ខេត្តបាត់ដំបង ៖ សាលាបឋមសិក្សាដែលជាថ្នាលបណ្ដុះចំណេះដឹងដ៏សំខាន់មួយកន្លែង ស្ថិតនៅចំកណ្ដាលក្រុងបាត់ដំបង កំពុងហ៊ុមព័ទ្ធទៅដោយស្មៅនិងព្រៃ ដុះទ្រុបទ្រុលយ៉ាងកម្សត់បំផុត ស្ទើរមើលមិនឃើញ បន្ទាប់ពីត្រូវបោះបង់ទីតាំងនេះអស់រយៈពេលជាង១០ឆ្នាំកន្លងទៅនេះ ដោយគ្មានការអើពើអាឡោះ អា…
ខេត្តបាត់ដំបង ៖ សាលាបឋមសិក្សាដែលជាថ្នាលបណ្ដុះចំណេះដឹងដ៏សំខាន់មួយកន្លែង ស្ថិតនៅចំកណ្ដាលក្រុងបាត់ដំបង កំពុងហ៊ុមព័ទ្ធទៅដោយស្មៅនិងព្រៃ ដុះទ្រុបទ្រុលយ៉ាងកម្សត់បំផុត ស្ទើរមើលមិនឃើញ បន្ទាប់ពីត្រូវបោះបង់ទីតាំងនេះអស់រយៈពេលជាង១០ឆ្នាំកន្លងទៅនេះ ដោយគ្មានការអើពើអាឡោះ អា ល័យបន្តិចសោះ រហូតមានពាក្យចចាមអារ៉ាមតៗគ្នាថា ថ្នាលបណ្ដុះធនធានមនុស្សដ៏ឯកោមួយនេះ ត្រូវបានគេលក់បាត់ទៅហើយ ។ ប៉ុន្តែដំណឹងនេះ ត្រូវបានបដិសេធដោយលោកប្រធានមន្ទីរអប់រំខេត្ត ដែលទើបចូលកាន់តំណែងថ្មីនាប៉ុន្មានខែមុននេះ ។
សាលាបឋមសិក្សាដំណាក់ហ្លួង ដ៏កម្សត់់កប់បាត់ក្នុងព្រៃមួយនេះ ស្ថិតនៅក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ។ ថ្នាលបណ្ដុះចំណេះដឹងមួយនេះ មានអគារតែ១ខ្នងប៉ុណ្ណោះ ដែលសាងសង់អំពីឈើប្រក់ក្បឿង មានបន្ទប់សិក្សាចំនួន៥ និងសង់លើផ្ទៃដីទំហំប្រហែលកន្លះហិកតា ដែលសព្វថ្ងៃអគារនេះទ្រុឌទ្រោម និងធ្លុះធ្លាយដំបូលមើលឃើញមេឃ ។ ប្រជាពលរដ្ឋដែលរស់នៅក្បែរនោះ ឬពលរដ្ឋដែលធ្លាប់មានកូនសិក្សានៅសាលានេះ បាននិយាយថា សាលាបឋមសិក្សាដំណាក់ហ្លួង មានប្រវត្តិផ្ដល់ចំណេះដឹងដល់សិស្សា នុសិស្សរាប់ពាន់នាក់ និងមានអាយុកាលរាប់សិបឆ្នាំកន្លងមកហើយ ។ សិស្សានុសិស្សដែលចូលរៀននៅបឋមសិក្សាដ៏ជរាមួយនេះ ភាគច្រើនជាកូនចៅរបស់ប្រជាពលរដ្ឋដែលរស់នៅក្នុងមូលដ្ឋាននោះតែម្ដង។
