រាជធានីភ្នំពេញ ៖ បុរស២នាក់ជិះម៉ូតូមួយគ្រឿងធ្វើដំណើរតាមផ្លូវក៏ត្រូវរថយន្តកុងតឺន័របើកកៀរ បណ្តាលអោយដួលបោកនឹងថ្នល់ ហើយក៏ត្រូវរថយន្តកុងតឺន័រកិនស្លាប់ម្នាក់ ចំណែកម្នាក់ទៀតរងរបួសធ្ងន់ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង៩និង៤០នាទីយប់ថ្ងៃទី៣១ ខែកក្កដា ឆ្នាំ២០១៩ នៅតាមបណ្ដោយផ្លូវវេងស្រេង ដែលស្ថិតនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ភាគីខាងម៉ូតូមួយគ្រឿងជិះគ្នា២នាក់ម៉ាកស៊ុយហ្ស៊ុយគីឡែត ពណ៌ស ពាក់ស្លាកលេខ ១CF -៦៦១៦ បើកបរដោយឈ្មោះជា រតនា ភេទប្រុស អាយុ២៥ឆ្នាំ មុខរបរកម្មកររោងចក្រ ស្នាក់នៅភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ មានស្រុកកំណើតនៅភូមិអន្សោមសោម ឃុំអន្សោម ស្រុកកំពង់ត្របែក ខេត្តព្រៃវែង បានស្លាប់នៅនឹងកន្លែងកើតហេតុ រីឯបុរសម្នាក់ទៀតជាអ្នករួមដំណើរដែលរងរបួសធ្ងន់ មិនត្រូវបានស្គាល់អត្តសញ្ញាណនោះទេ ។ ចំណែកភាគីខាងរថយន្តកុងតឺន័រ មិនស្គាល់ម៉ាក អ្នកបើកបរមិនស្គាល់អត្តសញ្ញាណ បានបើកគេចបាត់ស្រមោល ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញយុវជនរងគ្រោះទាំង២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីឡែត បើកបរក្នុងទិសដៅពីលិចទៅកើត លុះមកដល់កន្លែងកើតហេតុខាងលើ ក៏មានរថយន្តកុងតឺន័រមួយគ្រឿង បើកបរ ស្របទិសគ្នាជាមួយម៉ូតូរបស់ជនរងគ្រោះ ។
តាមប្រភពដដែលបានបន្តថា ស្រាប់តែរថយន្តកុងតឺន័របានបើកកៀរម៉ូតូជនរងគ្រោះបណ្តាលឲ្យដួលបោកទៅនឹងខឿនពុះចែកទ្រូងផ្លូវ បណ្តាលឲ្យអ្នកបើកបរម៉ូតូខ្ទាតចូលក្រោមរថយន្តកុងតឺន័រ ហើយក៏ត្រូវរថយន្តកុងតឺន័រកិនចំក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ ចំណែកអ្នករួមដំណើរម្នាក់ទៀតរងរបួសធ្ងន់ត្រូវបានរថយន្តសង្គ្រោះរបស់គ្លីនិកឯកជនដឹកយកទៅសង្គ្រោះភ្លាមៗផងដែរ ។ ដោយឡែករថយន្តកុងតឺន័របានបើក គេចបាត់ស្រមោល ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចនគរបាលចរាចរណ៍ខណ្ឌពោធិ៍សែនជ័យបានធ្វើលិខិតប្រគល់អោយក្រុមគ្រួសារ ដើម្បីយកទៅធ្វើបុណ្យតាមប្រពៃណីនៅស្រុកកំណើត ចំណែកម៉ូតូត្រូវបានសមត្ថកិច្ចជំនាញយកទៅរក្សាទុករង់ចាំប្រគល់អោយក្រុមគ្រួសាររបស់ជនរងគ្រោះវិញផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