រាជធានីភ្នំពេញ ៖ ស្ត្រីម្នាក់ខ្មែរម្នាក់មានប្ដីជាជនជាតិវៀតណាម លុះពេលដែលប្ដីចេញទៅផឹកស៊ីជួបជុំជាមួយមិត្តភក្ដិនៅខាងក្រៅយប់ជ្រៅហើយមិនឃើញត្រឡប់មកផ្ទះ ស្ត្រីរងគ្រោះក៏បានទូរស័ព្ទដើម្បីសួរនាំនិងហៅប្ដីឲ្យប្រញ៉ាប់មកផ្ទះវិញ ប៉ុន្តែពេលទូរស័ព្ទចូល បែរជាមានស្រីផ្សេងលើកទូរស័ព្ទទទួលជំនួសប្តីទៅវិញ ធ្វើឱ្យស្ត្រីរងគ្រោះផ្ទុះកំហឹងយ៉ាងខ្លាំងព្រោះភ្លើងប្រច័ណ្ឌ ក៏បោកទូរស័ព្ទ បោកកង្ហារ និង បោករបស់របរចោលខ្ទេចខ្ទី បន្ទាប់មកស្ត្រីរងគ្រោះក៏ឡើងទៅសម្ងំក្នុងបន្ទប់ឡៅតឿរួចចងកសម្លាប់ខ្លួនតែម្ដង។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី២ ខែសីហា ឆ្នាំ២០១៩ នៅក្នុងផ្ទះល្វែងមួយកន្លែង ស្ថិតនៅតាមផ្លូវលំ ក្រុមទី៤ ក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះដែលស្លាប់ឈ្មោះ ជឿន សេងហៃ អាយុ៣០ឆ្នាំ ជនជាតិខ្មែរ មុខរបរមេផ្ទះ មានស្រុកកំណើតភូមិជីពាំង ឃុំក្រែក ស្រុកពញាក្រែក ខេត្តត្បូងឃ្មុំ និងមានប្តីឈ្មោះ វិន ថាន់យ៉ា អាយុ៣១ឆ្នាំ ជាជនជាតិវៀតណាម មុខរបរមេការសំណង់ មើលការខុសត្រូវផ្នែកអគ្គីសនី ស្នាក់នៅផ្ទះជួលកើតហេតុខាងលើ ជាមួយបងប្អូន។ (ស្ត្រីរងគ្រោះមានបងប្អូន៥នាក់ ហើយនាងគឺជាកូនទី២) ។
តាមប្រភពពីក្រុមគ្រួសាររបស់ស្ត្រីរងគ្រោះបានឲ្យដឹងថា ប្តីប្រពន្ធមួយគូនេះបានរៀបការជាមួយគ្នាអស់រយៈពេល៥ឆ្នាំមកហើយ ប៉ុន្តែមិនមានកូននៅឡើយទេ ហើយចាប់តាំងពីរៀបការមក ការរស់នៅជាមួយគ្នាហាក់ដូចជាទឹកនិងប្រេង មិនសូវមានការចុះសម្រុងនឹងគ្នាសោះ គឺតែងតែមានការឈ្លោះប្រកែកគ្នាជាបន្តបន្ទាប់ តែមិនដល់ថ្នាក់លែងលះគ្នាឡើយ ។ ការឈ្លោះប្រកែកគ្នាញឹកញាប់បែបនេះ ធ្វើឱ្យសាច់ញាតិក៏ដូចជាបងប្អូនមិនមានការសប្បាយចិត្តនោះទេ ព្រោះចង់ឃើញប្តីប្រពន្ធទាំង២នាក់មានសុភមង្គល និងស្រឡាញ់គ្នាល្អូកល្អឺន ដោយមិនចង់ឃើញការឈ្លោះគ្នាព្រឹកល្ងាចស្ទើររាល់ថ្ងៃបែបនេះឡើយ។
