីភ្នំពេញ ៖ កាលពីរសៀលថ្ងៃទី០២ សីហា ក៏មានការប្រកាសមួយលើបណ្តាញសង្គមរបស់ផ្សារទំនើបអូឡាំព្យា ដែលមានជម្រាបជូនដំណឹងទៅកាន់អតិថិជនទាំងអស់ថា ពុំមានអគ្គិភ័យណាមួយបានឆេះផ្សារទំនើបអូឡាំព្យាទ្បើយ ។ អគ្គិភ័យដែលបានឆាបឆេះ កាលពីព្រឹកថ្ងៃសុក្រនេះ(២ សីហា) គឺបានកើតទ្បើងនៅក្នុងឃ្លាំងផ្ទុកសម្ភារ ក្រោមដីតូចមួយនៅខាងក្នុងការដ្ឋានទីក្រុងអូឡាំព្យាតែប៉ុណ្ណោះ ហើយក៏បានបង្កទៅជាផ្សែងមកខាងក្រៅតាមចំណតក្រោមដី មកកាន់ច្រកធំ (C3) បង្កឱ្យមានការភ័ន្តច្រឡំដល់សាធារណជន និងសារព័ត៌មានមួយចំនួន ។ មកទល់ពេលនេះ ផ្សារទំនើបអូឡាំព្យាបានបើកដំណើរការជាធម្មតាវិញហើយ ដូច្នេះ អតិជនទាំងអស់អាចអញ្ជើញមកធ្វើដំណើរកំសាន្ត ទិញទំនិញ និងស្រស់ស្រូបអាហារឆ្ងាញ់ៗជាធម្មតា ។
សូមបញ្ជាក់ថា ផ្សែងខ្មៅខ្មួលបានហុយកួចត្របាញ់ទៅលើអាកាសចេញតាមផ្លូវចុះក្រោមដីផ្សារអូឡាំព្យា ដែលជាសំណង់អគារថ្មីលើដីពហុកីឡដ្ឋានជាតិអូឡាំពិក នៅវេលាម៉ោង៨និង៣០នាទីព្រឹកថ្ងៃទី២ សីហា ធ្វើឱ្យមានការឆោឡោរត់ខ្វែងដៃខ្វែងជើងរកអន្តរាគមន៍ ខណៈកើតមានអគ្គិភ័យឆេះឃ្លាំងស្តុកសម្ភារ បរិក្ខារស្ថិតនៅតាមផ្លូវ២១៧ សង្កាត់វាលវង់ ខណ្ឌ៧មករា រាជធានីភ្នំពេញ ។
យោងតាមរបាយការណ៍របស់អាជ្ញាធរមូលដ្ឋានបានឲ្យដឹងថា នេះជាការឆេះឃ្លាំងស្តុកសម្ភារបរិក្ខារ ក្នុងការដ្ឋានសំណង់ផ្សារអូឡាំព្យានៅក្រោមដី បណ្តាលមកពីឆ្លងចរន្តអគ្គិសនី តែតាមប្រភពក្រោយមកទៀតថា បណ្តាលមកពីជាងផ្សារដែក ធ្វើឱ្យផ្លាតកម្ទេចភ្លើងទៅប៉ះឡាំងស្នោទើបបង្កឱ្យឆេះសន្ធោសន្ធៅ ដោយសារគ្រឿងបរិក្ខាសំណង់ដែលស្តុកក្នុងឃ្លាំងនោះភាគច្រើនជាគ្រឿងជ័រ សម្រាប់ទុករៀបចំបំពាក់ទីកន្លែងលក់ដូរក្នុងផ្សារទំនើបអូឡាំព្យា ។
ខណៈភ្លើងកំពុងឆេះខ្មួលខ្មាញ់ផ្សែងពណ៌ខ្មៅចេញពីឃ្លាំង គេបានសង្កេតឃើញវត្តមានលោក លីម សុភា អភិបាល នៃគណៈអភិបាលខណ្ឌ៧មករា ដឹកនាំកម្លាំងនគរបាល និងកងរាជអាវុធហត្ថខណ្ឌ ចុះទៅដល់កន្លែងកើតហេតុ ។ បន្តិចក្រោយមកគេបានឃើញរថយន្តពន្លត់អគ្គិភ័យជាច្រើនគ្រឿង មកពីគ្រប់ស្ថាប័ន មានអង្គភាពរដ្ឋ និងឯកជនទៅជួយអន្តរាគមន៍បាញ់ទឹកពន្លត់យ៉ាងសកម្មនិងធ្វើឱ្យកំណាត់ផ្លូវ២១៧ មិនអាចធ្វើចរាចរណ៍ដូចធម្មតាបាននោះទេ ។ រថយន្តពន្លត់អគ្គិភ័យបានប្រើពេលវេលាជាង២ម៉ោងក្នុងការបាញ់ពន្លត់ លទ្ធផលបានរលត់ទៅវិញនៅវេលាម៉ោង១០និង៥០នាទីព្រឹកថ្ងៃដដែល ។
យោងតាមរបាយការណ៍របស់មន្ត្រីនគរបាលរាជធានីភ្នំពេញ ទទួលខុសត្រូវកិច្ចអន្តរាគមន៍ពន្លត់អគ្គិភ័យបានឲ្យដឹងថា រថយន្តពន្លត់អគ្គិភ័យទាំងអស់មានចំនួន៣២គ្រឿង ក្នុង១គ្រឿងប្រើប្រាស់ដឹកទឹក៣ជើងសរុប៩៦ជើង ស្មើ៩៦គ្រឿង ដែលបានចំណាយទឹកអស់៣៨ម៉ឺន៤០០០ម៉ែត្រគូប តែតាមប្រភពចុងក្រោយថាប្រើប្រាស់អស់ទឹក១១១គ្រឿងឯណោះ ។
អ្នកទទួលខុសត្រូវផ្សារអូឡាំព្យាបានប្រាប់សមត្ថកិច្ចមូលដ្ឋានថា ឃ្លាំងស្តុកសម្ភារបរិក្ខារសំណង់ដែលត្រូវអគ្គិភ័យឆាបឆេះនេះមានទទឹង២០ម៉ែត្រ និងបណ្តោយ២០ម៉ែត្រ ។ ក្នុងហេតុការណ៍អគ្គិភ័យឆេះឃ្លាំងសម្ភារពុំបង្កឲ្យមាននរណាម្នាក់គ្រោះថ្នាក់រងរបួស ឬដល់អាយុជីវិតនោះទេ គ្រាន់តែថាសម្ភារដូចជាគ្រឿងជ័រនិងគ្រឿងឈើមួយចំនួនធំត្រូវខូចខាត ។ ហេតុការណ៍អគ្គិភ័យឆេះឃ្លាំងក្រោមដីនៅកណ្តាលរាជធានីភ្នំពេញនេះ បានធ្វើឲ្យមានការភ្ញាក់ផ្អើលដល់អ្នកដំណើរឆ្លងកាត់ឈរមើលកុះករចង់ដឹង និងចង់ឃើញហេតុការណ៍ដែលខ្លះថាឆេះផ្សារទំនើប ដែលទើបដំណើរការថ្មោងថ្មី តែទោះជាយ៉ាងណាក្តីចរាចរណ៍តាមដងផ្លូវនៅមានដំណើរការទៅមកជាធម្មតាទេ ក្រោយពីភ្លើងរលត់ ។ (សម្រួលដោយ៖ ស្រីណា)
ចែករំលែកព័តមាននេះ