ប្រទេសកូរ៉េខាងជើង ៖ កូរ៉េខាងជើងកាលពីព្រឹកថ្ងៃទី២សីហាបានបាញ់មីស៊ីលរយៈខ្លីថ្មីទៀត ដែលនោះជាការបាញ់សាកមីស៊ីលលើកទី៣របស់ខ្លួនរយៈពេលតែ៦ថ្ងៃ។
ដកស្រង់ប្រភពព័ត៌មានរបស់សេនាធិការដ្ឋានកងទ័ពកូរ៉េខាងត្បូង ទីភ្នាក់ងារព័ត៌មានYONHAPរបស់ប្រទេសនេះនិយាយថា មីស៊ីលទាំងនោះត្រូវបានបាញ់ដាច់ដោយឡែកពីគ្នា ចេញពីឆ្នេរសមុទ្រខាងកើតរបស់កូរ៉េខាងជើង។ ក្រោយការបាញ់មីស៊ីលលើកមុន ក្រុងព្យុងយ៉ាងបានលើកឡើងថា នោះជាការព្រមានចំពោះកូរ៉េខាងត្បូងដែលគ្រោងធ្វើសមយុទ្ធយោធារួមជាមួយសហរដ្ឋអាមេរិក។ បណ្ដាមីសីុលដែលបាញ់ថ្មីគឺមុនព្រឹកព្រលឹមចេញពីYONGHUNGក្នុងខេត្តHAMGYONG ខាងត្បូង ហើយធ្លាក់ក្នុងសមុទ្រជប៉ុន។
យោងតាមកងទ័ពកូរ៉េខាងត្បូងថា កូរ៉េខាងជើងបានបាញ់រួចហើយនាថ្ងៃទី៣១កក្កដានូវមីស៊ីលបាលីស្ទិក២គ្រាប់ ដោយប៉ុន្មានថ្ងៃមុននេះបានបាញ់មីស៊ីលរយៈខ្លី២ដែរ។ សម្រាប់ការបាញ់មីស៊ីលនាថ្ងៃទី២សីហាក្រុងព្យុងយ៉ាងពុំបានធ្វើអត្ថាធិប្បាយឡើយសម្រាប់ពេលនេះ។
ប្រធាធិបតីអាមេរិកលោកដូណាល់ត្រាំកាលពីថ្ងៃទី១សីហា បានយល់ស្របចំពោះការបាញ់មីស៊ីលទាំងនោះរបស់កូរ៉េខាងជើង។ នៅសេតវិមានលោកត្រាំអះអាងថា យើងតាមដានមើល ចំពោះអ្វីដែលនឹងកើតមាន ប៉ុន្តែបណ្ដាមីស៊ីលរយៈខ្លីវាជារឿងធម្មតាៗ។ យើងពុំដែលនិយាយពីមីស៊ីលរយៈខ្លីឡើយ យើងនិយាយតែមីស៊ីលនុយក្លេអ៊ែរ។ ប្រទេសជាច្រើនបានសាកល្បងបណ្ដាមីស៊ីលប្រភេទនោះ៕ (កែសម្រួលដោយ ៖ បុប្ផា)
ចែករំលែកព័តមាននេះ