ខេត្តមណ្ឌលគិរី ៖ សេចក្តីរាយការបឋមបានឲ្យដឹងថា សម្បកគ្រាប់កាំភ្លើង៧២គ្រាប់ ត្រូវបានសមត្ថកិច្ចរកឃើញនៅថ្ងៃទី២៦ កក្កដា ២០១៩ នៅទីតាំងដីជម្លោះមួយកន្លែងក្នុងភូមិ ពូឆប ឃុំដាក់ដាំ ស្រុកអូររាំង ខេត្តមណ្ឌលគិរី ។
ប្រភពបានឲ្យដឹងថា កាលពីថ្ងៃទី២៦ កក្កដា នៅភូមិឃុំខាងលើមានករណីទំនាស់ដីធ្លីកើតឡើងរវាងភាគីតំណាងឧកញ៉ា ធាង ទ្រី ដែលបានឈួសឆាយផ្លូវលើដីគ្រួសារអ្នកភូមិឈ្មោះ សីហា ដែលជាម្ចាស់ដីដែលមានទំហំ១០០ម៉ែត្រ បណ្តាយទល់អូរ (ប្រហែល៣០០ម៉ែត្រ) រហូតឈានទៅដល់ការដកបង្គោលរបងចំនួន២លើក ។
ប្រភពបន្តថា បន្ទាប់ពីមានជម្លោះពាក្យសម្តី និងដកបង្គោលរបងចេញពីព្រំដីបានស្ងប់ស្ងាត់បន្តិច ស្រាប់តែគេឮមានសម្លេងផ្ទុះអាវុធចំនួនជាង៧០គ្រាប់ ដែលបាញ់ដោយជនមិនស្គាល់មុខ ។ ហើយម្ចាស់ដីមិនបានទៅមើលឡើយ ព្រោះតែខ្លាចមានគ្រោះថ្នាក់ដល់ខ្លួន ។
ទោះជាយ៉ាងណាគិតត្រឹមថ្ងៃទី០១ សីហា ២០១៩ ព័ត៌មានខាងលើនេះ នៅមិនទាន់មានការបញ្ជាក់ច្បាស់លាស់ពីសមត្ថកិច្ចទេ ខណៈគេបានត្រឹមដឹងថា ក្រុមការងារបានចុះស្រាវជ្រាវទៅដល់ទីតាំងកើតហតុកាលពីថ្ងៃទី២៦ កក្កដា ២០១៩ បានរកឃើញសម្បកគ្រាប់អាវុធខ្លីចំនួន៧២សម្បក និងបង្គោលរបងថ្មចំនួន១២៤ ក្នុងនោះបង្គោលឈើចំនួន១១៥បង្គោលថ្មចំនួន៩បង្គោល ។
បញ្ជាក់ ៖ ដោយមិនអាចទំនាក់ទំនងសុំការបំភ្លឺពីសមត្ថកិច្ចណាមួយបានទេ ម្សិលមិញនេះ ។ កែសម្រួលដោយ ៖ សុឃាក់
ចែករំលែកព័តមាននេះ