ក្រុងហុងកុង ៖ ការប៉ះទង្គិចគ្នាថ្មីកើតមានកាលពីយប់ថ្ងៃទី៣០កក្កដា នៅក្រុងហុងកុង រវាងប៉ូលិសនិងបាតុករជាច្រើនរយនាក់ បន្ទាប់ពីមនុស្ស៤៤នាក់ត្រូវជាប់ការចោទប្រកាន់ក្រោយផ្ទុះអំពើហិង្សានានា។ ពួកអ្នកទាំងនោះទទួលការចោទប្រកាន់ពីបទចូលរួមក្នុងការបះបោរ ជាការចោទប្រកាន់ដែលអាចមានទោសជាប់គុករហូតដល់១០ឆ្នាំ។ រួចនាថ្ងៃទី៣១កក្កដា មានបាតុករច្រើននាក់ប្រមូលផ្ដុំគ្នានៅមុខតុលាការ ប្រឆាំងការចោទប្រកាន់បាតុករទាំង៤៤នាក់នោះ។
ក្រុងហុងកុងជួបប្រទះនឹងវិបត្តិដ៏អាក្រក់នៃប្រវត្តិសាស្ត្ររបស់ខ្លួន ជាមួយបាតុកម្មធំៗចាប់តាំងពីថ្ងៃទី៩មិថុនាមក ប្រឆាំងរដ្ឋាភិបាលស្និទ្ធក្រុងប៉េកាំង ហើយមានការប៉ះទង្គិចគ្នានានា រវាងពួកបាតុកររ៉ាឌីកាល់និងប៉ូលិស។ កាលពីយប់ថ្ងៃទី៣០កក្កដាកងកម្លាំងប៉ូលិស បានប្រើឧស្ម័នម្រេច ប្រឆាំងបាតុករច្រើនរយនាក់ដែលប្រមូលផ្ដុំគ្នា នៅមុខការិយាល័យប៉ូលិសនៃសង្កាត់KWAI CHUNG។ ប៉ូលិសប្រដាប់ដោយដំបងនិងខែលការពារ បានលើកចេញពីទីតាំងប៉ូលិសនោះប៉ុនប៉ងបំបែកពួកគេ ដែលតបតវិញដោយគប់ដបនិងឆ័ត្រ។
ការប៉ះទង្គិចគ្នាដ៏ខ្លាំងកើតមានកាលពីថ្ងៃទី២៨កក្កដានៅជិតការិយាល័យទំនាក់ទំនងចិន តំណាងឲ្យអាជ្ញាធរចិនក្នុងដែនដីហុងកុង។ បាតុករ៤៩នាក់បានត្រូវចាប់ខ្លួន ក្នុងនោះ៤៤នាក់ទទួលការចោទប្រកាន់កាលពីថ្ងៃទី៣០កក្កដា ពីបទចូលរួមក្នុងការបះបោរ៕ (កែសម្រួលដោយ ៖ បុប្ផា)
ចែករំលែកព័តមាននេះ