ខេត្តកំពង់ឆ្នាំង ៖ ត្រូវខិតខំប្រឹងប្រែងរៀនសូត្រ និងគោរពបទបញ្ជាផ្ទៃក្នុង ដើម្បីទទួលបានការតាំងស៊ុបក្នុងក្របខណ្ឌនគរបាលជាតិ ខេត្តកំពង់ឆ្នាំង ។ លោកសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍នេះថា៖ «ថ្វីដ្បិតតែក្មួយៗបានប្រឡងជាប់ ចូលក្នុងក្របខណ្ឌនគរបាលពិតមែន ក៏ប៉ុន្តែក្មួយៗ នៅមិនទាន់តាំងស៊ប់ជាកងកម្លាំងនគរបាលជាតិនៅឡើយទេ លុះត្រាណាតែក្មួយៗ ឆ្លងកាត់ការប្រឡងនៅសាលានេះជាប់ទៀត ទើបអាចតាំងស៊ប់ ជាកងកម្លាំងនគរបាលជាតិបាន» ។ មានប្រសាសន៍បែបនេះ នៅក្នុងពិធីជួបសំណេះសំណាល និងនាំយកអំណោយទៅផ្តល់ជូន ដល់សិស្សនាយនគរបាល នាយនគរបាលរង នៅសាលាភូមិភាគ6 ខេត្តកំពង់ឆ្នាំង កាលពីព្រឹកថ្ងៃទី០១ សីហា ។
លោកសន្តិបណ្ឌិតបានបន្តថា ក្នុងអាណត្តិទី៤នេះ ប្រមុខរាជរដ្ឋាភិបាល ក៏ដូចជាក្រសួងមហាផ្ទៃ បានយកចិត្តទុកដាក់ធ្វើកំណែទម្រង់ លើគ្រប់វិស័យ ពិសេសវិស័យកងកម្លាំងប្រដាប់អាវុធ ដើម្បីធានាបាននូវសុខសន្តិភាព ស្ថិរភាពនយោបាយ សេដ្ឋកិច្ច សង្គម និងសវត្ថិភាពភូមិឃុំ ដោយបានជ្រើសរើស កងកម្លាំងចូលថ្មី ដើម្បីបំពេញបង្គ្រប់បន្ថែម លើកងកម្លាំងដែលបានចូលនិវត្តន៍ ។ កងកម្លាំងថ្មី ដែលបានជ្រើសរើស ដោយការប្រឡងនេះ ត្រូវបានបញ្ជូនមក សិក្សារៀនសូត្រ បណ្ដុះបណ្ដាល យកជំនាញបឋម នៅសាលាជាមុនសិន ទើបអាចតាំងស៊ប់ក្នុងក្របខណ្ឌនគរបាលជាតិបាន។
ការដែលតម្រូវឱ្យពួកក្មួយដែលបានប្រឡងជាប់ ចូលមកឆ្លងកាត់វគ្គបណ្ដុះបណ្ដាលក្នុងពេលនេះ ក៏ព្រោះតែពួកក្មួយគ្រាន់តែជាជនស៊ីវិល មិនទាន់បានយល់អំពីច្បាប់អំពីលក្ខន្តិកៈកងកម្លាំងនគរបាល ការប្រើ ប្រាស់ប្រដាប់អាវុធ និងលំហាត់របៀបជាដើម ។ នៅក្នុងសាលានាពេលនេះ ក្មួយៗ គ្រាន់តែជាសិស្សនាយ នាយនគរបាលតែប៉ុណ្ណោះ លុះត្រា ក្មួយៗ ខិតខំរៀនសូត្រ និងប្រឡងជាប់ ទើប ក្មួយៗអាចតាំងស៊ុប ក្នុងក្របខណ្ឌ័នគរបាលជាតិបាន ។ជាចុងក្រោយ សូមក្មួយៗយកចិតទុកដាក់រឿនសូត្រ គោរពវិន័យ និងបទបញ្ជាផ្ទៃក្នុងសាលា ដើម្បីប្រឡងជាប់ចូលក្នុងក្របខណ្ឌ័នគរបាលជាតិ ប្រកបដោយគុណភាព ពេលត្រឡប់ទៅអង្គភាពដើមវិញ ។
ក្នុងឱកាសនោះដែរ លោកវរសេនីយ៍ឯក តុង អាន នាយកសាលានគរបាលជាតិភូមិភាគ៦បានរាយការណ៍ថា វគ្គបណ្ដុះបណ្ដាលកម្រិតបឋមវិជ្ជាជីវៈនគរបាលពេលនេះ គឺជាសិស្សជំនាន់ទី១៣ លើកទី៣ ដែលមានចំនួនសិស្សចំនួន១៤០ នាក់ មកពីបណ្ដាអង្គភាពរបស់នាយកដ្ឋានក្រសួងមហាផ្ទៃ ។ វគ្គបណ្តាល នេះមានរយៈពេល៤ខែ ស្មើនឹងចំនួន៧៩០ម៉ោង ដោយសិក្សាលើ មុខវិជ្ជាជីវៈ ជាច្រើនក្នុងនោះ មានបទបញ្ជា ផ្ទៃក្នុងលក្ខន្តិកៈនៃមន្ត្រីនគរបាល, លំហាត់របៀប, ក្បាច់គុណ,និងការប្រើប្រាស់អាវុធជាដើម ។
ចែករំលែកព័តមាននេះ