អ្នកភូមិបាននិយាយថា កាលពីជាង១០ឆ្នាំមុន សិស្សរៀនសុខៗស្រាប់តែសាលានេះបានបិទទ្វារ ជាសន្សឹមៗរហូតប្រកាសបិទទាំងស្រុងតែម្ដង ។ គិតត្រឹមពេលនេះ សាលានេះបានបិទទ្វារអស់រយៈពេលជាង១០ឆ្នាំហើយ គ្មាននរណាដឹងអំពីមូលហេតុជាក់លាក់ទេ។ អ្នកភូមិដដែលបាននិយាយទៀតថា ការបិទទ្វារដែលគេមិនបានដឹងមូលហេតុ និងដោយសារតែគ្មានអាជ្ញាធរឬស្ថាប័នពាក់ព័ន្ធណាមួយអើពើ ធ្វើឲ្យស្មៅនិងព្រៃដុះលប់អគារជិតងងិតឈឹងស្ទើរមើលឃើញព្រាលៗបែបនេះ ទើបមានពាក្យចចាមអារាមជាហូរហែរថា «ថ្នាលបណ្ដុះចំណេះដឹង» មួយនេះទំនងត្រូវគេនាំគ្នាលក់ដូរបាត់ទៅហើយ…។
ពាក់ព័ន្ធនឹងការបិទទ្វារ និងការបោះបង់សាលាបឋមសិក្សា«ដំណាក់ហ្លួង» ទុកឲ្យព្រៃឡោមព័ន្ធយ៉ាងឯកោនៅចំកណ្ដាលក្រុងនេះ អតីតគ្រូបង្រៀននៅបឋមសិក្សានេះមួយរូប ដែលសុំមិនប្រាប់ឈ្មោះ បានប្រាប់កោះសន្តិភាព កាលពីរសៀលថ្ងៃទី៣០ កក្កដា កន្លងទៅនេះថា សាលាបឋមសិក្សា«ដំណាក់ហ្លួង» នេះ មានបន្ទប់សិក្សាចំនួន៥ តែមានសិស្សរៀនរហូតដល់ថ្នាក់ទី៦ និងមានលោកគ្រូ អ្នកគ្រូបង្រៀនសរុបចំនួន៦នាក់ ។ គាត់និយាយថា សាលានេះបានបិទទ្វារទាំងស្រុង នៅក្នុងអំឡុងឆ្នាំ២០០៧ ។ មូលហេតុចម្បងនៃការបិទទ្វារនេះ គឺដោយសារតែការបង្រៀនមិនទៀងទាត់របស់លោកគ្រូ អ្នកគ្រូ ដែលនាំឲ្យសិស្សមករៀនកាន់តែថយចុះទៅៗ រហូតសាលាត្រូវបិទទ្វារតែម្ដង ។
អតីតគ្រូបង្រៀនរូបនេះបានបញ្ជាក់ថា បច្ចុប្បន្នអតីតគ្រូបង្រៀននៅបឋមសិក្សានេះខ្លះ បានឈប់សម្រាក រីឯខ្លះទៀតកំពុងបន្តបង្រៀននៅតាមសាលាដទៃទៀតនៅឡើយ ដោយបោះបង់សាលា«ដំណាក់ហ្លួង» ចោលនៅក្នុងព្រៃយ៉ាងកម្សត់់ ។ នៅពេលសួរថា កន្លងមកនេះមានពាក្យចាមអារាមនិយាយតៗគ្នាថា ដីសាលាដំណាក់ហ្លួងនេះ ត្រូវបានគេលក់អស់ហើយ តើរឿងនេះពិតឬទេ ? អតីតគ្រូប្រចាំសាលាដំណាក់ហ្លួងរូបនេះ ហាក់រារែកបន្តិចក្នុងការផ្ដល់ចម្លើយ ។
