រាជធានីភ្នំពេញ ៖ នៅឆមាសទី១ ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជាតាមរយៈគណៈកម្មការវិនិយោគកម្ពុជា (CDC) និងគណៈកម្មាធិការតំបន់សេដ្ឋកិច្ច ពិសេសកម្ពុជាបានសម្រេចឯកភាពលើគម្រោងថ្មី និងគម្រោងពង្រីកផលិតកម្មសរុបមាន១៥៣គម្រោងក្នុងនោះគម្រោងក្រៅតំបន់សេដ្ឋកិច្ចពិសេសមាន១១០គម្រោង និងគម្រោងក្នុងតំបន់សេដ្ឋកិច្ចពិសេសមាន៤៣គម្រោង…
រាជធានីភ្នំពេញ ៖ នៅឆមាសទី១ ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជាតាមរយៈគណៈកម្មការវិនិយោគកម្ពុជា (CDC) និងគណៈកម្មាធិការតំបន់សេដ្ឋកិច្ច ពិសេសកម្ពុជាបានសម្រេចឯកភាពលើគម្រោងថ្មី និងគម្រោងពង្រីកផលិតកម្មសរុបមាន១៥៣គម្រោងក្នុងនោះគម្រោងក្រៅតំបន់សេដ្ឋកិច្ចពិសេសមាន១១០គម្រោង និងគម្រោងក្នុងតំបន់សេដ្ឋកិច្ចពិសេសមាន៤៣គម្រោង ។ ចំនួនទឹកប្រាក់វិនិយោគសរុបមានជាង៥១៨១ លានដុល្លារ ដែលអាចបង្កើតការងារបានជាង១៦៧៣៣០កន្លែង ។ នេះបើតាមលោកឯកថា អ្នកនាំពាក្យទីស្តីការគណៈរដ្ឋមន្ត្រី ។
លោកឯក ថា បានលើកឡើងក្នុងសន្នីសីទសារព័ត៌មាន នាព្រឹកថ្ងៃទី០១ សីហាថា លទ្ធផលខាងលើនេះ បើប្រៀបធៀបរយៈពេលដូចគ្នាឆមាសទី១ ឆ្នាំ២០១៨ មាន១០៥គម្រោង ក្នុងនោះគម្រោងក្រៅតំបន់សេដ្ឋកិច្ចពិសេសមាន៧៤ និងគម្រោងក្នុងតំបន់សេដ្ឋកិច្ចពិសេសមាន៣១ ។ ក្នុងឆមាសទី១ ឆ្នាំ២០១៨ ទឹកប្រាក់វិនិយោគសរុបមានជាង៣៥០០លានដុល្លារ ។ លោកក៏បានលើកឡើងថា នៅឆ្នាំ២០១៦ ក្រុមប្រឹក្សាអភិវឌ្ឍន៍កម្ពុជាតាមរយៈគណៈកម្មការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជាបានសម្រេចឯកភាពលើគម្រោងថ្មី និងគម្រោងពង្រីកផលិតកម្មសរុបចំនួន១៧១គម្រោងក្នុងនោះសកម្មភាពវិនិយោគក្រៅតំបន់សេដ្ឋកិច្ចពិសេសមាន១២៩គម្រោង និងក្នុងតំបន់សេដ្ឋកិច្ចពិសេសមាន៤២ ។ ចំនួនទឹកប្រាក់វិនិយោគសរុបមានជាង៣៦០០លានដុល្លារ ។
លោកបន្តថា នៅឆ្នាំ២០១៦ ប្រទេសចិនទទួលបានចំណាត់ថ្នាក់ទី១ ឬ៣០% នៃចំនួនទឹកប្រាក់វិនិយោគសរុប ។ ប្រទេសកម្ពុជាទទួលបានចំណាត់ថ្នាក់ទី២ ឬជាង២៧% នៃចំនួនទឹកប្រាក់វិនិយោគសរុប ។ ជប៉ុនទទួលបានចំណាត់ថ្នាក់ទី៣ ឬជិត២៣% នៃចំនួនទឹកប្រាក់វិនិយោគសរុប ។ បន្ទាប់មកមានប្រទេសថៃ កូរ៉េ សហរដ្ឋអាមេរិក សិង្ហបុរី វៀតណាម អង់គ្លេស និងប្រទេសដទៃទៀត ។