តាមប្រភពដដែលបានបន្តថា កាលពីវេលាយប់ថ្ងៃទី១ ខែសីហា ប្តីចេញទៅផឹកសុីជួបជុំជាមួយមិត្តភក្ដិនៅខាងក្រៅ ហើយក៏មិនដឹងថាបុរសជាប្តីធ្វើអ្វីខ្លះនោះឡើយ ដោយសារតែចាំមើលផ្លូវប្ដីយូរពេករហូតដល់វេលាម៉ោង២យប់រំលងអាធ្រាត្រឈានចូលថ្ងៃទី២ សីហា ទៅហើយ នៅតែមិនទាន់ឃើញប្ដីត្រឡប់ចូលផ្ទះទៀតនោះ ទើបនាងជាប្រពន្ធទូរស័ព្ទទៅសួរ ។
តាមប្រភពដដែលបានបន្តថា លុះស្ត្រីរងគ្រោះទូរស័ព្ទចូលហើយ តែប្ដីអត់លើកនិយាយរកនាងនោះទេ បែរជាហុចទូរស័ព្ទទៅឲ្យស្រីម្នាក់ផ្សេងទៀតទទួលជំនួសទៅវិញ ខណៈនោះក៏ផ្ទុះភ្លើងប្រច័ណ្ឌកើតឡើង ដោយធ្វើឱ្យស្ត្រីរងគ្រោះខឹងច្រឡោតខ្លាំងពេក នាងបានស្រែកជេរប្ដីតាមទូរស័ព្ទ ។ បន្ទាប់មកប្តីក៏ចុចបិទទូរស័ព្ទចោល ចំណែកស្ត្រីរងគ្រោះបានព្យាយាមទូរស័ព្ទទៅម្តងទៀត ប៉ុន្តែទោះបីជាស្ត្រីរងគ្រោះខំចុចទូរស័ព្ទទៅរកប្តីច្រើនដងយ៉ាងណាក៏មិនចូលឡើយ ទើបធ្វើឲ្យស្ត្រីរងគ្រោះមានកំហឹងកាន់តែខ្លាំងឡើងៗថែមទៀត ពេលនោះស្ត្រីរងគ្រោះបានបោកទូរស័ព្ទចោល និងបោកកង្ហារបាក់ខ្ទេចខ្ទីថែមទៀតផង។
តាមប្រភពដដែលបានបន្តទៀតថា បន្ទាប់មកស្ត្រីរងគ្រោះបានឡើងទៅដេកនៅក្នុងបន្ទប់ឡៅតឿតែម្នាក់ឯង ចំណែកបុរសជាប្តីក្រោយពេលត្រឡប់មកដល់ផ្ទះវិញ បានហៅប្អូនៗបើកទ្វារឱ្យចូល ហើយទោះបីជាប្តីឃើញកង្ហារបាក់បែកខ្ទេចខ្ទី ក៏មិនបានមាត់កអ្វីដែរ និងចូលទៅសង្ងំដេកនៅក្នុងបន្ទប់ខាងក្រោម ដោយមិនបានដឹងថាប្រពន្ធមានរឿងអ្វីនោះឡើយ។ រហូតដល់វេលាម៉ោង៧ព្រឹកថ្ងៃទី២ ខែសីហា ដោយមិនឃើញស្ត្រីរងគ្រោះក្រោកសោះ ហើយបងប្អូនក៏បានអើតមើលតាមកញ្ចក់ទ្វារបន្ទប់ឡៅតឿ ស្រាប់តែប្រទះឃើញស្ត្រីរងគ្រោះយកក្រមាចងកភ្ជាប់នឹងដែកភ្ជួរកង្ហារ ទើបធ្វើឱ្យមានការភ្ញាក់ផ្អើលឆោឡោឡើង ហើយប្តីឡើងទៅស្រាយចំណងទម្លាក់ចុះ ដើម្បីយកទៅសង្គ្រោះដែរ តែប្រពន្ធបានស្លាប់បាត់ទៅហើយ៕ (កែសម្រួលដោយ ៖ ធីតា)
ចែករំលែកព័តមាននេះ