ខេត្តព្រៃវែង ៖ តាមសេចក្តីរាយការណ៍បឋមបានឲ្យដឹងថា បុរសម្នាក់បានស្លាប់បាត់បង់ជីវិតយ៉ាងអាណោចអាធម្ម ដោយសារតែត្រូវភ្លើងអគ្គិសនីឆក់នៅខណៈពេលកំពុងតខ្សែភ្លើងចូលព្រីភ្លើង ហើយមិនបានផ្តាច់ភ្លើងជាមុន ។ ហេតុការណ៍នេះបានកើតឡើង កាលពីវេលាម៉ោង៥និង៤៥នាទីល្ងាច ថ្ងៃទី៣០ កក្កដានេះ នៅនិងផ្ទះជនរងគ្រោះ ស្ថិតក្នុងភូមិបន្លិច ឃុំប្រាសាទ ស្រុកពាមរក៌ ខេត្តព្រៃវែង ។
ជនរងគ្រោះមានឈ្មោះ ជិន ចំរើន ភេទប្រុស អាយុ៣៩ឆ្នាំ ត្រូវចរន្តភ្លើងឆក់ឆេះខ្លោចខ្លួនប្រាណទាំងមូល និងបានស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុ ។
ប្រភពព័ត៌មានពីសមត្ថកិច្ចបានអោយដឹងថា នៅមុខពេលកើតហេតុនោះជនរងគ្រោះនៅផ្ទះម្នាក់ឯង ហៅក្នុងផ្ទះក៏មិនមានដាច់ភ្លើងដែរ ប៉ុន្តែមិនដឹងជាមូលហេតុអ្វីទើបជនរងគ្រោះយកខ្សែភ្លើងទៅតចូលព្រីភ្លើងដោយមិនបានបិតប៉ារ៉ែតភ្លើងជាមុន ទើបធ្វើអោយឆក់ប្រកាច់ម្នាក់ឯង រហូតទាល់តែស្លាប់បែបនេះទៅ ហើយភ្លាមៗនោះគ្មានអ្នកណាបានដឹងទេរហូតទាល់តែជាងកន្លះម៉ោងក្រោយមកទើបមានអ្នកដឹង និងមានការផ្អើលឆោឡោឡើង និងបាននាំគ្នាជួយសង្គ្រោះដែរ តែវាហួសពេលទៅហើយ ។
ក្រោយកើតហេតុ សមត្ថកិច្ចបានចុះទៅដល់កន្លែងកើតហេតុត្រួតពិនិត្យសាកសពឃើញថា ពិតជាស្លាប់ដោយសារតែឆក់ និងចរន្តអគ្គិសនីពិតមែនទើបប្រគល់សាកសពអោយទៅក្រុមគ្រួសាររៀបចំធ្វើបុណ្យតាមប្រពៃណីនៅល្ងាចថ្ងៃកើតហេតុនោះតែម្តងទៅ ៕ កែសម្រួលដោយ ៖ សុឃាក់
ចែករំលែកព័តមាននេះ