រាជធានីភ្នំពេញ ៖ គិតមកត្រឹមឆមាសទី១ ឆ្នាំ២០១៩ នេះអង្គការវិជ្ជាជីវៈ (សហជីព ) ដែលចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈមានចំនួន៥០៤៥ ក្នុងនោះសហជីពមូល ដ្ឋានមានចំនួន ៤៨១១ សហព័ន្ធ សហជីពមានចំនួន១៩៥ សហភាពសហជីពមានចំនួន២៩ សមាគមនិយោជកមានចំនួន១០ ។ នេះបើតាមមន្ត្រីជាន់ខ្ពស់ក្រសួងការងារ ។
លោកម៉ម វណ្ណៈ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានលើកឡើងនៅក្នុងពិធីបើកសិក្ខាសាលាពិគ្រោះយោបល់ត្រីភាគីថ្នាក់ជាតិលើកទី២ លើសេចក្តីព្រាងវិសោធនកម្មច្បាប់ស្តីពីសហជីព នាព្រឹកថ្ងៃទី២ ខែសីហា ឆ្នាំ២០១៩ នៅសណ្ឋាគារសាន់វេថា ការចុះទទួលស្គាល់សហជីពនេះបានធ្វើចំនួនវិវាទការងាររួម និងកូដកម្ម-បាតុកម្មក៏មានការធ្លាក់ចុះគួរឱ្យកត់សម្គាល់ផងដែរ ដែលបណ្តាលមកពីប្រសិទ្ធភាពនៃការអនុវត្តច្បាប់ស្តីពីសហជីព និងការពង្រឹងប្រព័ន្ធអធិការកិច្ចការងារកាន់តែល្អប្រសើរ ។
លោកបន្តថា ទន្ទឹមនឹងវឌ្ឍនភាពទាំងនេះក៏នៅមានសហជីព និងស្ថាប័នអន្តរជាតិមួយចំនួនមិនទាន់មានការយល់ដឹងច្បាស់អំពីខ្លឹមសារនៃបទប្បញ្ញត្តិច្បាប់ស្តីពីសហជីពដោយបានបន្តលើកឡើងអំពីកង្វល់មួយចំនួនក្នុងការចុះបញ្ជីសហជីព និងការស្នើសុំបញ្ជាក់ភាពជាតំណាងបំផុតរបស់សហជីព ។ លោកបន្ថែមថា ដើម្បីដោះស្រាយបញ្ហាប្រឈម និងកង្វល់នានាក្នុងការអនុវត្តច្បាប់ស្តីពីសហជីពដែលជាបទប្បញ្ញត្តិច្បាប់ថ្មី បើប្រៀបធៀបជាមួយច្បាប់ស្តីពីការងារ ក្រសួងការងារ និងបណ្តុះបណ្តាលវិជ្ជាជីវៈក៏បានរៀបចំកិច្ចប្រជុំកម្រិតបច្ចេកទេស និងសិក្ខាសាលាពិគ្រោះយោបល់ ដើម្បីធ្វើការវាយតម្លៃការអនុវត្តច្បាប់ស្តីពីសហជីពជាបន្តបន្ទាប់ ជាមួយតំណាងកម្មករនិយោជិត សហជីព និយោជក និងសមាគមនិយោជក ដោយសហការ ជាមួយអង្គការ ILO និងបានដាក់ចេញជាសេចក្តីណែនាំនានាអមជាមួយនឹងវគ្គបណ្តុះ បណ្តាលផ្សេងៗ ដើម្បីបំភ្លឺការអនុវត្តក្នុងគោលបំណងលើកកម្ពស់ការយល់ដឹងអំពីច្បាប់ស្តីពីសហជីព ស្វែងរកដំណោះស្រាយលើបញ្ហាប្រឈមក្នុងវិស័យការងារ និងបន្តពង្រឹងការអនុវត្តច្បាប់ស្តីពីសហជីពនេះឱ្យបានកាន់តែមានប្រសិទ្ធភាពខ្ពស់ ។
លោករដ្ឋលេខាធិការបញ្ជាក់បន្ថែមថា ៖«សេចក្តីព្រាងច្បាប់វិសោធនកម្មនេះ គឺជាសេចក្តីព្រាងដែលត្រូវបានធ្វើការកែសម្រួលដោយក្រុមការងារបច្ចេកទេសច្បាប់របស់ក្រសួងការងារ និងបណ្តុះបណ្តាលវិជ្ជាជីវៈ បន្ទាប់ពីបានទទួលធាតុចូលពីភាគីពាក់ព័ន្ធនៅក្នុងសិក្ខាសាលាត្រីភាគីកាលពីថ្ងៃទី២៥ ខែមេសា ឆ្នាំ២០១៩ និងមតិយោបល់មួយចំនួនទៀតដែលភាគីពាក់ព័ន្ធបានផ្ញើមកក្រសួងតាមរយៈលិខិតផ្លូវការជាលាយលក្ខណ៍អក្សរកន្លងមក» ។ លោកបន្ថែមថា ទាំងនេះគឺជាលទ្ធផលដែលកើតចេញពីធាតុចូលដែលគ្រប់ភាគីពាក់ព័ន្ធបានផ្តល់មកក្រសួង ដើម្បីជាមូលដ្ឋានឱ្យក្រសួងយកមកពិនិត្យពិចារណា ថ្លឹងថ្លែង និងផ្ទៀតផ្ទាត់គ្រប់ជ្រុងជ្រោយកែសម្រួលលើសេចក្តីព្រាងវិសោធនកម្មនេះសម្រាប់ដាក់ជូនសិក្ខាកាមទាំងអស់បានពិនិត្យបន្ថែមនាពេលនេះ ៕ កែសម្រួលដោយ ៖ សុឃាក់
ចែករំលែកព័តមាននេះ