គម្រោងវិនិយោគគិតជាភាគរយនៅភ្នំពេញមាន៣៤% ។ ព្រះសីហនុមាន១៧% ។ កណ្តាលមាន១០% ។កំពង់ស្ពឺមាន៩% និងមានការវិនិយោគនៅតាមបណ្តាខេត្តផ្សេងៗទៀត ។ នៅឆ្នាំ២០១៧ មាន១៨៣គម្រោង ក្នុងនោះសកម្មភាពវិនិយោគក្រៅតំបន់សេដ្ឋកិច្ចពិសេសមាន១៣៦គម្រោង និងក្នុងតំបន់សេដ្ឋកិច្ចពិសេសមាន៤៧គម្រោង ។ ចំនួនទឹកប្រាក់វិនិយោគសរុបមានជាង៦៣៣១លានដុល្លារ ។ នៅក្នុងឆ្នាំនេះការវិនិយោគក្នុងវិស័យកសិកម្ម និងកសិឧស្សាហកម្មមានការកើនឡើងជាង១៥% និងទុនវិនិយោគលើវិស័យហេដ្ឋារចនាសម្ព័ន្ធ និងផ្សេងៗទៀតក៏មានការកើនឡើងជិត៩០% ។ ភាគរយនៃចំនួនគម្រោងវិនិយោគនៅតាមបណ្តាខេត្តក្រុងមានភ្នំពេញមាន៤០% ។ ព្រះសីហនុមាន១៣%។ កណ្តាលមាន១៣% កំពង់ស្ពឺមាន៩% ស្វាយរៀងមាន៧% និងមាននៅតាមបណ្តាខេត្តផ្សេងៗទៀត ។
លោកបន្ថែមថា ប្រទេសកម្ពុជាជាប់ចំណាត់ថ្នាក់ទី១ ដែលមានជិត៥១% នៃចំនួនទឹកប្រាក់វិនិយោគទាំងអស់ ។ប្រទេសចិនជាប់ចំណាត់ថ្នាក់ទី២ មានជិត២៦% នៃចំនួនទឹកប្រាក់វិនិយោគទាំងអស់ ។ ប្រទេសវៀតណាមជាប់ចំណាត់ថ្នាក់ទី៣ មាន៩% និងម៉ាឡេស៊ីជាប់ចំណាត់ថ្នាក់ទី៤ ឬជាង៤% និងមានប្រទេសជាងបន្តបន្ទាប់ទៀត ។ លោកក៏បានលើកទៀតថា នៅឆ្នាំ២០១៨ មានចំនួន ២៥៥គម្រោងក្នុងនោះគម្រោងក្រៅតំបន់សេដ្ឋកិច្ចពិសេសមាន ១៧៦គម្រោង និងគម្រោងក្នុងតំបន់សេដ្ឋកិច្ចពិសេសមាន ៧៩គម្រោង ។
កត្តាទាំងនេះបង្ហាញឱ្យឃើញពីភាពរឹងមាំរបស់រាជរដ្ឋាភិបាល ក្នុងការធានាដល់ការវិនិយោគ និងភាពកាន់តែជឿទុកចិត្តរបស់វិនិយោគិនក្នុងស្រុក និងក្រៅប្រទេសមកលើរាជរដ្ឋាភិបាលកម្ពុជា ។ នៅឆមាសទី១ ឆ្នាំ២០១៩ ក្រុមប្រឹក្សាអភិវឌ្ឍន៍កម្ពុជាតាមរយៈគណៈកម្មការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជាបានសម្រេចឯកភាពលើគម្រោងថ្មី និងគម្រោងពង្រីកផលិតកម្មសរុបមាន១៥៣គម្រោង ក្នុងនោះគម្រោងក្រៅតំបន់សេដ្ឋកិច្ចពិសេសមាន១១០គម្រោង និងគម្រោងក្នុងតំបន់សេដ្ឋកិច្ចពិសេសមាន៤៣គម្រោង ។
ចំនួនទឹកប្រាក់វិនិយោគសរុបមានជាង ៥១៨១លានដុល្លារ ដែលអាចបង្កើតការងារបានជាង ១៦៧៣៣០កន្លែង ។ ប្រៀបធៀបរយៈពេលដូចគ្នាឆមាសទី១ ឆ្នាំ២០១៨ មាន ១០៥គម្រោង ក្នុងនោះគម្រោងក្រៅតំបន់សេដ្ឋកិច្ចពិសេសមាន៧៤ និងគម្រោងក្នុងតំបន់សេដ្ឋកិច្ចពិសេសមាន៣១ ។ ក្នុងឆមាសទី១ ឆ្នាំ២០១៨ ទឹកប្រាក់វិនិយោគសរុបមានជាង ៣៥០០លានដុល្លារ ៕ កែសម្រួលដោយ ៖ សុឃាក់
ចែករំលែកព័តមាននេះ