ប៉ុន្តែយ៉ាងណាគាត់បានប្រាប់យ៉ាងដូច្នេះថា «ខ្ញុំធ្លាប់ឮពាក្យចចាមអារាមនេះដែរ តែសម្រាប់ខ្ញុំ…ខ្ញុំមិនបានដឹងរឿងនេះទេ ។ ព្រោះតាំងពីសាលានេះបិទទ្វារ ខ្ញុំមិនដែលសួរនាំឬដឹងរឿងអំពីសាលានេះសោះ…! ហើយខ្ញុំក៏មិនដែលឃើញមន្ត្រីពាក់ព័ន្ធឬថ្នាក់ដឹកនាំណា ចុះត្រួតពិនិត្យឬសួរនាំ អតីតគ្រូបង្រៀននៅសាលាកម្សត់មួយនេះដែរ រហូតដល់ថ្ងៃនេះ តែបើមានការលក់ដូរដីសាលានេះមែន ពិតជាគួរឲ្យសោកស្ដាយណាស់» ។
ជុំវិញករណីនេះ ប្រធានមន្ទីរអប់រំ យុវជននិងកីឡា ខេត្ត លោក យី សុងគី បានចេញមុខបំភ្លឺ ដើម្បីបញ្ចប់ភាពមន្ទិលសង្ស័យទាំងនេះ ពាក់ព័ន្ធនឹងការបោះបង់សាលានិងការលក់ដូរដីសាលា តាមរយៈការផ្ដល់បទសម្ភាសមួយតាមទូរស័ព្ទជាមួយកោះសន្តិភាព នៅព្រឹកថ្ងៃទី០១ សីហានេះថា «តាមពិតមិនមានការលក់ដូរដីសាលាបឋមសិក្សាដំណាក់ហ្លួងខាងលើនេះទេ ហើយខាងមន្ទីរអប់រំ ក៏មិនបានបោះបង់សាលានេះដែរ» ។
ពាក់ព័ន្ធនឹងការបិទទ្វារសាលាវិញ លោកប្រធានមន្ទីរបានប្រាប់អំពីមូលហេតុ យ៉ាងដូច្នេះថា «សាលាបឋមសិក្សាដំណាក់ហ្លួងនេះ បានបិទទ្វារដោយសារតែអស់សិស្សរៀន ឬសិស្សតិចពេកមិនតុល្យភាពនឹងគ្រូ បង្រៀន ។ ពេលនោះយើងក៏សម្រេចបញ្ជូនសិស្សដែលសេសសល់ឲ្យទៅរៀននៅសាលាផ្សេង រហូតមកដល់ពេលនេះ សាលានេះបានបិទទ្វារចំនួន១២ឆ្នាំហើយ» ។
លោកយី សុងគី បានបញ្ជាក់ថា បន្ទាប់ពីបឋមសិក្សានេះត្រូវបានបិទទ្វារ ក្រោយមកយើងបានរៀបចំគម្រោងសាងសង់អគារ «មជ្ឈមណ្ឌលយុវជនខេត្ត» នៅលើទីតាំងដីសាលានេះ ហើយគម្រោងនេះយើងបានស្នើសុំទៅក្រសួងហើយ តែមិនទាន់ធ្លាក់មក ។ ដូច្នេះយើងសូមបំភ្លឺជួនប្រជាពលរដ្ឋឲ្យបានជ្រាបថា «ដីសាលាបឋមសិក្សាដំណាក់ហ្លួង ដែលមានទីតាំងនៅក្នុងភូមិ សង្កាត់ខាងលើនេះ មិនមានការបោះបង់ ឬការលក់ដូរទេ» ។
លោកបានបញ្ជាក់បន្ថែមថា «ពេលនេះខ្ញុំកំពុងរៀបចំគម្រោងថែទាំជាមុនសិន នៅឆ្នាំក្រោយនេះ(២០២០) ដើម្បីធ្វើរបងហ៊ុមព័ទ្ធទីតាំងដីសាលា ព្រោះខ្លាចបាត់ដី ។ ខ្ញុំសូមបញ្ជាក់ចុងក្រោយថា ដីសាលានេះជាដីរបស់រដ្ឋ ដែលបានចុះបញ្ជីជាផ្លូវការរួចហើយ ដូច្នេះមិនអាចនរណាលក់ដូរបានទេ» ៕ (សម្រួលដោយ៖ ស្រីណា)
ចែករំលែកព័តមាននេះ