រាជធានីភ្នំពេញ៖ តារាចម្រៀងបាន មុនីលក្ខ័ ខណៈកាន់តែមានប្រជាប្រិយភាព ពេលនេះមានឱកាសចេញទៅច្រៀងនៅបរទេសសាជាថ្មី ។ នេះជាដំណើរលើកទី២បន្ទាប់ពីប្រទេសកូរ៉េ ។
តារាចម្រៀងសំនៀងក្រអួនស្រស់សោភា កញ្ញាបាន មុន្នីល័ក្ខ ត្រូវបានជ្រើសរើសជាតារាចម្រៀងតំណាងពីកម្ពុជាដើម្បីចូលរួមក្នុងព្រឹត្តិការណ៍ប្រគំតន្ត្រីទ្រង់ទ្រាយធំមួយនៅដើមខែសីហាខាងមុខនេះ ។ នាងត្រូវគេរំពឹងថានឹងលើកមុខមាត់ជាតិក្នុងព្រឹត្តិការណ៍ប្រគំតន្ត្រីនៅប្រទេសថៃដែលមានបណ្តាប្រទេសនៅតំបន់អាស៊ានទាំងអស់ចូលរួម រួមទាំងប្រទេសចិនផងដែរ។
កម្មវិធីប្រគំតន្ត្រីនេះមានឈ្មោះថា «ការប្រគំតន្ត្រីមិត្តភាពអាស៊ានឆ្នាំ២០១៩» រៀបចំដោយវិទ្យុថៃ នៅក្រោមនាយកដ្ឋានទំនាក់ទំនងសាធារណៈរបស់រដ្ឋាភិបាល ។ កម្មវិធីនេះនឹងធ្វើឡើងនៅថ្ងៃទី៣ ខែសីហា ឆ្នាំ២០១៩ នៅមហោស្រព Aksara King Power Building នៅទីក្រុងបាងកកប្រទេសថៃ ក្រោមការចូលរួមពីតារាចម្រៀងទាំង១០ប្រទេសនៃតំបន់អាស៊ាន និងតារាចម្រៀងពីប្រទេសចិន ផងដែរ។ កម្មវិធីនេះនឹងផ្សាយផ្ទាល់ និងចាក់ផ្សាយនៅលើបណ្តាញសង្គម វិទ្យុ និងទូរទស្សន៍NBT របស់ថៃ ។
តារាចម្រៀងបាន មុនីល័ក្ខ និយាយថា «នាងខ្ញុំពិតជារំភើប និងមានមោទនភាពសម្រាប់ឱកាសទទួលបានការអញ្ជើញដ៏មានកិត្តិយសមួយនេះ ហើយក៏ស្ថិតក្នុងនាមជាតារាចម្រៀងតំណាងពីកម្ពុជា ។ នេះគឺជាលើកទីមួយដែលទទួលបានឱកាសមួយនេះ ហើយនាងខ្ញុំបានត្រៀមរួចជាស្រេចក្នុងការបង្ហាញសមត្ថភាពច្រៀងនៅលើឆាកតន្ត្រីទ្រង់ទ្រាយធំមួយនេះដោយនាងខ្ញុំមានទាំងបទនិពន្ធថ្មីផ្ទាល់ខ្លួន ដែលមានខ្លឹមសារលើកទឹកចិត្តស្ត្រី បទចម្រៀងរួមគ្នាជាមួយតារាចម្រៀងមកពីប្រទេសនានាជាដើម»។
បាន មុនីល័ក្ខ កំពុងតែមមាញឹកហ្វឹកហាត់បទចម្រៀងទាំងនេះដើម្បីប្រាកដថាឲ្យសក្ដិសមទៅនឹងកិត្តិយសដែលទទួលបានក្នុងនាមជាតំណាងកម្ពុជា ។
តាមការគ្រោងទុកបាន មុនីលក្ខ នឹងចាកចេញពីកម្ពុជានៅថ្ងៃទី៣១ខែកក្កដា ដើម្បីហាត់សមរួមគ្នាជាមួយតារាចម្រៀងពីបណ្តាប្រទេសនានា មុនពេលព្រឹត្តិការណ៍ប្រគំតន្ត្រីផ្ទាល់បានមកដល់ ។ នាងតាំងចិត្តនឹងធ្វើឲ្យអស់ពីសមត្ថភាពក្នុងការហ្វឹកហាត់ច្រៀងបទចម្រៀងផ្ទាល់ខ្លួន និងបទចម្រៀងរួមជាមួយតារាចម្រៀងក្នុងតំបន់ ហើយនាងរំពឹងថានឹងទទួលបានលទ្ធផលល្អក្នុងព្រឹត្តិការណ៍មួយនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